ଭୁବନେଶ୍ୱର,୧୫/୦୬: ମନ୍ତ୍ରିମଣ୍ଡଳ ଶପଥ ପରେ ଏବେ ନଜର କିଏ ହେବେ ବାଚସ୍ପତି, ଉପବାଚସ୍ପତି ଏବଂ ସରକାରୀ ଦଳ ମୁଖ୍ୟ ସଚେତକ? ବାଚସ୍ପତି ଦୌଡ଼ରେ ବିଜେପିର ବରିଷ୍ଠ ନେତ୍ରୀ ସୁରମା ପାଢ଼ୀଙ୍କ ନାମ ସବୁଠୁ ଆଗରେ ଥିବା କୁହାଯାଉଛି । ଉପବାଚସ୍ପତି ପାଇଁ ଦଳ କୌଣସି ପୁରୁଣା ନେତାଙ୍କ ନାମ ବିଚାରକୁ ନେଇପାରେ । ଏ କ୍ଷେତ୍ରରେ ଭାସ୍କର ମଢ଼େଇ, ଭବାନୀ ଶଙ୍କର ଭୋଇ, ପଦ୍ମଲୋଚନ ପଣ୍ଡାଙ୍କ ଭଳି କିଛି ଅଭିଜ୍ଞଙ୍କ ନାଁ ଚର୍ଚ୍ଚାରେ ଅଛି ।
ସରକାରୀ ଦଳ ମୁଖ୍ୟ ସଚେତକ ଏକ ଗୁରୁତ୍ୱପୂର୍ଣ୍ଣ ଦାୟିତ୍ୱ । ଦଳ ଏକ୍ଷେତ୍ରରେ ନିଶ୍ଚିତ ଭାବେ ଟାଣୁଆ ନେତାଙ୍କ ନାମକୁ ନେଇ ବିଚାର ଚଳାଇଛି । ଏହି ପଦବି ପାଇଁ ଉଦଳାର ବରିଷ୍ଠ ବିଧାୟକ ଭାସ୍କର ମଢ଼େଇ, ତଳସରାର ଭବାନୀ ଶଙ୍କର ଭୋଇ, ବଡ଼ସାହିର ସନାତନ ବିଜୁଳି, କରଞ୍ଜିଆର ପଦ୍ମଚରଣ ହାଇବ୍ରୁ, ଏକାମ୍ର ଭୁବନେଶ୍ୱରର ବାବୁ ସିଂ, ମାଲକାନଗିରିର ନରସିଂହ ମାଡ଼କାମୀ ଓ ନବୀନ ପଟ୍ଟନାୟକଙ୍କୁ ହରାଇ ଚର୍ଚ୍ଚାକୁ ଆସିଥିବା କଣ୍ଟାବାଞ୍ଜିର ଲକ୍ଷ୍ମଣ ବାଗ ନାମ ବିଚାରକୁ ନିଆଯାଉଥିବା କୁହାଯାଉଛି । ଉପମୁଖ୍ୟ ସଚେତକ ପଦବି ଉପରେ ବି ଅନେକଙ୍କ ନଜର ରହିଛି । ଯେଉଁ ଜିଲ୍ଲା ଭାଗରେ ମନ୍ତ୍ରୀ ପଦ ମିଳିନାହିଁ, ସେ ଜିଲ୍ଲାକୁ ଅଗ୍ରାଧିକାର ମିଳିପାରେ ଏସବୁ ପଦବି ପାଇଁ । ଚର୍ଚ୍ଚିତ ନାଁ ବାହାରେ ବି କିଛି ସରପ୍ରାଇଜ୍ ଚେହେରା ଦେଖିବାକୁ ମିଳିପାରେ ।