ସମ୍ବଲପୁର,୦୩/୦୧: ସମ୍ବଲପୁରରେ ମାତିଛନ୍ତି ମୁଖାପିନ୍ଧା ଲୁଟେରା । ଆଜି ସକାଳୁ ବନ୍ଧୁକ ମୁନରେ ବ୍ୟାଗ ଭର୍ତ୍ତି ସୁନା ଲୁଟ୍ ଅଭିଯୋଗ । ତେବେ ସମ୍ବଲପୁର ଅଇଁଠାପାଲିରେ ଥିବା ମନାପୁରମ ବ୍ରାଞ୍ଚରୁ ସଶସ୍ତ୍ର ଡକାୟତି ହୋଇଥିବା ସୂଚନା ମିଳିଛି । ୩୦ କେଜିର ସୁନା ଅଳଙ୍କାର ଲୁଟିନେଇଛନ୍ତି ଲୁଟେରା । ଘଟଣାସ୍ଥଳରେ ଅଇଁଠାପାଲି ପୋଲିସ ପହଞ୍ଚି ତଦନ୍ତ କରୁଛି ।
ସୂଚନା ଅନୁସାରେ, ଆଜି ସକାଳେ କିଛି ଜଣ ମୁଖାପିନ୍ଧା ଦୁର୍ବୃତ୍ତ ବୁଢାରାଜା ମନାପୁରମ ବ୍ରାଞ୍ଚରେ ପଶିଥିଲେ । ଭିତରେ ଥିବା କର୍ମଚାରୀଙ୍କୁ ବନ୍ଧୁକ ଦେଖାଇ ଭୟଭୀତ କରିଥିଲେ । ଏହା ପରେ ସେଠାରେ ଥିବା ପ୍ରାୟ ୩୦ କେଜି ସୁନା ସହ ୪ ଲକ୍ଷରୁ ଉର୍ଦ୍ଧ୍ବ ଟଙ୍କା ଲୁଟି ଘଟଣାସ୍ଥଳରୁ ଚମ୍ପଟ ମାରିଛନ୍ତି । ବାଇକରେ ୬ଜଣ ଆସି ବନ୍ଧୁକ ଦେଖାଇ କର୍ମଚାରୀଙ୍କୁ ବାନ୍ଧି ଡକାୟତି କରିଥିବା ଥାନାରେ ଅଭିଯୋଗ ପରେ ଲୁଟେରାଙ୍କୁ ଧରିବାକୁ ବିଭିନ୍ନ ସ୍ଥାନରେ ଛାନ୍ଭିନ୍ ଜାରି ରଖିଛି ପୋଲିସ । ତେବେ ସମସ୍ତେ ହିନ୍ଦୀରେ କଥାବାର୍ତ୍ତା କରୁଥିବାବେଳେ ସମସ୍ତଙ୍କ ହାତରେ ବନ୍ଧୁକ ରହିଥିଲା । ସମସ୍ତ ଘଟଣା ସିସିଟିଭିରେ କଏଦ ହୋଇଥିବାବେଳେ ପୋଲିସ ସିସିଟିଭି ତନ୍ନ ତନ୍ନ କରି ଯାଞ୍ଚ କରୁଛି । ଏହା ସହ ସମସ୍ତ ଅଭିଯୁକ୍ତ ଅଇଁଠାପାଲି ଏନଏଚପଟକୁ ବାହାରି ଯାଇଥିବା କୁହାଯାଉଛି । ସେପଟେ ଘଟଣା ପରେ ପୋଲିସ ଟିମ୍ ଗଠନ କରିବା ସହ ନାକାବନ୍ଦୀ ଆରମ୍ଭ କରିଛି । ଘଟଣା ପରେ ଉତ୍ତରାଞ୍ଚଳ ଆଇଜି ଆସି ଘଟଣାର ଛାନଭିନ୍ କରିଛନ୍ତି ।
