ଉଦଳା, ୨୧/୨ : ବସ୍ ଓ ବୋଲେରୋ ମୁହାଁମୁହିଁ ଧକ୍କା । ଫଳରେ ୬ଜଣ ଗୁରୁତର ହୋଇଛନ୍ତି । ଏଭଳି ଏକ ଦୁର୍ଘଟଣା ଘଟିଛି ଶରତ ଥାନା ହଦଗୁଠ ଛକ ନିକଟରେ। ପ୍ରକାଶ ଯେ, ଭୁବନେଶ୍ୱରରୁ ଶରତ ଅଭିମୁଖେ ବିଜୟା ନାମକ ଏକ ଘରୋଇ ଯାତ୍ରୀବାହି ବସ୍ ଯାଉଥିଲା । ହଦଗୁଠ ଛକ ନିକଟରେ ବିପରୀତ ଦିଗରୁ ଆସୁଥିବା ଏକ ବୋଲେରୋ ସହିତ ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣାସ୍ଥଳରେ ବୋଲେରୋରେ ଥିବା ୫ଜଣଙ୍କ ସହିତ ବସ୍ ଡ୍ରାଇଭର ଗୁରୁତର ହୋଇପଡ଼ିଛନ୍ତି ।
ଦୁର୍ଘଟଣା ଏତେ ତୀବ୍ର ଥିଲା ଯେ, ବୋଲେରୋର ସାମ୍ନା ପାଖ ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା। ଗୁରୁତରମାନଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଚିକିତ୍ସା ନିମନ୍ତେ ଶରତ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ଅବସ୍ଥା ସଂକଟାପନ୍ନ ହେବାରୁ ସେମାନଙ୍କୁ ଉଦଳା ମେଡ଼ିକାଲରେ ଭର୍ତ୍ତି କରାଯାଇଛି।
