କଟକ,୨୧/୦୨: ଆଜିଠୁ ମାଧ୍ୟମିକ ଶିକ୍ଷା ପରିଷଦ (ବୋର୍ଡ) ଦ୍ୱାରା ପରିଚାଳିତ ମାଟ୍ରିକ-୨୦୨୫ ରେଗୁଲାର୍ ଓ ଏକ୍ସରେଗୁଲାର୍ ପରୀକ୍ଷା । ପ୍ରଥମ ଦିନ ଓଡ଼ିଆ ମାତୃଭାଷା ବିଷୟରୁ ପରୀକ୍ଷା ଆରମ୍ଭ ହେବ । ରେଗୁଲାର୍ ଓ ଏକ୍ସରେଗୁଲାର୍ ଗୋଟିଏ ସିଟିଂରେ ପରୀକ୍ଷା ହେବ । ସକାଳ ୯ଟାରୁ ପରୀକ୍ଷା ଆରମ୍ଭ ହୋଇ ଦିନ ୧୧ଟା ୩୦ ମିନିଟ୍ ପର୍ଯ୍ୟନ୍ତ ଚାଲିବ। କେବଳ ଗଣିତ ପରୀକ୍ଷା ପାଇଁ ଅଧିକ ୧୫ ମିନିଟ୍ ସମୟ ରହିଛି । ପରୀକ୍ଷାର୍ଥୀମାନଙ୍କୁ ସକାଳ ୭ ଟା ୩୦ ସୁଦ୍ଧା ପରୀକ୍ଷା କେନ୍ଦ୍ର ନିକଟରେ ପହଞ୍ଚିବାକୁ ହେବ। କଡ଼ା ଯାଞ୍ଚ୍ ପରେ ପରୀକ୍ଷାର୍ଥୀଙ୍କୁ ଭିତରକୁ ଛଡ଼ାଯିବ । ପରୀକ୍ଷାର୍ଥୀମାନଙ୍କୁ ସାଧାରଣ ହାତ ଘଣ୍ଟା ନେବାକୁ ସୁଯୋଗ ରହିଥିଲେ ହେଁ ଡିଜିଟାଲ୍ ତଥା ସ୍ମାର୍ଟ ୱାଚ୍ ନେଇପାରିବେ ନାହିଁ ବୋଲି ବୋର୍ଡ ପକ୍ଷରୁ ନିର୍ଦ୍ଦେଶ ରହିଛି । ଏହି ପରୀକ୍ଷା ଆସନ୍ତା ୬ ତାରିଖ ପର୍ଯ୍ୟନ୍ତ ଚାଲିବ ।
ରାଜ୍ୟରେ ୫ ଲକ୍ଷ ୧୦ ହଜାର ୭୭୦ ଜଣ ପରୀକ୍ଷାର୍ଥୀ ଏଥର ମାଟ୍ରିକ୍ ପରୀକ୍ଷା ଦେଉଛନ୍ତି । ଏଥିଲାଗି ୨ ହଜାର ୯୭୯ ପରୀକ୍ଷା କେନ୍ଦ୍ର ଚୟନ କରାଯାଇଛି । ସେହିପରି ୭୮୩୧ ଜଣ ଏସ୍ଓଏସ୍ସି ପରୀକ୍ଷାର୍ଥୀଙ୍କ ପାଇଁ ୧୦୨ଟି ପରୀକ୍ଷା କେନ୍ଦ୍ର ଓ ୩ ହଜାର ୭୯୨ ଜଣ ସଂସ୍କୃତ ମଧ୍ୟମା ପରୀକ୍ଷାର୍ଥୀଙ୍କ ଲାଗି ୫୨ଟି ପରୀକ୍ଷା କେନ୍ଦ୍ର ପ୍ରସ୍ତୁତ ରହିଛି । ତିନୋଟି ଯାକ ପରୀକ୍ଷା ପାଇଁ ୩ ହଜାର ୧୩୩ ଟି ପରୀକ୍ଷା କେନ୍ଦ୍ର କରାଯାଇଛି । ଚଳିତ ବର୍ଷ ଗଞ୍ଜାମ ଜିଲ୍ଲାରେ ସର୍ବାଧିକ ପରୀକ୍ଷାର୍ଥୀ ଅଛନ୍ତି ।
ରେଗୁଲାର ଓ ଏକ୍ସରେଗୁଲାର ମିଶି ୪୨ ହଜାର ୮୩୬ ପରୀକ୍ଷାର୍ଥୀ ଗଞ୍ଜାମ ଜିଲ୍ଲାର ୨୧୪ଟି ସେଣ୍ଟରରେ ପରୀକ୍ଷା ଦେବେ । ଦ୍ୱିତୀୟରେ ବାଲେଶ୍ୱର ଜିଲ୍ଲାରେ ୧୮୬ଟି କେନ୍ଦ୍ରରେ ୨୯ ହଜାର ୯୦୮ ଜଣ ପରୀକ୍ଷାର୍ଥୀ, ମୟୂରଭଞ୍ଜରେ ୧୭୪ଟି ସେଣ୍ଟରରେ ୨୮ ହଜାର ୬୫୫ ଜଣ, କଟକରେ ୧୫୪ଟି ସେଣ୍ଟରରେ ୨୭ ହଜାର ୭୬୧ ଜଣ ପରୀକ୍ଷା ଦେବେ । ଦେବଗଡ଼ ଜିଲ୍ଲାରେ ସବୁଠୁ କମ୍ ପରୀକ୍ଷାର୍ଥୀ ରହିଛନ୍ତି। ଏହି ଜିଲ୍ଲାରେ ୩୩ଟି କେନ୍ଦ୍ରରେ ୩ ହଜାର ୭୮୫ ପରୀକ୍ଷାର୍ଥୀ ପରୀକ୍ଷା ଦେବେ ବୋଲି ସୂଚନା ମିଳିଛି । ସମସ୍ତ ପରୀକ୍ଷା କେନ୍ଦ୍ର ସିସିଟିଭି ଫୋକସ୍ରେ ରହିଥିଲେ ହେଁ ନୋଡାଲ୍ ସେଣ୍ଟର ଓ ସମ୍ବେଦନଶୀଳ ପରୀକ୍ଷା କେନ୍ଦ୍ର ମିଶି ୬ଶହ କେନ୍ଦ୍ରରେ ଭିଡିଓ ସିଧା ପ୍ରସାରଣ (ଲାଇଭ୍ ଷ୍ଟ୍ରମିଙ୍ଗ୍) ବ୍ୟବସ୍ଥା କରାଯାଇଛି । ୨୮୬ ଟି ସମ୍ବେଦନଶୀଳ ପରୀକ୍ଷା କେନ୍ଦ୍ର ଓ ୩୧୪ଟି ନୋଡାଲ୍ ସେଣ୍ଟରରେ ଲାଇଭ୍ ଭିଡିଓର ଅନୁଧ୍ୟାନ ଲାଗି ବୋର୍ଡ କାର୍ଯ୍ୟାଳୟରେ କଣ୍ଟ୍ରୋଲ୍ ରୁମ୍ କରାଯାଇଛି ।
