ମାହାଙ୍ଗା, ୨୦/୨ : ଧାରଣାସ୍ଥଳରେ ବିଜେଡିର ୬ ଜଣିଆ ଫ୍ୟାକ୍ଟ ଫାଇଣ୍ଡିଂ ଟିମ୍ ପହଞ୍ଚିବା ଓ ପିଡିଙ୍କ ଲିଖିତ ପ୍ରତିଶ୍ରୁତି ପରେ ମାହାଙ୍ଗା ବ୍ଲକ ପରିସରରେ ଧାରଣାସ୍ଥଳରେ ବସିଥିବା ସରପଞ୍ଚ ଓ ସମିତି ସଭ୍ୟମାନେ ଧାରଣା ପ୍ରତ୍ୟାହୃତ କରିଛନ୍ତି । ୧୦ଦିନ ଭିତରେ ସମସ୍ତ ଦାବି ପୂରଣ କରିବା ପାଇଁ ପ୍ରତିଶ୍ରୁତି ଦେଇଛନ୍ତି ପିଡି । ସାଧାରଣ ନିର୍ବାଚନ ପୂର୍ବରୁ ମାହାଙ୍ଗା ବ୍ଲକର ୩୭ପଞ୍ଚାୟତରେ ହୋଇଥିବା ଉନ୍ନୟନମୂଳକ କାର୍ଯ୍ୟର ବିଲ୍ ବନ୍ଦ କରାଯାଇଥିଲା ଓ ନିର୍ବାଚନର ୮ମାସ ପରେ ନୂତନ ସରକାର ଆସିବା ପରେ କୌଣସି ଉନ୍ନୟନମୂଳକ କାର୍ଯ୍ୟ କରାଯାଇ ନାହିଁ । ଏହି ଦୁଇଟି ଦାବିକୁ ପୁରଣ କରିବା ପାଇଁ ଦୁଇ ଦିନ ଧରି ଧାରଣାରେ ବସିଥିଲେ ୩୭ପଞ୍ଚାୟତର ଜନ ପ୍ରତିନିଧିମାନେ । ଏଣୁ ଧାରଣାସ୍ଥଳରେ ବସିଥିବା ଜନ ପ୍ରତିନିଧିମାନକୁ ଭେଟିଥିଲେ ବିଜେଡ଼ିର ୬ଜଣିଆ ଫ୍ୟାକ୍ଟ ଫାଇଣ୍ଡିଂ ଟିମ୍ । ଏହି ୬ ଜଣିଆ ଟିମ୍ ଭିତରେ ପୂର୍ବତନ ମନ୍ତ୍ରୀ ତଥା ମାହାଙ୍ଗାର ପୂର୍ବତନ ବିଧାୟକ ପ୍ରତାପ ଜେନା, ନୟାଗଡ଼ ବିଧାୟକ ଅରୁଣ ସାହୁ, ପୂର୍ବତନ ମନ୍ତ୍ରୀ ସଞ୍ଜୟ ଦାସ ବର୍ମା, ରାଜନଗର ବିଧାୟକ ଧ୍ରୁବ ସାହୁ, ବାଙ୍କୀ ବିଧାୟକ ଦେବୀ ରଞ୍ଜନ ତ୍ରିପାଠୀ, ସାଲେପୁର ବିଧାୟକ ପ୍ରଶାନ୍ତ ବେହେରା ପ୍ରମୁଖ ।
ବିଜେଡି ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ଏହି ୬ଜଣିଆ ଟିମ୍ ଧାରଣାସ୍ଥଳରେ ବସିଥିବା ଜନ ପ୍ରତିନିଧି ମାନଙ୍କୁ ଭେଟିବାକୁ ଆସିଥିଲେ । ଆସନ୍ତାକାଲି ବିଧାନସଭାରେ ଏହି ପ୍ରସଙ୍ଗ ଉଠାଯିବ ବୋଲି ବିଧାୟକ ଅରୁଣ ସାହୁ କହିଥିଲେ । ଏହାପରେ ମାହାଙ୍ଗା ବିଡିଓଙ୍କ କାର୍ଯ୍ୟାଳୟରେ ବିଜେଡିର ଫ୍ୟାକ୍ଟ ଫାଇଣ୍ଡିଂ ଟିମ୍ ଧାରଣାରେ ବସିଥିବା ବ୍ଲକ୍ ଅଧ୍ୟକ୍ଷା ଓ ଜନ ପ୍ରତିନିଧିମାନେ ପିଡିଙ୍କ ସହିତ ଆଲୋଚନା କରିଥିଲେ । ଏହାପରେ ପିଡି ଏକ ଲିଖିତ ପ୍ରତିଶ୍ରୁତି ଦେଇଥିଲେ କି ଆଗାମୀ ୧୦ ଦିନ ଭିତରେ ଧାରଣାରେ ବସିଥିବା ଜନ ପ୍ରତିନିଧିମାନଙ୍କ ସମସ୍ତ ଦାବିକୁ ପୂରଣ କରାଯିବ। ଏହା ପରେ ଧାରଣା ପ୍ରତ୍ୟାହୃତ ହୋଇଥିଲା ।
