ପ୍ୟାରିସ୍,୨୭।୭:  ଚୀନ୍‌ ଖାତାରେ ପଡିଲା ୨୦୨୪ ପ୍ୟାରିସ୍ ଅଲମ୍ପିକର ପ୍ରଥମ ସ୍ବର୍ଣ୍ଣ ପଦକ । ୧୦ ମିଟର ଏୟାର ରାଇଫଲ୍‌ ମିକ୍ସଡ୍‌ ଟିମ୍ ଇଭେଣ୍ଟର ଗୋଲ୍ଡ ମେଡାଲ ମୁକାବିଲାରେ ଚୀନ୍ ସାଉଥ୍ କୋରିଆକୁ ୧୬-୧୨ ରେ ହରାଇଛି। ହୁଆଙ୍ଗ ୟୁଟିଂ ଓ ଶେଙ୍ଗ ଲିହାଓ ଏହି ସ୍ବର୍ଣ୍ଣ ପଦକ ଜିତିଛନ୍ତି। ଏହା ସହିତ ଚୀନ୍ ପ୍ୟାରିସ୍ ଅଲିମ୍ପିକ୍‌ର ପୋଡିୟମ୍‌ରେ ପହଁଞ୍ଚିଥିବା ପ୍ରଥମ ଦେଶ ଭାବେ ଯୋଗ୍ୟତା  ଅର୍ଜନ କରିଛି।

ଅଲମ୍ପିକରେ ଶନିବାର ହୋଇଥିବା ସ୍ବର୍ଣ୍ଣ ପଦକ ମ୍ୟାଚ୍‌ରେ ଚୀନ୍ ଯୋଡି କୋରିଆ ଗଣରାଜ୍ୟର କେୟୁମ୍ ଜିହ-ୟୋନ୍-ପାର୍କ ହା-ଜୁନ୍‌ଙ୍କୁ ଚଟୋରକ୍ସ ସୁଟିଂ ସେଣ୍ଟରରେ ୧୬-୧୨ରେ ହରାଇଛନ୍ତି। ଚୀନ୍ ଓ କୋରିଆ ଏହା ପୂର୍ବରୁ ପ୍ରଥମ କ୍ବାଲିଫିକେଶନ୍ ରାଉଣ୍ଡରେ ମଧ୍ୟ ପ୍ରଥମ ଓ ଦ୍ବିତୀୟ ସ୍ଥାନ ହାସଲ କରିଥିଲେ।

ସେଭଳି ବ୍ରୋଞ୍ଜ ପଦକ ମ୍ୟାଚ୍‌ରେ କାଜାଖସ୍ତାନ ୧୭-୫ରେ ଜର୍ମାନୀକୁ ହରାଇଛି। କାଜାଖସ୍ତାନ ଶୁଟର ଆଲେକ୍ସଣ୍ଡ୍ରା ଲେ ଓ ଇସଲାମ ସତପେଭ ବ୍ରୋଞ୍ଜ ପଦକ ଜିତିଛନ୍ତି। ବ୍ରୋଞ୍ଜ ପଦକ ଲଢ଼େଇ ପରେ ସ୍ୱର୍ଣ୍ଣ ପଦକ ପାଇଁ ପ୍ରତିଯୋଗିତା ଆରମ୍ଭ ହୋଇଥିଲା। ଏଥିରେ ଚାଇନା ଖେଳାଳି ୧୬-୧୨ରେ କୋରିଆକୁ ପରାସ୍ତ କରିଛନ୍ତି।