ହାଇଦ୍ରାବାଦ ୦୬/୦୧: ହାଇଦ୍ରାବାଦର ସନ୍ଧ୍ୟା ଥିଏଟର ଦଳାଚକଟା ମାମଲାରେ ଅଭିନେତା ଅଲ୍ଲୁ ଅର୍ଜୁନ ଗତକାଲି ପୁଲିସ ନିକଟରେ ହାଜିରା ଦେଇଛନ୍ତି । କୋର୍ଟରୁ ମିଳିଥିବା ଜାମିନ ସର୍ତ୍ତ ଅନୁସାରେ ସେ ଚିକଡାପାଲି ଥାନାର ଏସ୍ଏଚ୍ଓ (ଷ୍ଟେସନ ହାଉସ ଅଫିସର)ଙ୍କ ପାଖରେ ହାଜର ହୋଇଥିଲେ । ସମସ୍ତ ଔପଚାରିକତା ପୂରଣ କରିବା ପରେ ସେ ଥାନାରୁ ପଳାଇଥିଲେ । ଗତ ୩ ତାରିଖରେ ତାଙ୍କୁ ନାମପଲ୍ଲୀ କୋର୍ଟରୁ ନିୟମିତ ଜାମିନ ମିଳିଥିଲା । ଦଳାଚକଟା ମାମଲାରେ ଅଲ୍ଲୁ ଅର୍ଜୁନଙ୍କ ନାମ ଅଭିଯୁକ୍ତ ତାଲିକାରେ ଏକାଦଶ ସ୍ଥାନରେ ରହିଛି ।
କୋର୍ଟ ରଖିଥିବା ଜାମିନ ସର୍ତ୍ତ ଅନୁସାରେ ପ୍ରତି ରବିବାର ପୂର୍ବାହ୍ନ ୧୦ଟାରୁ ଅପରାହ୍ନ ୧ଟା ଭିତରେ ସେ ଥାନାରେ ହାଜିରା ଦେବେ । ଦୁଇମାସ ପର୍ଯ୍ୟନ୍ତ କିମ୍ବା ଚାର୍ଜସିଟ ଦାଖଲ ହେବା ଯାଏ ତାଙ୍କୁ ଥାନାରେ ହାଜର ହେବାକୁ ପଡିବ । ସେହିଭଳି ବିନା ଅନୁମତିରେ ସେ ତାଙ୍କ ଘର ଠିକଣା ବଦଳାଇବେ ନାହିଁ କିମ୍ବା ବିଦେଶ ଯାଇପାରିବେ ନାହିଁ ବୋଲି ଅଦାଲତ ନିର୍ଦ୍ଦେଶ ଦେଇଛନ୍ତି । ଗତ ଡିସେମ୍ବର ୪ରେ ସନ୍ଧ୍ୟା ଥିଏଟରରେ ପୁଷ୍ପା-୨ ଫିଲ୍ମ ପ୍ରଦର୍ଶନ ବେଳେ ହଠାତ୍ ଅଲ୍ଲୁ ଅର୍ଜୁନ ସେଠାକୁ ଚାଲିଆସିବାରୁ ଦଳାଚକଟା ହୋଇ ଜଣେ ମହିଳାଙ୍କ ମୃତ୍ୟୁ ଘଟିଥିଲା ।
