ମୁମ୍ବାଇ ୦୫/୦୧: ଗତ ବର୍ଷ ବେଶ୍ ମାନସିକ ବେଦନା ଭୋଗିଥିଲେ ମଲାଇକା ଅରୋରା । ତାଙ୍କ ଜୀବନରେ ଗୋଟିଏ ପରେ ଗୋଟିଏ ଉଠାଣି ଗଡ଼ାଣି ଲାଗି ରହିଥିଲା । ବଡ଼କଥା ହେଲା ପାଞ୍ଚ ବର୍ଷର ସଂପର୍କରେ ପୂର୍ଣ୍ଣଛେଦ ପଡ଼ିଛି ସେହି ୨୦୨୪ରେ । ପୁଣି ସାବତ ପିତାଙ୍କୁ ହରାଇଛନ୍ତି । ଏସବୁ ସତ୍ତେ୍ୱ ତାଙ୍କୁ ଆଗକୁ ବଢ଼ିବାକୁ ହେବ ବୋଲି ଅନୁଗାମୀମାନଙ୍କୁ ଜଣାଇଛନ୍ତି । ବର୍ଷଶେଷରେ ସେ ନିଜର ନାନା ଉପଲବ୍ଧି ବିଷୟରେ କହିଥିଲେ । ଯଦିଓ ଅର୍ଜୁନ କପୁରଙ୍କ ସହ ବିଚ୍ଛେଦ ପ୍ରସଙ୍ଗରେ ପାଟି ଫିଟାଇ ନାହାନ୍ତି ମଲାଇକା । ଅର୍ଜୁନ ଯଦିଓ ଜଣାଇ ସାରିଛନ୍ତି ବର୍ତ୍ତମାନ ସମୟରେ ସେ ‘ସିଙ୍ଗଲ୍’ ।
ତେବେ ମଲାଇକାଙ୍କୁ ଏ ପ୍ରସଙ୍ଗରେ ପ୍ରଶ୍ନ ହେବାରୁ ତାଙ୍କର ସ୍ପଷ୍ଟ ଉତ୍ତର, ସେ ନିଜ ବ୍ୟକ୍ତିଗତ ଜୀବନ କଥା ବାହାର ଦୁନିଆ ଆଗରେ ଏବେ ଜଣାଇବେ ନାହିଁ । କିନ୍ତୁ ତାଙ୍କ ଇନଷ୍ଟାଗ୍ରାମ ପୃଷ୍ଠା ଭିନ୍ନ କଥା କହୁଛି । ଗୋଟିଏ ପରେ ଗୋଟିଏ ଇଙ୍ଗିତପୂର୍ଣ୍ଣ ପୋଷ୍ଟ ସେଥିରେ ଦେଖିବାକୁ ମିଳୁଛି । ବର୍ଷ ପୂର୍ତ୍ତିର ଦିନକ ପୂର୍ବରୁ ତାଙ୍କ ଇନଷ୍ଟା ଷ୍ଟୋରୀରେ ଏମିତି କିଛି ଲେଖାଥିଲା ଯାହା ଅର୍ଜୁନଙ୍କ ସହିତ ତାଙ୍କ ସଂପର୍କ ଭାଙ୍ଗିବାର କଥା ପରୋକ୍ଷରେ ସୂଚାଉଥିଲା । ମଲାଇକା ଲେଖିଥିଲେ ‘୨୦୨୪, ମୁଁ ତୁମକୁ ଘୃଣା କରେ ନାହିଁ । କିନ୍ତୁ ତୁମେ ମୋ ପାଇଁ ଖୁବ୍ କଠିନ ସମୟ ହୋଇ ଯାଇଥିଲ । ବହୁ ଉଠାଣି ଗଡ଼ାଣି ଆସିଛି ତୁମ ସମୟରେ । କେତେ ପରିବର୍ତ୍ତନ ଆସିଛି ଜୀବନରେ । ଅନେକ କିଛି ଶିଖାଇଛ ମତେ । ତୁମେ ଦେଖାଇ ଦେଇଛ, ଆଖି ପଲକରେ ଜୀବନ ବଦଳି ଯାଇପାରେ । ୨୦୨୪, ତୁମେ ହିଁ ଶିଖାଇଛ, ନିଜ ଉପରେ ବିଶ୍ୱାସ ରଖିବା କେତେ ଜରୁରି ।’
ସବୁଠୁ ବଡ଼ ଶିକ୍ଷା ମଲାଇକା ୨୦୨୪ରେ ହିଁ ପାଇଥିଲେ । ତାଙ୍କ କଥାରେ ସେହି ବର୍ଷ ହିଁ ତାଙ୍କୁ ଶିଖାଇଥିଲା ସବୁଠୁ ଊଦ୍ଧ୍ୱର୍ରେ ସ୍ୱାସ୍ଥ୍ୟ । ତେଣିକି ତାହା ମାନସିକ ହେଉ ଅବା ଶାରୀରିକ । ଦୁଇଟି ଯାକ ଅତି ଗୁରୁତ୍ୱପୂର୍ଣ୍ଣ । ମଲାଇକା ଏକଥା ବି ପୋଷ୍ଟ କରିଛନ୍ତି ଯେ ତାଙ୍କ ସହିତ କାହିଁକି ସେସବୁ ଘଟଣା ଘଟିଗଲା ଯାହା ବିଷୟରେ ସେ କଳ୍ପନା ବି କରିନଥିଲେ । ସମୟ ଆସିଲେ ହୁଏତ ଏସବୁର କାରଣ ଖୋଜିପାଇବେ । ତେବେ ଏକଥା ବି ସେ କହିଛନ୍ତି ସମୟ ଆସିଲେ ସେ ସବୁ ସତ କଥା ଜଣାଇଦେବେ । ସେତେବେଳେ ପର୍ଯ୍ୟନ୍ତ ଅପେକ୍ଷା କରିବାକୁ ହେବ ।
