ପୁରୀ,୨୧/୦୬: ସ୍ନାନଯାତ୍ରା ଦିନ ସ୍ନାନ ମଣ୍ଡପରେ ଶ୍ରୀବିଗ୍ରହମାନେ ବସିବା ପରେ ସେମାନଙ୍କ ଶ୍ରୀଭୁଜ ଭିତରେ କିମ୍ବା କୌଣସି ଅଙ୍ଗରେ କୌଣସି ସେବକ ଭରାଦେଇ ଛିଡ଼ା ହେବେ ନାହିଁ । ଠାକୁରଙ୍କ ଶ୍ରୀଭୁଜ ବାହାରେ ଦୁଇପାଶ୍ୱର୍ରେ ଦଇତାପତି ସେବକମାନେ ରହିପାରିବେ । ଏନେଇ ଶ୍ରୀମନ୍ଦିର ପରିଚାଳନା କମିଟି ବ୍ୟବସ୍ଥାବଳୀରେ ନିୟମ କରିଛି । ନିୟମ ଉଲ୍ଲଂଘନ କଲେ କାର୍ଯ୍ୟାନୁଷ୍ଠାନ ଚେତାବନୀ ମଧ୍ୟ ଦିଆଯାଇଛି । ବ୍ୟବସ୍ଥାବଳୀ ମୁତାବକ, ସ୍ନାନଯାତ୍ରା ଦିନ ମହାପ୍ରଭୁଙ୍କ ଦେଖିବାରେ ଦର୍ଶନାର୍ଥୀ ଅସୁବିଧା ଭୋଗିବେନି । ଶ୍ରୀମନ୍ଦିର ପ୍ରଶାସନ ଏଥିନିମନ୍ତେ ପ୍ରସ୍ତୁତ କରିଥିବା ବ୍ୟବସ୍ଥାବଳୀକୁ ପରିଚାଳନା କମିଟିରେ ଅନୁମୋଦନ ମିଳିଛି ।
ଆଉ ଦିନକ ପରେ ଅର୍ଥାତ୍ ୨୨ ତାରିଖରେ ସ୍ନାନ ପୂର୍ଣ୍ଣିମା । ଏହିଦିନ ମହାପ୍ରଭୁ ଶ୍ରୀଜଗନ୍ନାଥ, ଶ୍ରୀବଳଭଦ୍ର, ଦେବୀ ସୁଭଦ୍ରା ଓ ସୁଦର୍ଶନ ପହଣ୍ଡି ହୋଇ ସ୍ନାନ ମଣ୍ଡପକୁ ଆସିବା ପରେ ୧୦୮ ଗରା ଜଳରେ ସ୍ନାନ କରିବେ । ପରେ ଦୁର୍ଲଭ ହାତୀ ବେଶରେ ଦର୍ଶନ ଦେବେ । ପହଣ୍ଡିଠାରୁ ଆରମ୍ଭ କରି ହାତୀବେଶ ପର୍ଯ୍ୟନ୍ତ ମହାପ୍ରଭୁଙ୍କ ଶ୍ରୀଅଙ୍ଗ ସୁରକ୍ଷା, ମହାପ୍ରଭୁଙ୍କ ଆଗରେ ଅଶୋଭନୀୟ ଅଚରଣକୁ ବନ୍ଦ କରିବା ଓ ଶ୍ରଦ୍ଧାଳୁଙ୍କୁ ସ୍ନାନ ଯାତ୍ରାର ନିର୍ବିଘ୍ନ ଦିବ୍ୟ ଦର୍ଶନ ପ୍ରଦାନ ନିମନ୍ତେ ଏହି ବ୍ୟବସ୍ଥାବଳୀ ପ୍ରସ୍ତୁତ ହୋଇଛି ।
ସ୍ନାନ ପୂର୍ଣ୍ଣିମା ଦିନ ମଙ୍ଗଳାର୍ପଣ ସମୟରେ କେବଳ ନୀତି ସମ୍ପୃକ୍ତ ସେବକ, ପରିଚାଳନା କମିଟି ସଦସ୍ୟ ଓ ଅଧିକାରୀମାନେ ଭିତର କାଠ ପାଖରେ ଉପସ୍ଥିତ ରହିବେ । ଜଗମୋହନ କିମ୍ବା ନାଟମଣ୍ଡପ ପରେ କୌଣସି ମାନ୍ୟଗଣ୍ୟ ବ୍ୟକ୍ତି କିମ୍ବା ଦର୍ଶନାର୍ଥୀ ରହିବା ସମ୍ପୂର୍ଣ୍ଣ ନିଷେଧ କରାଯାଇଛି । ସ୍ନାନ ଯାତ୍ରା ଦିନ ସାତପାହାଚ ଉପରେ ଶ୍ରୀଜିଉଙ୍କ ମସ୍ତକରେ ମଣ୍ଡିତ ଟାହିଆଗୁଡ଼ିକର ସୁରକ୍ଷା ଦଇତାପତି ସେବକମାନେ ସ୍ୱତନ୍ତ୍ର ଧ୍ୟାନ ଦେଇ କରିବେ । ଶ୍ରୀଜିଉମାନେ ସ୍ନାନବେଦିକୁ ସମ୍ପୂର୍ଣ୍ଣ ଉଠିବା ପରେ ଟାହିଆଗୁଡ଼ିକ ସମ୍ମାନର ସହ ଖୋଲାଯିବ । ଶ୍ରୀଜିଉମାନେ ଧାଡ଼ି ପହଣ୍ଡିରେ ଆସିବା ବେଳେ କର୍ଡନ ଭିତରେ ଦଇତାପତିଙ୍କ ସହ କେବଳ ପ୍ରାଧିକୃତ ପହଣ୍ଡି ବିଜେ ସମ୍ପୃକ୍ତ ସେବକ ରହିବେ । ପହଣ୍ଡି ବିଜେ ସମୟରେ ଶ୍ରୀମନ୍ଦିର ପରିସରରେ କୌଣସି ପ୍ରକାର ନୃତ୍ୟ ପ୍ରଦର୍ଶନ ନିଷିଦ୍ଧ କରାଯାଇଛି ।
ସ୍ନାନ ପୂର୍ଣ୍ଣିମା ପହଣ୍ଡି ଦର୍ଶନ ଟିକେଟ ବିକ୍ରି କରାଯିବ । ଏହାର ମୂଲ୍ୟ ୧୦୦ ଟଙ୍କା ଧାର୍ଯ୍ୟ କରାଯାଇଛି । ପହଣ୍ଡି ଦର୍ଶନ ପାଇଁ ସର୍ବାଧିକ ୭ ହଜାର ପହଣ୍ଡି ଟିକେଟ ବିକ୍ରି କରାଯିବ । ସ୍ଥିତିକୁ ଦେଖି କେତେ ଟିକେଟ ବିକ୍ରୟ କରାଯିବ ତାହା ଉପରେ ଏସ୍ପି ପଦକ୍ଷେପ ନେବେ । ସର୍ବସାଧାରଣଙ୍କ ପାଇଁ ବଡ଼ଦାଣ୍ଡସ୍ଥିତ ନୀଳାଦ୍ରି ଭକ୍ତ ନିବାସରେ ପହଣ୍ଡି ଦର୍ଶନ ଟିକେଟ ବିକ୍ରୟ କରାଯିବ ।
ଶ୍ରୀଜିଉଙ୍କ ପହଣ୍ଡି ବିଜେ ସମୟରେ ଦର୍ଶନାର୍ଥୀମାନେ ଯେପରି ଶ୍ରୀଜିଉମାନଙ୍କୁ ସ୍ପର୍ଶ କରିନପାରନ୍ତି କିମ୍ବା କୌଣସି ପ୍ରକାର ବାଧା ସୃଷ୍ଟି ନକରନ୍ତି, ସେଥିପ୍ରତି ଦଇତାପତି ଓ ପ୍ରତିହାରୀ ଓ ପୁଲିସ ବିଶେଷ ଦୃଷ୍ଟି ଦେବେ । ସ୍ନାନ ମଣ୍ଡପ ପ୍ରବେଶ ପଥ ପାହାଚର ଡାହାଣ ପାଶ୍ୱର୍ରେ ଥିବା ପିଣ୍ଡି ଉପରେ କୌଣସି ବ୍ୟକ୍ତି ଠିଆ ହୋଇପାରିବେ ନାହିଁ କିମ୍ବା ନୃତ୍ୟ ପ୍ରଦର୍ଶନ କରିବେ ନାହିଁ । ପହଣ୍ଡି ସମୟରେ ସୀମିତ ସଂଖ୍ୟକ ଘଣ୍ଟୁଆଙ୍କୁ ସ୍ନାନ ମଣ୍ଡପ ଉପରକୁ ଛଡ଼ାଯିବ । ଅନ୍ୟ ଘଣ୍ଟୁଆମାନେ ସ୍ନାନ ମଣ୍ଡପ ପାହାଚ ତଳେ ଘଣ୍ଟ ବଜାଇବେ । ପହଣ୍ଡି ସରିବା ପରେ ଅପ୍ରାଧିକୃତ ବ୍ୟକ୍ତିମାନଙ୍କୁ ସ୍ନାନ ମଣ୍ଡପ ତଳକୁ ଓହ୍ଲାଇ ଦିଆଯିବ । ସ୍ନାନ ମଣ୍ଡପରେ ଠାକୁରଙ୍କ ରୁନ୍ଧା ବଢ଼ିବା ପରେ ମଧ୍ୟ ଠାକୁରଙ୍କ ସମ୍ମୁଖ ଭାଗରେ ସେବକମାନେ ରହିବେ ନାହିଁ ।
ସେହିପରି ଜଳ ବିଜେ ଓ ସ୍ନାନ ବେଳେ ମଧ୍ୟ ନିର୍ଦ୍ଧାରିତ ସେବକ ସ୍ନାନ ମଣ୍ଡପରେ ଉପସ୍ଥିତ ରହିବେ । ବ୍ୟବସ୍ଥାବଳୀକୁ ଉଲ୍ଲଂଘନ କଲେ ଶ୍ରୀମନ୍ଦିର ପ୍ରଶାସନ କାର୍ଯ୍ୟାନୁଷ୍ଠାନ ନେବା ପାଇଁ ଚେତାବନୀ ଦେଇଛି । ବ୍ୟବସ୍ଥାବଳୀକୁ କେତେଦୂର ପାଳନ କରାଯାଉଛି ଓ ଉଲ୍ଲଂଘନକାରୀଙ୍କ ବିରୋଧରେ ଶ୍ରୀମନ୍ଦିର ପ୍ରଶାସନ କି କାର୍ଯ୍ୟାନୁଷ୍ଠାନ ନେଉଛି ଦେଖିବାର କଥା । କାରଣ ଅତୀତରେ ପ୍ରଶାସନ ନିୟମ ଉଲ୍ଲଂଘନ କ୍ଷେତ୍ରରେ କୌଣସି ଠୋସ୍ ପଦକ୍ଷେପ ନେଇନି ।
