ପୁରୀ ୦୩/୦୧: ଶୁକ୍ରବାରଠାରୁ ପୁଣି ଆରମ୍ଭ ହେବ ରତ୍ନଭଣ୍ଡାର ମରାମତି । ନୂଆବର୍ଷରେ ମହାପ୍ରଭୁଙ୍କ ଦର୍ଶନ ନିମନ୍ତେ ଶ୍ରଦ୍ଧାଳୁଙ୍କ ଭିଡ଼କୁ ପୂର୍ବାନୁମାନ କରି ରତ୍ନଭଣ୍ଡାର ମରାମତି କାମକୁ ଗତ ମାସ ୨୪ ତାରିଖଠାରୁ ଚଳିତ ମାସ ୨ ତାରିଖ ପର୍ଯ୍ୟନ୍ତ ବନ୍ଦ କରିଥିଲା ଶ୍ରୀମନ୍ଦିର ପ୍ରଶାସନ । ଶ୍ରଦ୍ଧାଳୁଙ୍କ ଭିଡ଼ କମି ଯାଇଥିବାରୁ ୩ ତାରିଖରୁ ପୁନଶ୍ଚ ସରକାରଙ୍କ ଦ୍ୱାରା ଜାରି ଏସ୍ଓପି ମୁତାବକ ଏଏସ୍ଆଇ ରତ୍ନଭଣ୍ଡାର କାମ କରିବ । ଏନେଇ ଗୁରୁବାର ଗଣମାଧ୍ୟମକୁ ସୂଚନା ଦେଇଛନ୍ତି ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ ।
ସେପଟେ ଆସନ୍ତା ୨୦ ତାରିଖ କିମ୍ବା ୨୨ ତାରିଖ ବେଳକୁ ନାଟମଣ୍ଡପରେ ବାହାର କାଠ ପର୍ଯ୍ୟନ୍ତ ନୂଆ ରାମ୍ପ ଓ ଧାଡ଼ି ଦର୍ଶନ ବ୍ୟବସ୍ଥା କରିବାକୁ ପ୍ରଶାସନ ଲକ୍ଷ୍ୟ ରଖିଛି । ଏହି ବ୍ୟବସ୍ଥା କରାଯିବା ଦ୍ୱାରା ନୀତି ବିଳମ୍ବ ହେବା ଅଶଙ୍କା ରହିଛି । ଏହାର ପରୋକ୍ଷ ପ୍ରଭାବ ରତ୍ନଭଣ୍ଡାର ମରାମତି ସମୟ ଉପରେ ପଡ଼ିବା ଓ ନିର୍ଦ୍ଧାରିତ ସମୟ ଆହୁରି ସଙ୍କୁଚିତ ହେବା ଆଶଙ୍କା ମଧ୍ୟ ରହିଛି । ତେଣୁ ଏସବୁକୁ ଲକ୍ଷ୍ୟରେ ରଖି ଯେପରି ରତ୍ନଭଣ୍ଡାର ମରାମତି ଓ ନିର୍ଦ୍ଧାରିତ ନୀତି ନିର୍ଘଣ୍ଟ ପରିଚାଳନା ଉପରେ ନପଡ଼ିବ ସେଥିନିମନ୍ତେ ପ୍ରଶାସନ ଯୋଜନା କରୁଛି । ସୂଚନାଥାଉକି, ପ୍ରତିଦିନ ସାଢ଼େ ୧୨ଟା ସୁଦ୍ଧା ଦ୍ୱିତୀୟ ଭୋଗମଣ୍ଡପ ଶେଷ କରି ଏହା ପରଠାରୁ ସନ୍ଧ୍ୟା ସାଢ଼େ ୫ଟା ପର୍ଯ୍ୟନ୍ତ ଏଏସ୍ଆଇକୁ ମରାମତି କାମ କରିବାକୁ ନୀତି ନିର୍ଘଣ୍ଟ ହୋଇଛି । ଆସନ୍ତା ୩ ମାସ ଭିତରେ ରତ୍ନଭଣ୍ଡାରର ମରାମତି ଓ ସଂରକ୍ଷଣ ସାରିବାକୁ ଏଏସ୍ଆଇ ସମୟ ନେଇଛି ।
