ଭୁବନ,୨୪/୦୮: ଘରୁ ମିଳିଲା ଶିକ୍ଷକଙ୍କ ମୃତଦେହ । ମୃତକ ଜଣକ ହେଉଛନ୍ତି ମାନସ ରଞ୍ଜନ ପାଲ (୩୨ ବର୍ଷ) ।  ଭୁବନ ବିଜ୍ଞାପିତ ଅଞ୍ଚଳ ପରିଷଦର ଲତାବିଲ ସାହିରେ ଏଭଳି ଦୁଃଖଦ ଘଟଣା ଦେଖିବାକୁ ମିଳିଛି । ଯୁବ ଶିକ୍ଷକଙ୍କ ମୃତ୍ୟୁ ଖବର ପାଇ ଲତାବିଲ ସାହିରେ ଶୋକାକୁଳ ପରିବେଶ ସୃଷ୍ଟି ହୋଇଛି । 

ସୂଚନା ମୁତାବକ, ମାନସ ରଞ୍ଜନ ପାଲ ଏବଂ ତାଙ୍କ ସ୍ତ୍ରୀ ସରକାରୀ ଶିକ୍ଷକ ଭାବେ କାର୍ଯ୍ୟରତ। ସ୍ୱାମୀ-ସ୍ତ୍ରୀ ତାଙ୍କର ତିନି ବର୍ଷର ଝିଅକୁ ନେଇ ଢେଙ୍କାନାଳରେ ଏକ ଭଡା ଘରେ ରହୁଥିଲେ । ତେବେ ମାନସ ପ୍ରତି ଶୁକ୍ରବାର ନିଜ ଘର ଲତାବିଲକୁ ଆସି ବାପାମାଆଙ୍କ କଥା ବୁଝି ଶନିବାର ଢେଙ୍କାନାଳ ଫେରି ଯାଆନ୍ତି । କିନ୍ତୁ ସବୁଥର ପରି ଶୁକ୍ରବାର ଆସି ଆଉ ଫେରି ପାରି ନଥିଲେ । ତେବେ ଶନିବାର ସକାଳୁ ଘର ଭିତରୁ ମାନସଙ୍କ ମୃତ ଦେହ ଉଦ୍ଧାର ହୋଇଛି । ପରିବାର ଲୋକେ ମାନସଙ୍କୁ ଉଦ୍ଧାର କରି ଭୁବନ ମେଡିକାଲରେ ଭର୍ତ୍ତି କରାଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏନେଇ ପରିବାର ଲୋକେ ଭୁବନ ପୋଲିସକୁ ଖବର ଦେଇଥିଲେ । ଖବର ପାଇ ଭୁବନ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏଥି ସହିତ ତଦନ୍ତ ଆରମ୍ଭ କରି ମୃତ୍ୟୁର କାରଣ ଖୋଜୁଛି ପୋଲିସ।