ରାଇଘର, ୧୫/୬ : ସରକାରୀ ଜାଗାକୁ ନେଇ ଗୋଷ୍ଠି ସଂଘର୍ଷ। ପ୍ରାୟ ଏକ ବର୍ଷ ଧରି ଜମିଜମାକୁ କେନ୍ଦ୍ରକରି ଦୁଇଗୋଷ୍ଠୀ ମଧ୍ୟରେ ସଂଘର୍ଷ ଲାଗି ରହିଥିବା ବେଳେ ସ୍ଥାନୀୟ ପୁଲିସ ଏବଂ ରାଜସ୍ୱ ବିଭାଗ ପକ୍ଷରୁ ବାରମ୍ବାର ସମାଧାନ କରିବାକୁ ଯାଇ ଫେଲ୍ ମାରିଥିବା ବେଳେ ଏହିି ଘଟଣାର ପୁନରାବୃତ୍ତି ହୋଇଛି। ସେହି ଘଟଣାରେ ପୁଣି ଥରେ ଉଭୟ ଦଳ ପକ୍ଷରୁ ରକ୍ତାକ୍ତ ସଂଘର୍ଷ ହୋଇ ପ୍ରାୟ ୧୧ ଜଣ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ କିଛି ଗୁରୁତର ଅବସ୍ଥାରେ ରାଇଘର ଓ ଉମରକୋଟ ମେଡିକାଲରେ ଭର୍ତି ହୋଇଥିବା ଜଣାପଡିଛି।
ସୂଚନା ଅନୁଯାୟୀ, ନବରଙ୍ଗପୁର ଜିଲ୍ଲାର ରାଇଘର ବ୍ଲକ ହାତୀବେନା ଡିଏନକେ ଗ୍ରାମରେ ପ୍ରାୟ ଏକ ବର୍ଷ ଧରି ଏକ ସରକାରୀ ଜମିରେ ବସବାସ କରୁଥିବା ଏକ ଗୋଷ୍ଠୀ ସହିତ କିଛି ଗ୍ରାମବାସୀଙ୍କ ମଧ୍ୟରେ ଗଣ୍ଡଗୋଳ ଆରମ୍ଭ ହୋଇଥିଲା। ଦୀର୍ଘ ବର୍ଷ ଧରି ସେଠାରେ ବସବାସ କରୁଥିବା ପରିବାର ଲୋକଙ୍କୁ ହଟାଇବାକୁ ଯାଇ ଏହି ବିବାଦ ଚାଲିଥିବା ବେଳେ ଦୁଇ ଗୋଷ୍ଠି ପକ୍ଷରୁ ସେହି ସମୟରେ ରାଇଘର ଥାନାର ଦ୍ୱାରସ୍ଥ ହୋଇଥିଲେ। ଏଥି ସହିତ ଘଟଣାର ସମାଧାନ ନିମନ୍ତେ ଜିଲ୍ଲା ପ୍ରଶାସନ, ରାଇଘର ତହସିଲଦାର ଓ ପୁଲିସ ପ୍ରଶାସନ ମଧ୍ୟ ହାତୀବେନା (ଡିଏନକେ) ଗ୍ରାମକୁ ଯାଇ ଉଭୟ ପକ୍ଷକୁ ବୁଝାସୁଝା କରିଥିଲେ। ତଥାପି କୌଣସି ସମାଧାନର ବାଟ ଫିଟିନଥିଲା। ଗତକାଲି ପୁଣି ଏହି ଗଣ୍ଡଗୋଳ ଉଗ୍ରରୂପ ଧାରଣ କରିଛି। ଉଭୟଦଳ ପକ୍ଷରୁ ରକ୍ତାକ୍ତ ସଂଘର୍ଷ ହୋଇ ରାଇଘର ମେଡିକାଲରେ ଭର୍ତି ହୋଇଥିବା ବେଳେ ମେଡିକାଲ ଭିତରେ ମଧ୍ୟ ପୋଲିସ ସମ୍ମୁଖରେ ଉଭୟ ଗୋଷ୍ଠି ମାରପିଟ ହୋଇଥିଲେ। କିଛି ଗୁରୁତରଙ୍କୁ ଉମରକୋଟ ମେଡିକାଲ ସ୍ଥାନାନ୍ତର କରାଯାଇଥିବା ବେଳେ ଘଟଣାସ୍ଥଳରେ ପୋଲିସ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରୁଥିବା ଦେଖିବାକୁ ମିଳିଛି।