ମୁମ୍ବାଇ: ୨୦ ବର୍ଷରୁ ଅଧିକ ସମୟ ଧରି ସେବା ଦେଇଆସିଥିବା ଏସି ବିହୀନ ଡବଲ- ଡେକର ଟ୍ରେନ ବିଦାୟ ନେଇଛି । ଭାରତର ଆର୍ଥିକ ରାଜଧାନୀ ମୁମ୍ବାଇରେ ଆଉ ଦେଖିବାକୁ ମିଳିବନି ଡବଲ୍ ଡେକର ଟ୍ରେନ୍ । ପଶ୍ଚିମ ରେଳର ଏହି ଟ୍ରେନ ୪ ଜାନୁଆରୀରେ ଶେଷ ଯାତ୍ରା କରିଥିଲା । ଏହା ସହିତ ଭାରତୀୟ ରେଳରେ ଡବଲ ଡେକର ଟ୍ରେନର ଯୁଗର ସମାପ୍ତ ହୋଇଛି । ପଶ୍ଚିମ ରେଳବାଇର ଅଧିକାରୀଙ୍କ ଅନୁସାରେ, ଜାନୁଆରୀ ୪, ୨୦୨୫ ପର୍ଯ୍ୟନ୍ତ ନିଜର ନିୟମିତ ସମୟ ଅନୁସାରେ ଏହି ଟ୍ରେନ ସେବା ଦେଇ ଯାତ୍ରା ସମାପ୍ତ କରିଛି।
ଏହି ଟ୍ରେନର ସ୍ଥାନ ନେଇଛି ୨୨ଟି କୋଚ୍ ଥିବା ଏକ ପାରମ୍ପରିକ ଆଇସିଏଫ ଟ୍ରେନ୍ । ଶନିବାର ଶେଷ ଥର ସେବା ଦେଇଥିବା ଡବଲ ଡେକର ଟ୍ରେନର ରିଟାୟାରମେଣ୍ଟ ଦିନ ସମସ୍ତ ରେଳ କର୍ମଚାରୀ ଉପସ୍ଥିତ ଥିଲେ ଓ ଏହି ଟ୍ରେନକୁ ଶେଷ ବିଦାୟ ସମ୍ବର୍ଦ୍ଧନା ଦେଇଥିଲେ । ଜନୈକ ଅଧିକାରୀଙ୍କ ଅନୁସାରେ ନୂଆ ଆଇସିଏଫ ରାକରେ ସିଟିଂ ବ୍ୟବସ୍ଥା ସହିତ ଉପର ବର୍ଥ ସୁବିଧା ମଧ୍ୟ ରହିବ । ଖାସ କଥା ହେଉଛି ଆଇସିଏଫ ରାକ୍ ଡବଲ ଡେକର ଟ୍ରେନ ଭଳି ସମାନ ସୁବିଧା ପ୍ରଦାନ କରିବ ।
ଡବଲ ଡେକର କୋଚ୍ରେ ୧୩୬ ଜଣ ଯାତ୍ରୀଙ୍କ ବସିବା ସୁବିଧା ଥିଲା। ଏହା ସହିତ କରିଡର ଓ ଟ୍ରେନର ଦ୍ବାର ପାଖକୁ ମିଶାଇ ଏଥିରେ ୨୫୦ରୁ ୨୬୦ ଯାତ୍ରୀ ଯାତ୍ରା କରିପାରୁଥିଲେ। ନୂଆ ଆଇସିଏଫ ଜେନେରାଲ କୋଚରେ ବସିବା ପାଇଁ ୧୦୦ ସିଟ୍ ରହିଛି ଉପର ବର୍ଥ ମିସାଇଲେ ଆଉ ୬୦ ଯାତ୍ରୀଙ୍କ ପାଇଁ ସ୍ଥାନ ହୋଇଯାଉଛି । ଏଥିରେ ଛିଡା ହୋଇ ଯାତ୍ରା କରୁଥିବା ଯାତ୍ରୀଙ୍କ ସଂଖ୍ୟା ମିଶାଇଲେ ପାଖାପାଖି ୨୫୦ ଯାତ୍ରୀ ଯାତ୍ରା କରିପାରୁଛନ୍ତି। ଟ୍ରେନରେ ଯେପରି ଯାତ୍ରା କରିବାକୁ ଅସୁବିଧା ନ ହୁଏ ସେଥି ପାଇଁ ରେଳବାଇ ଅତିରିକ୍ତ ୪ଟି କୋଚ୍ ଯୋଡିବାକୁ ଯୋଜନା କରିଛି ।
