ନୂଆଦିଲ୍ଲୀ ୦୫/୦୧: ରିଲାଏନ୍ସର ଜାମନଗର ରିଫାଇନାରୀକୁ ପୁରିଛି ୨୫ ବର୍ଷ । ୧୯୯୯ ମସିହା ୨୮ ଡିସେମ୍ୱରରେ ଆରମ୍ଭ ହୋଇଥିବା ଜାମନଗର ରିଫାଇନାରୀ ୨୫ ବର୍ଷରେ ପଦାର୍ପଣ କରିଛି । ଏହି ଅବସରରେ ଆୟୋଜିତ କାର୍ଯ୍ୟକ୍ରମରେ ରିଲାଏନ୍ସ ଫାଉଣ୍ଡେସନର ଅଧ୍ୟକ୍ଷା ନୀତା ଅମ୍ବାନୀ ଯୋଗଦେଇଥିଲେ । ରିଫାଇନାରୀର ୨୫ ବର୍ଷ ପୂର୍ତ୍ତି ପାଳନ କରିବାକୁ ଏକତ୍ରିତ ହୋଇଥିବା ସମସ୍ତ କର୍ମଚାରୀ ଏବଂ ସେମାନଙ୍କ ପରିବାରବର୍ଗଙ୍କୁ ସମ୍ବୋଧିତ କରିଥିଲେ ନୀତା ଅମ୍ବାନୀ । ଏହାସହ ସେ କହିଥିଲେ, ଯେଉଁମାନଙ୍କ ଭଲପାଇବା, ପରାମର୍ଶ ଏବଂ ତ୍ୟାଗ ଆଜି ଆମକୁ ଏହିଠାରେ ପହଞ୍ଚାଇଛି ସେ ସମସ୍ତ ବରିଷ୍ଠ କର୍ମଚାରୀଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛି ।
ଏହି ଅବସରରେ ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡର ନିର୍ଦ୍ଦେଶକ ଅନନ୍ତ ଅମ୍ବାନୀ ମଧ୍ୟ ଉପସ୍ଥିତ କର୍ମଚାରୀଙ୍କୁ ସମ୍ବୋଧିତ କରିଥିଲେ । କର୍ମଚାରୀଙ୍କୁ ସମ୍ବୋଧିତ କରି ଜାମନଗରକୁ ନେଇ ଥିବା ତାଙ୍କ ବାପାଙ୍କ ସ୍ୱପ୍ନକୁ ପୂରଣ କରିବାକୁ ସେ ପ୍ରତିଜ୍ଞା କରିଥିଲେ । ଜୀବଜନ୍ତୁ ତଥା ପଶୁପକ୍ଷୀଙ୍କ ପାଇଁ କାର୍ଯ୍ୟ କରୁଥିବା ବନତାରା କେତେ ମହତ୍ତ୍ୱପୂର୍ଣ୍ଣ ତା ଉପରେ ମଧ୍ୟ ଅନନ୍ତ ଆଲୋକପାତ କରିଥିଲେ । ଏହାସହ ବନତାରା ପ୍ରତି ଥିବା ତାଙ୍କ ଭଲ ପାଇବାକୁ ମଧ୍ୟ ସେ ପ୍ରତିପାଦିତ କରିଥିଲେ ।
