ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦିଲ୍ଲୀ ବିଧାନସଭା ନିର୍ବାଚନ ପୂର୍ବରୁ ଆମ୍ ଆଦାମୀ ପାର୍ଟିକୁ ଜୋରଦାର ଟାର୍ଗେଟ କରିଛନ୍ତି । ପିଏମ୍ ମୋଦୀ ଆମ୍ ଆଦମୀ ପାର୍ଟିକୁ 'ଆପଦା' (ବିପର୍ଯ୍ୟୟ) ବୋଲି କହିଛନ୍ତି । ଏହାସହ ଆପ୍ ମୁଖ୍ୟ ଅରବିନ୍ଦ କେଜ୍ରିୱାଲଙ୍କୁ କଟ୍ଟର ବେଇମାନ ବୋଲି କହିଛନ୍ତି । ସେ କହିଛନ୍ତି ଯେ, ଅରବିନ୍ଦ କେଜ୍ରିୱାଲ ମଦ ଦୋକାନରୁ ଆରମ୍ଭ କରି ବରିଷ୍ଠଙ୍କ ଚିକିତ୍ସା ଯାଏ ସବୁଥିରେ ଦୁର୍ନୀତି କରିଛନ୍ତି । ଏପରିକି ପିଲାଙ୍କ ଶିକ୍ଷା ପାଇଁ କେନ୍ଦ୍ର ସରକାରଙ୍କଠାରୁ ଯେଉଁ ଟଙ୍କା ମିଳିଛି, ସେଥିରୁ ଅଧା ବି ଶିକ୍ଷାରେ ଖର୍ଚ୍ଚ କରିନାହାନ୍ତି ।
ଆପ୍ ଉପରେ ପ୍ରଧାନମନ୍ତ୍ରୀ ମୋଦୀ ସଙ୍ଗୀନ ଅଭିଯୋଗ ଆଣିବା ପରେ ଦଳ ମୁଖ୍ୟ ଅରବିନ୍ଦ କେଜ୍ରିଓ୍ବାଲ ପାଲଟା ଜବାବ ମଧ୍ୟ ଦେଇଛନ୍ତି । ଦିଲ୍ଲୀରେ ବିପର୍ଯ୍ୟୟ ଆସିନାହିଁ ବିଜେପିରେ ଆସିଛି ବୋଲି ସେ କହିଛନ୍ତି । ଗତ ୧୦ ବର୍ଷ ମଧ୍ୟରେ କେନ୍ଦ୍ର ସରକାର ଦିଲ୍ଲୀ ପାଇଁ କିଛି କରିନାହାନ୍ତି । କେଜ୍ରିଓ୍ବାଲ କହିଛନ୍ତି, ଦିଲ୍ଲୀ ଲାଗି ବିଜେପି ପାଖରେ କେହି ମୁଖ୍ୟମନ୍ତ୍ରୀ ଚେହେରା ନାହାନ୍ତି । ଅନ୍ୟ ଏକ ବିପଦ ହେଉଛି, ବିଜେପି ପାଖରେ ନିର୍ବାଚନ ଲଢ଼ିବାକୁ କୌଣସି ନେରେଟିଭ୍ ନାହିଁ । ଦିଲ୍ଲୀରେ ଯେଉଁ ଆପ୍ଦା ଆସିଛି ତାହା ଦିଲ୍ଲୀବାସୀଙ୍କ ସୁରକ୍ଷା ପାଇଁ ବୋଲି ସେ କହିଛନ୍ତି ।
ସେହିଭଳି ଆପ୍ ନେତା ସୌରଭ ଭରଦ୍ବାଜ ମଧ୍ୟ ମୋଦୀଙ୍କ ମନ୍ତବ୍ୟ ବିରୋଧରେ ଜବାବ ରଖିଛନ୍ତି । ସେ କହିଛନ୍ତି, ଦିଲ୍ଲୀର ଅଧାରୁ ଅଧିକ ଅଂଶ କେନ୍ଦ୍ର ପାଖରେ ରହିଛି । ସେମାନେ କରିଛନ୍ତି କଣ ? ଦିଲ୍ଲୀର ସ୍ଥିତି ଏବେ ଖରାପ ହୋଇପଡ଼ିଛି ଏବଂ ଏଥିପାଇଁ କେନ୍ଦ୍ରର ବିଜେପି ସରକାର ଦାୟୀ ବୋଲି ସେ ଅଭିଯୋଗ କରିଛନ୍ତି ।
ଆଜି (ଶୁକ୍ରବାର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦିଲ୍ଲୀ ବିଧାନସଭା ନିର୍ବାଚନ ପୂର୍ବରୁ ରାଜଧାନୀ ଦିଲ୍ଲୀକୁ ୪୫୦୦ କୋଟି ଟଙ୍କା ଭେଟି ଦେଇଛନ୍ତି । ଏହି ଅବସରରେ ସେ କେନ୍ଦ୍ରଶାସିତ ପ୍ରଦେଶରେ କ୍ଷମତାରେ ଥିବା ଆମ୍ ଆଦାମୀ ପାର୍ଟି ଉପରେ ଜୋରଦାର ବର୍ଷିଛନ୍ତି । ସେ କହିଛନ୍ତି, ‘ଏମାନେ (ଆପ୍) ଖୋଲାଖାଲି ଦୁର୍ନୀତି କରୁଛନ୍ତି ଏବଂ ପରେ ଏହାର ମହିମାମଣ୍ଡନ ବି କରୁଛନ୍ତି । ଚୋରି ଉପରେ ସିନାଜୋରି । ଦିଲ୍ଲୀବାସୀ ଏବେ ଏହି ଆପ୍-ଦା ବିରୋଧରେ ଲଢେଇ କରିବା ଆରମ୍ଭ କରିଛନ୍ତି । ଦିଲ୍ଲୀର ଭୋଟର, ଦିଲ୍ଲୀକୁ ଆପ୍-ଦା ମୁକ୍ତ କରିବା ପାଇଁ ନିଷ୍ପତ୍ତି ନେଇସାରିଛନ୍ତି ।' ସେପଟେ ମୋଦୀଙ୍କ ଏହି ଆକ୍ରମଣ ପରେ ଆପ୍ ନେତାମାନେ ବିଜେପିକୁ ଟାର୍ଗେଟ କରିବା ଆରମ୍ଭ କରିଛନ୍ତି ।
