ଭୁବନେଶ୍ୱର, ୨୦/୦୨: ବେଲେଶ୍ୱର ବୃଦ୍ଧ ଦମ୍ପତି ହତ୍ୟା ଘଟଣା। ଅଭିଯୁକ୍ତ ସନ୍ତୋଷ ସମାଧାକୁ ରିମାଣ୍ଡରେ ନେବାକୁ ଅନୁମତି । ଦୁଇ ଦିନ ରିମାଣ୍ଡରେ ନେବାକୁ ଅନୁମତି ପ୍ରଦାନ କଲେ କୋର୍ଟ । ଗୁରୁବାର ଏବଂ ଶୁକ୍ରବାର ପୋଲିସ ରିମାଣ୍ଡରେ ରହିବ ଅଭିଯୁକ୍ତ ସନ୍ତୋଷ । ପାଞ୍ଚ ଦିନ ରିମାଣ୍ଡ ପାଇଁ ପୋଲିସ କୋର୍ଟରେ ଆବେଦନ କରିଥିବାବେଳେ ଦୁଇ ଦିନ ପାଇଁ ମିଳିଲା ଅନୁମତି । ହତ୍ୟା କାଣ୍ଡର ପାଞ୍ଚ ବର୍ଷ ପରେ ଅଭିଯୁକ୍ତ ସନ୍ତୋଷ ସମାଧା ଓ ପତ୍ନୀ ବାସନ୍ତୀ ସମାଧାକୁ ଫେବୃୟାରୀ ୧୪ ତାରିଖରେ ଗିରଫ କରିଥିଲା କମିସନରେଟ ପୋଲିସ । ରିମାଣ୍ଡରେ ଅଧିକ ହତ୍ୟାକାଣ୍ଡର ପ୍ରକୃତ ସତ ସହ ସନ୍ତୋଷର ଅତୀତ କାର୍ଯ୍ୟକୁ ନେଇ ସ୍ବତନ୍ତ୍ର ଟିମ୍ ପଚରାଉଚରା କରିବ ବୋଲି କଟକ ଡିସିପି ଜଗମୋହନ ମିନା ସୂଚନା ଦେଇଛନ୍ତି ।
ଦୀର୍ଘ ୫ ବର୍ଷ ହେଲାଣି ରହସ୍ୟ ଘେରରେ ଥିବା ମଧୁପାଟଣା ଥାନା ଅନ୍ତର୍ଗତ ବେଲେଶ୍ୱରର ବୃଦ୍ଧ ଦମ୍ପତି ଶ୍ରୀନାଥ ସାମଲ ଓ ବିଦୁଲତା ସାମଲ ହତ୍ୟା ମାମଲାର ପର୍ଦ୍ଦାଫାସ ହୋଇଛି । ୨୦୧୯ ମସିହାରେ ହୋଇଥିବା ଏହି ଚାଞ୍ଚଲ୍ୟକର ହତ୍ୟା ମାମଲାର ଦୁର୍ବୃତ୍ତମାନେ ଆଉ ଧରାପଡ଼ିବେ ନାହିଁ ବୋଲି ସାଧାରଣରେ ଏକ ଧାରଣା ଦୃଢ଼ ହୋଇଯାଇଥିବା ବେଳେ କମିସନ୍ରେଟ୍ ପୁଲିସ ବାଜି ପଲଟାଇ ଦେଇଛି । ପୁଲିସକୁ ଚକ୍ମା ଦେଇ ହତ୍ୟାକାଣ୍ଡ ଅଞ୍ଚଳରେ ବେଶ୍ ଆରାମରେ ରହୁଥିବା ଚାକରାଣୀ ବାସନ୍ତୀ ସମଦ ଏବଂ ତାର ସ୍ୱାମୀ ସନ୍ତୋଷ ଓରଫ ଇମନ ସମଦ ଶେଷରେ ବନ୍ଧା ହୋଇଥିଲେ । ଅଭିଯୁକ୍ତ ଦମ୍ପତିଙ୍କ ଘର ସୁନ୍ଦରଗଡ଼ରେ ହୋଇଥିବା ବେଳେ ସେମାନେ ବେଲେଶ୍ୱର ନିକଟବର୍ତ୍ତୀ ତିନିଘରିଆ ଅଞ୍ଚଳରେ ରହୁଥିଲେ । ସେମାନଙ୍କୁ ଧରିବା ପାଇଁ ଗଲା ଡିସେମ୍ବରରୁ ପୁଲିସ ଜାଲ ବିଛାଇଥିଲା । ସାଦା ପୋଷାକରେ ଏକାଧିକ ପୁଲିସ ପାଖାପାଖି ଦୁଇ ମାସ ହେବ ସନ୍ତୋଷ ଓ ବାସନ୍ତୀ ସହ ମିଳାମିଶା କରୁଥିଲେ । ଘର ମାଲିକ ଶ୍ରୀନାଥ ସାମଲ ଟଙ୍କା ଉଧାର ଦେବାକୁ ମନା କରିଦେବାରୁ ବାସନ୍ତୀ ଓ ସନ୍ତୋଷ ଏହି ବୀଭତ୍ସ ହତ୍ୟାକାଣ୍ଡ ଭିଆଇଥିଲେ ବୋଲି ଏକ ସାମ୍ବାଦିକ ସମ୍ମିଳନୀରେ ପୁଲିସ କମିସନର ଏସ୍. ଦେବଦତ୍ତ ସିଂହ ସୂଚନା ଦେଇଥିଲେ ।
