ଢ଼େଙ୍କାନାଳ, ୧୦/୦୯ : ଢେଙ୍କାନାଳ ସଦର ଥାନା ଅନ୍ତର୍ଗତ ଭାପୁର ଫାଣ୍ଡି ଅଞ୍ଚଳରେ ଅସହାୟ ଯୁବତୀଙ୍କୁ ଗଣଦୁଷ୍କର୍ମ ଘଟଣା। ଗିରଫ ହୋଇଥିବା ୪ ଅଭିଯୁକ୍ତଙ୍କ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଡାକ୍ତରୀ ମାଇନା ସହ ଡିଏନଏ ଟେଷ୍ଟ ପାଇଁ ନମୁନା ସଂଗ୍ରହ କରାଯାଇଛି। ଯୁବତୀ ୭ମାସର ଗର୍ଭବତୀ ଥିବାରୁ ତାଙ୍କ ଅଭିଯୋଗକୁ ଆଧାର କରି ଅଭିଯୁକ୍ତମାନଙ୍କ DNA ଟେଷ୍ଟ କରାଯିବ। ଅପର ପକ୍ଷରେ ଅଭିଯୁକ୍ତଙ୍କୁ କୋର୍ଟ ଚାଲାଣ ପରେ ଜାମିନ ନାମଞ୍ଜୁର ହୋଇଛି। ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।ପୀଡ଼ିତା ଏହି ଘଟଣାରେ ପୁଲିସର ଏକ ସ୍ୱତନ୍ତ୍ର ଟିମ୍ ଅନ୍ୟ ଦୁଇ ଅଭିଯୁକ୍ତଙ୍କୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଛାନଭିନ୍ ଚଳାଇଛି।

ଢେଙ୍କାନାଳ ଜିଲ୍ଲା ସଦର ଥାନା ଭାପୁର ଫାଣ୍ଡି ଅଞ୍ଚଳର ଗଣବଳାତ୍କାର ଘଟଣା ସାରା ରାଜ୍ୟରେ ଆଲୋଡ଼ନ ସୃଷ୍ଟି କରିଛି। ପୀଡ଼ିତା ଓ ତାଙ୍କ ବାପା ରହୁଥିବା ଗାଁର ମହିଳା ସମିତି ଗୃହରେ ସାଇଣ୍ଟିଫିକ୍‌ ଟିମ୍‌ ସହ ପୁଲିସ୍‌ ତଥ୍ୟ ପ୍ରମାଣ ସଂଗ୍ରହ କରିଛି। ରବିବାର ପୁଲିସ୍‌ ସମ୍ପୃକ୍ତ କୋଠରୀକୁ ସିଲ୍‌ କରିଥିଲା । ସୋମବାର ପୂର୍ବାହ୍ଣ ପ୍ରାୟ ୧୧ଟାରେ ସାଇଣ୍ଟିଫିକ୍‌ ଟିମ୍‌ ପହଞ୍ଚି ଘଟଣାସ୍ଥଳରୁ ବିଭିନ୍ନ ନମୁନା ସଂଗ୍ରହ କରିଥିଲା । ପୀଡ଼ିତାଙ୍କ ପୋଷାକ ଓ ଅନ୍ୟାନ୍ୟ ସାମଗ୍ରୀ ଜବତ  କରିବା ସହ ବଳାତ୍କାର ସ୍ଥଳ ଛାତ ଉପରକୁ ଯାଇ ତଦନ୍ତ କରିଥିଲା। ମାମଲାରେ ୭ ଅଭିଯୁକ୍ତଙ୍କ ମଧ୍ୟରୁ ସୋମବାର ପୁଲିସ୍‌ ୪ଜଣଙ୍କୁ ଗିରଫ କରିଛି। ଅନ୍ୟ ଦୁଇ ଜଣ ଫେରାର୍ ଅଛନ୍ତି। ଗିରଫ ଅଭିଯୁକ୍ତମାନେ ହେଲେ ପୀଡ଼ିତାଙ୍କ ଗାଁର ସୋମନାଥ ପରିଡ଼ା (୨୭), ବିରଞ୍ଚି ମହାରଣା(୩୨), ବାବୁଲି ନାଏକ (୪୦) ଓ ଅବିନାଶ ପରିଡ଼ା (୨୪) । ସେପଟେ ଅନ୍ୟ ଜଣେ ଅଭିଯୁକ୍ତଙ୍କ କିଛି ମାସ ତଳେ ମୃତ୍ୟୁ ହୋଇଥିବା ଜଣାପଡ଼ିଛି।

ପ୍ରକାଶ ଥାଉକି, ପୀଡ଼ିତା ଯୁବତୀଙ୍କ ବାପା ଘରଜ୍ୱାଇଁ ଭାବେ ଶ୍ୱଶୁର ଘରେ ରହୁଥିଲେ। ମା’ଙ୍କ ମୃତ୍ୟୁ ପରେ ବାପା ମାନସିକ ବିକାରଗ୍ରସ୍ତ ହୋଇପଡ଼ିଥିଲେ । ରକ୍ଷଣାବେକ୍ଷଣ  ଅଭାବରୁ ଘରଦ୍ୱାର ଭାଙ୍ଗି ଯାଇଥିବା ବେଳେ ବାପା, ଝିଅ ଗାଁରେ ଥିବା ମହିଳା ସମିତି ଗୃହର ଶିଡ଼ି ତଳେ ରହୁଥିଲେ । ଗାଁର ୭ ଜଣ ଯୁବକ ରାତିରେ ଯୁବତୀଙ୍କୁ ଛାତ ଉପରକୁ ଉଠାଇ ନେଇ ଗଣବଳାତ୍କାର କରୁଥିଲେ । ଗତ ୭ ତାରିଖରେ ଏନେଇ ପ୍ରଥମେ ‘ପ୍ରମେୟ’ରେ ଖବର ପ୍ରକାଶ ପରେ ରାଜ୍ୟରେ ଆଲୋଡ଼ନ ସୃଷ୍ଟି ହୋଇଥିଲା । ରବିବାର ଉପମୁଖ୍ୟମନ୍ତ୍ରୀ ପ୍ରଭାତି ପରିଡ଼ା ମଧ୍ୟ ସାମାଜିକ ଗଣମାଧ୍ୟମ ଏକ୍ସରେ ଦୁଃଖ ପ୍ରକାଶ କରିବା ସହ ପୀଡ଼ିତାଙ୍କୁ ନ୍ୟାୟ ପ୍ରଦାନ କରିବାକୁ ଏସ୍‌ପିଙ୍କୁ ନିର୍ଦ୍ଦେଶ ଦେଇଥିବା ଉଲ୍ଲେଖ କରିଥିଲେ।