ନୂଆଦିଲ୍ଲୀ: ହରିୟାଣା ବିଧାନସଭା ନିର୍ବାଚନରେ ପରାଜୟ ପରେ କଂଗ୍ରେସ ଏବଂ ଇସିଆଇଙ୍କ ମଧ୍ୟରେ ତୁତୁ ମେଁମେଁ ଲାଗି ରହିଛି। ନିର୍ବାଚନ ପରିଚାଳନାରେ ତ୍ରୁଟି ନେଇ କଂଗ୍ରେସ ବାରମ୍ବାର ଅଭିଯୋଗ କରୁଛି । ସେପଟେ ଏଭଳି ଅଭିଯୋଗକୁ ଖଣ୍ଡନ କରିଆସିଛନ୍ତି ନିର୍ବାଚନ ଆୟୋଗ । କିନ୍ତୁ ଆଜି (ମଙ୍ଗଳବାର) ଏହି ପ୍ରସଙ୍ଗରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କୁ ଇସିଆଇ ୧୬୦୦ ପୃଷ୍ଠାର ଏକ ପତ୍ର ଲେଖି ଜବାବ ଦେଇଛନ୍ତି । ମତଦାନ ଏବଂ ମତଗଣନା ପରି ସମ୍ୱେଦନଶୀଳ ସମୟରେ ଦାୟିତ୍ୱହୀନ ଅଭିଯୋଗ କରିବାଠୁ ଦୂରରେ ରହିବା ପାଇଁ କଂଗ୍ରେସକୁ ନିର୍ବାଚନ ଆୟୋଗ ଅପିଲ୍ କରିଛନ୍ତି ।
ଆୟୋଗ ଚିଠିରେ କହିଛନ୍ତି ଯେ, ଦାୟିତ୍ୱହୀନ ଅଭିଯୋଗ ଦ୍ବାରା ଜନତାଙ୍କ ମଧ୍ୟରେ ଆଶାନ୍ତି ଏବଂ ଅରାଜକତା ବ୍ୟାପିପାରେ । ଆଉ ଅତୀତରେ ଏଭଳି ଘଟଣା ଘଟିଥିବାର ନଜିର ରହିଛି । ନିର୍ବାଚନ ଆୟୋଗ ଏନେଇ ୫ଟି ଘଟଣା ସଂପର୍କେର ଉଲ୍ଲେଖ ମଧ୍ୟ କରିଛନ୍ତି । ପ୍ରତି ନିର୍ବାଚନ ପରେ ଭିତ୍ତିହୀନ ଅଭିଯୋଗ ଏବଂ ଅପ୍ରତ୍ୟାଶିତ ରେଜଲ୍ଟକୁ ନେଇ ଦଳ ଦ୍ୱାରା କରାଯାଉଥିବା ଟିପ୍ପଣୀ ଉପରେ ନିର୍ବାଚନ ଆୟୋଗ କଡ଼ା ଅଭିମୁଖ୍ୟ ଦେଖାଇଛନ୍ତି । ଏହିପରି ଅଭିଯୋଗ ଏବଂ ଟିପ୍ପଣୀ ଉପରେ ଅଙ୍କୁଶ ଲଗାଇବା ପାଇଁ କଂଗ୍ରେସକୁ କହିଛନ୍ତି ନିର୍ବାଚନ ଆୟୋଗ ।
ନିର୍ବାଚନ କମିଶନ କହିଛନ୍ତି ଯେ, ହରିୟାଣା ନିର୍ବାଚନରେ ପ୍ରତ୍ୟେକ ପର୍ଯ୍ୟାୟ ତ୍ରୁଟିହୀନ ଥିଲା । କଂଗ୍ରେସ ପ୍ରାର୍ଥୀ ଏବଂ ଏଜେଣ୍ଟଙ୍କ ନୀରିକ୍ଷଣରେ ଭୋଟିଂ କରାଯାଇଥିଲା । ୨୬ ବିଧାନସଭା କ୍ଷେତ୍ରର ରିଟର୍ଣ୍ଣିଂ ଅଧିକାରୀ ବାରମ୍ୱାର ଯାଞ୍ଚ କରିଛନ୍ତି । ପୂର୍ବରୁ ହରିୟାଣା ମୁଖ୍ୟ ନିର୍ବାଚନ ଅଧିକାରୀ ମଧ୍ୟ କଂଗ୍ରେସର ଅଭିଯୋଗକୁ ଖଣ୍ଡନ କରିସାରିଛନ୍ତି । ହରିୟାଣା ନିର୍ବାଚନରେ କଂଗ୍ରେସ ଇଭିଏମ ଉପରେ ପ୍ରଶ୍ନ ଉଠାଇଥିଲା । କଂଗ୍ରେସ ଅଭିଯୋଗ କରିଥିଲା ଯେ ୯୯ ପ୍ରତିଶତ ବ୍ୟାଟେରି ଥିବା ଇଭିଏମରେ ବିଜେପି ଜିତିଛି । ଏବଂ ୬୦-୭୦ ପ୍ରତିଶତ ବ୍ୟାଟେରି ଥିବା ଇଭିଏମ୍ରେ କଂଗ୍ରେସ ଜିତିଛି । ମେସିନରେ ତ୍ରୁଟି ଏବଂ ଅଧିକାରୀମାନେ ଜାଣିଶୁଣି ମତଗଣନା ପ୍ରକ୍ରିୟାରେ ବିଳମ୍ୱ କରିଥିବା କଂଗ୍ରେସ ଅଭିଯୋଗ କରିଥିଲା ।
ସୂଚନାଯୋଗ୍ୟ, ହରିୟାଣା ବିଧାନସଭା ନିର୍ବାଚନରେ ବିଜେପି ୯୦ରୁ ୪୮ ଆସନରେ ବିଜୟୀ ହୋଇ ସରକାର ଗଢ଼ିଛି । ସେପଟେ କଂଗ୍ରେସ ୩୭ ଆସନ ଜିତିବା ସହ ପୁଣି ଥରେ ବିରୋଧୀ ଆସନରେ ବସିବାକୁ ବାଧ୍ୟ ହୋଇଛି । ଗତ ନିର୍ବାଚନ ପରେ ଆସିଥିବା ଏକଜିଟ୍ ପୋଲ୍ରେ କଂଗ୍ରେସ ପ୍ରଚଣ୍ଡ ବହୁମତ ସହ ଶାସନକୁ ଫେରିବ ବୋଲି ଜଣାପଡ଼ିଥିଲା । କିନ୍ତୁ ଫଳାଫଳ ଆସିବା ପରେ ଚିତ୍ର ବିଲକୁଲ ଭିନ୍ନ ଥିଲା । ଏହା ପରଠାରୁ ଇଭିଏମ୍ରେ ତ୍ରୁଟି ଏବଂ ନିର୍ବାଚନ ପରିଚାଳନାରେ ଅନିୟମିତତା ହୋଇଥିବା ନେଇ ଅଭିଯୋଗ କରିଆସିଛି କଂଗ୍ରେସ ।
