କଟକରୋଡ,୨୧/୦୨: ଚିନ୍ତା ବଢାଇଲାଣି ରାଜଧାନୀର କେତେକ ଫ୍ଲାଏ ଓଭରବ୍ରିଜ । ଦୁର୍ଘଟଣାରେ ବାରମ୍ବାର ଧନଜୀବନ ହାନି ସହରବାସୀଙ୍କ ଭୟ ବଢାଇଛି । ଏଭଳି ସ୍ଥିତିରେ ଗତ ୫ବର୍ଷ ପୂର୍ବେ ନିର୍ମାଣ ହୋଇଥିବା ବମିଖାଲ ରେଲୱେ ଓଭରବ୍ରିଜ ସରକାରଙ୍କ ଏକ ସ୍ୱାଗତଯୋଗ୍ୟ ଲକ୍ଷ୍ୟରୁ ବହୁ ଦୂରରେ ରହିଛି । ସେ ସମୟରେ ବିଭାଗୀୟ ଯନ୍ତ୍ରୀଙ୍କ ଦୁରଦୃଷ୍ଟି ଅଭାବ ଓ ଟ୍ରାଫିକ ପରିଚାଳନା ବାବଦରେ ସୁଚିନ୍ତିତ ମତାମତ ଅଭାବ ଏବେ ବ୍ରିଜ ବ୍ୟବହାର କରୁଥିବା ଗାଡିଚାଳକ, ପଥଚାରୀ ଓ ଅଂଚଳବାସୀଙ୍କ ପାଇଁ ବୋଝ ସଦୃଶ ହୋଇଛି ।
ସୂଚନା ଥାଉ କି, ରସୁଲଗଡ-ସାମନ୍ତରାପୁର ରାସ୍ତାରେ ଅତ୍ୟଧିକ ଯାନବାହନ ଚଳାଚଳ ସମସ୍ୟା ସୃଷ୍ଟି କରିଛି । ଏଥିସହ ଭାରୀଯାନ ସାଙ୍ଗକୁ ଯାତ୍ରୀବାହୀ ବସ୍ ଅଧିକ ବିପଦ ସୃଷ୍ଟି କରୁଛି । କେତେକ ସ୍ଥାନରେ ସଙ୍କୁଚିତ ରାସ୍ତାରେ କ୍ରମାଗତ ଦୁର୍ଘଟଣା ନେଇ ପୂର୍ତ୍ତ ବିଭାଗ ପକ୍ଷରୁ ଏକ ବ୍ରିଜ ନିର୍ମାଣ ପାଇଁ ପରିକଳ୍ପନା ହୋଇଥିଲା । ୪୪କୋଟି ଟଙ୍କା ବ୍ୟୟରେ ରସୁଲଗଡ–ବମିଖାଲ ମଧ୍ୟରେ ଏହି ବ୍ରିଜ ତିଆରି ପରେ ଏବେ ଏହା ଲୋକଙ୍କ ପାଇଁ ସେତେଟା ବ୍ୟବହାର ଉପଯୋଗୀ ହୋଇପାରୁନି । ଏହା ଅତ୍ୟନ୍ତ ସଙ୍କୁଚିତ ହେବା ଓ ବିଭିନ୍ନ ଦିଗକୁ ଗତି ସମ୍ବନ୍ଧରେ ସହଜେ ଜାଣିବା ସମ୍ଭବ ନ ହେବା ଏଠାରେ ଗାଡି ଚଳାଚଳ କମିବାର ପ୍ରମୁଖ କାରଣ ବୋଲି କୁହାଯାଇଛି । ଯଦ୍ୱାରା ଅନେକ ସମୟରେ ଚାଳକ ବାଟବଣା ହେବା ସହ ଦୁର୍ଘଟଣାର ଶିକାର ହୋଇ ଆହତ ଓ ମୃତ୍ୟୁମୁଖରେ ପଡିବା ଏକାଧିକ ନଜୀର ରହିଛି । ଏଭଳି ତ୍ରୁଟିପୂର୍ଣ୍ଣ ବ୍ରିଜ ନିର୍ମାଣ ନେଇ ସବୁସମୟରେ ଲୋକଙ୍କ ମଧ୍ୟରେ ଦୀର୍ଘଦିନରୁ ଅସନ୍ତୋଷ ଲାଗିରହିଛି । ତେବେ କିଛିଟା ତ୍ରୃଟି ସୁଧାରିବା ପାଇଁ କମିଶନରେଟ ଟ୍ରାଫିକ ଓ ପୂର୍ତ୍ତ ବିଭାଗ ପକ୍ଷରୁ ପୂର୍ବରୁ ଉଦ୍ୟମ ହୋଇଛି ।
ଏକତରଫା ରାସ୍ତାରେ ରଙ୍ଗସାଇଡ ଡ୍ରାଇଭିଂ ବନ୍ଦ ପାଇଁ ସ୍ଥାନୀୟ ପୁଲିସ ଓ ଟ୍ରାଫିକ ଅଧିକାରୀଙ୍କ ପକ୍ଷରୁ ପଦକ୍ଷେପ ନିଆଯାଇଥିଲା । କିନ୍ତୁ ଲୋକେ ନିର୍ମାଣକାରୀ ସଂସ୍ଥା ଓ ବିଭାଗର ଦୋଷ ଦର୍ଶାଇ ଏହାକୁ ବିରୋଧ କରିଥିଲେ । ଏପରିକି ରସୁଲଗଡରୁ ଝାରପଡା ଓଭରବ୍ରିଜ ପଟରୁ ଆସୁଥିବା ଯାନବାହାନ ଗୁଡିକର ଶୃଙ୍ଖଳିତ ଯାତାୟତ ପାଇଁ ବ୍ରିଜ ଶେଷମୁଣ୍ଡରେ ଏକ ଗୋଲେଇ ତିଆରି ପାଇଁ ଉଭୟ ବିଭାଗ ନିଷ୍ପତି ନେଇଥିଲେ । ଏଥିସହ ସହ ବ୍ରିଜ ମଝିଛକରେ ଚାଳକଙ୍କୁ ବାଟ କଢାଇବା ପାଇଁ ବ୍ୟାରିକେଡ ବ୍ୟବସ୍ଥା ହୋଇଥିଲା । କିନ୍ତୁ ମାତ୍ର କିଛିଦିନ ପରେ ସବୁକିଛି ଶୀଥିଳ ହୋଇପଡିଛି । ଫଳରେ ଅନେକ ସମୟରେ ପରିସ୍ଥିତି ଅଣାୟତ୍ତ ହେଉଛି । ରସୁଲଗଡ ଛକରେ ଟ୍ରାଫିକ ଜାମ ସମସ୍ୟା ଉପୁଜିଲେ ବ୍ରିଜ ଉପର ରାସ୍ତା ଚାଳକଙ୍କୁ ନାକେଦମ କରୁଛି । ପୁର୍ନବାର କେଉଁ ପଦକ୍ଷେପ ନିଆଗଲେ ବ୍ରିଜରେ ଗାଡି ଯାତାୟତ ସହଜ ହେବ ସେ ନେଇ ପୁର୍ତ୍ତ ଓ ଟ୍ରାଫିକ କର୍ତ୍ତୃପକ୍ଷ ତତ୍ପରତା ଦେଖାଇବା ଜରୁରୀ ବୋଲି ଲୋକେ କହିଛନ୍ତି ।
