ନରସିଂହପୁର,୧୧।୯ : ଦେଓଝର ଜଳପ୍ରପାତରେ ବୁଡ଼ି  ମଙ୍ଗଳବାର ଜଣେ ପର୍ଯ୍ୟଟକ ନିଖୋଜ ହୋଇଥିଲେ।  ଏହି ଘଟଣାକୁ ୨୪ ଘଣ୍ଟା ବିତିଯାଇଥିଲେ ମଧ୍ୟ ଏ ପର୍ଯ୍ୟନ୍ତ ପର୍ଯ୍ୟଟକଙ୍କ କୌଣସି ସନ୍ଧାନ ମିଳିନି।  ଅଗ୍ନିଶମ ବାହିନୀ ଜଳପ୍ରପାତରେ ଖୋଜାଖୋଜି  ଜାରି ରଖିଛନ୍ତି। 

ମଙ୍ଗଳବାର ଭୁବନେଶ୍ୱର ଅଞ୍ଚଳର ଆୟୁଷ ସ୍ୱାଇଁ (୧୫)  ଦେଓଝର ବୁଲିବାକୁ ଆସିଥିଲେ।  ଝରଣାରେ ଗାଧୋଉଥିବା ବେଳେ ବୁଡି  ଯାଇ ନିଖୋଜ ହୋଇଥିଲେ।   ଖବର ପାଇ  କାନପୁର ପୋଲିସ ଓ ବାଲିଝରୀ ଅଗ୍ନିଶମ ବିଭାଗ କର୍ମଚାରୀ ପହଞ୍ଚିଥିଲେ। ଅଗ୍ନିଶମ ବାହିନୀ ଝରଣାରେ  ବହୁ ଖୋଜାଖୋଜି କରିଥିଲେ ମଧ୍ୟ ଆୟୁଷର କୌଣସି ସନ୍ଧାନ ମିଳିନଥିଲା।  ସଂଧ୍ୟା ହୋଇଯିବାରୁ  ଅଗ୍ନିଶମ ବାହିନୀ ଉଦ୍ଧାର କାର୍ଯ୍ୟ ବନ୍ଦ ରଖି  ଫେରି ଆସିଥିଲେ ।  ବୁଧବାର ସକାଳୁ ପୁଣିଥରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା  । କାନପୁର ପୋଲିସ, କଟକ ଫାୟାର ଇମର୍ଜେନ୍ସି ଓ ବାଲିଝରୀ ଅଗ୍ନିଶମ ବିଭାଗ ପକ୍ଷରୁ ପାଣିରେ ବୁଡିକି କ୍ୟାମେରା ପକାଇ ବହୁ ଖୋଜା କରିଥିଲେ ମଧ୍ୟ ପର୍ଯ୍ୟନ୍ତ କୌଣସି ସନ୍ଧାନ ମିଳିନି। ଅଗ୍ନିଶମ ବାହିନୀ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି।