ସାଲେପୁର,୧୧/୦୯: ଜନଶୁଣାଣୀ ଶିବିରରେ ଯୋଗ ଦେବାକୁ ଯାଇ ସାଲେପୁର ସରକାରୀ ଉଚ୍ଚବିଦ୍ୟାଳୟରେ ଛାତ୍ରଛାତ୍ରୀଙ୍କୁ ପାଠ ପଢାଇଲେ କଟକ ଜିଲ୍ଲାପାଳ । ଏଥି ସହିତ ନିଜ ପିଲା ଦିନର ସ୍କୁଲ ଅନୁଭୂତିକୁ ବର୍ଣନା କରିଥିଲେ । ସାଲେପୁର ସରକାରୀ ଉଚ୍ଚ ବିଦ୍ୟାଳୟରେ ଏଭଳି ଦୃଶ୍ୟ ଦେଖିବାକୁ ମିଳିଛି ।

ସୂଚନା ମୁତାବକ, ସାଲେପୁର ପଞ୍ଚାୟତ ସମିତି ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଥିଲା ଜନଶୁଣାଣୀ ଶିବିର । ଏହି ଶିବିରରେ ଯୋଗ ଦେଇଥିଲେ କଟକ ଜିଲ୍ଲାପାଳ ଦତ୍ତତ୍ରେୟ ଭାଉ ସାହେବ ସିନ୍ଧେ । ଶିବିର ଶେଷ ହେବା ପରେ ଅଚାନକ ସାଲେପୁର ସରକାରୀ ଉଚ୍ଚ ବିଦ୍ୟାଳୟରେ ପହ‌ଞ୍ଚି ଥିଲେ । ସେଠାରେ ପହଞ୍ଚି ଦଶମ ଶ୍ରେଣୀକୁ ଯାଇ ପିଲାମାନଙ୍କୁ କିଛି ସମୟ ପାଇଁ ପାଠ ପଢ଼ାଇବା ସହିତ ଶିକ୍ଷା ସମ୍ବନ୍ଧୀୟ ସମସ୍ୟା ବିଷୟରେ ମଧ୍ୟ ପଚାରି ବୁଝିଥିଲେ । ପରେ ନିଜେ ପିଲାଦିନେ କିପରି ସ୍କୁଲରେ ପାଠ ପଢୁଥିଲେ, ସେ ଅନୁଭୂତି ମଧ୍ୟ ବର୍ଣ୍ଣନା କରିଥିଲେ । ଜିଲ୍ଲାପାଳ ପାଠ ପଢ଼ାଉଥିବା ସମୟରେ କଟକ ଜିଲ୍ଲା ଶିକ୍ଷାଧିକାରୀ ଡଃ ସନ୍ତୋଷ କୁମାର ରାଉତ, ସାଲେପୁର ବିଡିଓ ଖଗେଶ୍ୱର ପାତ୍ର, ପ୍ରଧାନ ଶିକ୍ଷକ ମନୋରଞ୍ଜନ ବାରିକ, ଶିକ୍ଷୟିତ୍ରୀ ବନ୍ଦନା ଜେନା ପ୍ରମୁଖ ଉପସ୍ଥିତ ଥିଲେ।

ଏହା ସହ ବିଦ୍ୟାଳୟରେ ଥିବା ବିଜ୍ଞାନ ଲାବୋରେଟୋରୀ ବୁଲି ଦେଖିବା ସହିତ ବିଦ୍ୟାଳୟ ପରିସର ମଧ୍ୟ ବୁଲିଥିଲେ ଜିଲ୍ଲାପାଳ । ବିଦ୍ୟାଳୟ ପରିସରକୁ ସଫାସୁତରା ରଖିବା ସହତ ପ୍ଲାଷ୍ଟିକମୁକ୍ତ ରଖିବା ନିମନ୍ତେ ପ୍ରଧାନଶିକ୍ଷକଙ୍କୁ ନିର୍ଦ୍ଦେଶ ଦେଇଥିଲେ ।