ନାରାୟଣପୁର,୨୩।୫: ଛତିଶଗଡରେ ପୁଣିଥରେ ମାଓବାଦୀ ଓ ଯବାନଙ୍କ ଭିତରେ ସଂଘର୍ଷ। ନକ୍ସଲ ପ୍ରଭାବିତ ଅଞ୍ଚଳ ନାରାୟଣପୁର, ବିଜାପୁର ଓ ଦନ୍ତେଓ୍ବାଡାର ସୀମାରେ ଯବାନଙ୍କ ଗୁଳିରେ ୭ ଜଣ ମାଓବାଦୀ ନିହତ ହୋଇଛନ୍ତି। ଘଟଣାସ୍ଥଳରୁ ଦୁଇ ମାଓବାଦୀଙ୍କ ମୃତଦେହ ଜବତ କରାଯାଇଛି। କୁହାଯାଉଛି ଯେ, ଗୁରୁବାର ତିନୋଟି ଜିଲ୍ଲାର ୧୦୦୦ ଯବାନ ସର୍ଚ୍ଚିତ ଅପରେସନ୍ରେ ବାହାରିଥିଲେ। ଏହି ସମୟରେ ଅଲଗା ଅଲଗା ସ୍ଥାନରେ ମାଓବାଦୀ ଓ ଯବାନଙ୍କ ଭିତରେ ସଂଘର୍ଷ ହୋଇଥିଲା। ଘଟଣା ସମ୍ପର୍କରେ ନାରାୟଣପୁର ଏସପି ପ୍ରଭାତ କୁମାର ସୂଚନା ଦେଇଛନ୍ତି।
ମିଳିଥିବା ସୂଚନା ଅନୁସାରେ, ନାରାୟଣପୁର ଏସପି ପ୍ରଭାତ କୁମାର କହିଛନ୍ତି, ନାରାୟଣପୁର-ବିଜାପୁର ଜିଲ୍ଲାର ସୀମାବର୍ତ୍ତୀ ଅଞ୍ଚଳରେ ପ୍ଳାଟୁନ ନମ୍ବର ୧୬ ଓ ଇନ୍ଦ୍ରାବତୀ ଏରିଆ କମିଟିର ନକ୍ସଲଙ୍କ ବିଷୟରେ ସୂଚନା ପାଇବା ପରେ ନାରାୟଣପୁର, ଦନ୍ତେଓ୍ବାଡା ଓ ବସ୍ତର ଜିଲ୍ଲାର ଡିଆରଜି ଓ ବସ୍ତର ଫାଇଟର୍ସଙ୍କ ସହିତ ଏସଟିଏଫ୍ ଟିମ୍ ସର୍ଚ୍ଚ ଅପରେସନ୍ ଆରମ୍ଭ କରିଥିଲେ।
ମିଳିଥିବା ସୂଚନା ଅନୁସାରେ, ଏସପି କହିଛନ୍ତି ଗୁରୁବାର ସକାଳ ୧୧ ଟା ବେଳେ ମାଓବାଦୀମାନେ ସୁରକ୍ଷାକର୍ମୀଙ୍କ ଉପରକୁ ଗୁଳିମାଡ ଆରମ୍ଭ କରିଥିଲେ। ପୋଲିସ ଓ ମାଓବାଦୀଙ୍କ ଭିତରେ ସଂଘର୍ଷ ଏବେ ବି ଜାରି ରହିଛି। ସେଭଳି ଯବାନମାନେ ଘଟଣାସ୍ଥଳରୁ ଏପର୍ଯ୍ୟନ୍ତ ଦୁଇଜଣ ମାଓବାଦୀଙ୍କ ମୃତଦେହକୁ ଜବତ କରିଛନ୍ତି। ଏହା ସହିତ ପ୍ରଚୁର ମାତ୍ରାରେ ହତିଆର ମଧ୍ୟ ମିଳିଛି। ୧୦/୧୨ ମାଓବାଦୀ ଆହତ ହୋଇଥିବାର ମଧ୍ୟ ସମ୍ଭାବନା ରହିଛି।