କଟକ, ୨୦/୨ : ଆସନ୍ତାକାଲିଠାରୁ ଆରମ୍ଭ ହେବ ମାଟ୍ରିକ ପରୀକ୍ଷା। ରାଜ୍ୟର ୩ ହଜାର ୧୩୩ଟି କେନ୍ଦ୍ରରେ ପରୀକ୍ଷା ଦେବେ ୫ଲକ୍ଷ ୨୨ ହଜାର ୩୩୬ଜଣ ପରୀକ୍ଷାର୍ଥୀ । ତେବେ ପରୀକ୍ଷାର ସୁପରିଚାଳନା ପାଇଁ ଏଥର ବୋର୍ଡ଼ କର୍ତ୍ତୃପକ୍ଷ ସ୍ୱତନ୍ତ୍ର କମାଣ୍ଡ କଟ୍ରୋଲ ସିଷ୍ଟମ ଆପଣାଇଛନ୍ତି । ଆଜି କଣ୍ଟ୍ରୋଲ ରୁମରେ ଏ ନେଇ ଏକ ମକ ଡ୍ରିଲ କରାଯାଇଛି। ୬୦୦ଟି ପରୀକ୍ଷା କେନ୍ଦ୍ରକୁ କଣ୍ଟ୍ରୋଲ ରୁମ ସହ ସଂଯୁକ୍ତ କରି ସେଠାରୁ ଲାଇଭ ଚିତ୍ର ଦେଖିଛନ୍ତି ବୋର୍ଡ଼ କର୍ତ୍ତୃପକ୍ଷ। ବୋର୍ଡ଼ର ଯୁକ୍ତି ହେଲା, କମାଣ୍ଡ କଣ୍ଟ୍ରୋଲ ସିଷ୍ଟମ ଦ୍ୱାରା ଅନେକ ବେଆଇନ କାର୍ଯ୍ୟକୁ ରୋକାଯାଇପାରିବ ଏବଂ ଆବଶ୍ୟକ ବେଳେ ଏହି ବ୍ୟବସ୍ଥା ଜରିଆରେ ଅନେକ ସମସ୍ୟାର ସମାଧାନ ମଧ୍ୟ କରି ହେବ।
ପରୀକ୍ଷା କେନ୍ଦ୍ର ଗୁଡିକୁ ଜଗିଛି କ୍ୟାମେରା। କେନ୍ଦ୍ର ଭିତରର ପ୍ରତ୍ୟେକ କାର୍ଯ୍ୟ କଳାପକୁ ମନିଟରିଙ୍ଗ କରୁଛନ୍ତି ବୋର୍ଡ କର୍ତ୍ତୃପକ୍ଷ। ଯଦି କେଉଁଠି କିଛି ବି ବେଆଇନ କାର୍ଯ୍ୟ ବା ସନ୍ଦେହଜନକ କାର୍ଯ୍ୟକଳାପକୁ ଠାବ କରାଗଲା ତେବେ ତୁରନ୍ତ ହେବ କାର୍ଯ୍ୟାନୁଷ୍ଠାନ। ଆସନ୍ତାକାଲିଠାରୁ ଆରମ୍ଭ ହେବାକୁ ଥିବା ମାଟ୍ରିକ ପରୀକ୍ଷା ପ୍ରସ୍ତୁତି ପର୍ବର ଏହା ଥିଲା ଏକ ମକ ଡ୍ରିଲ। ଆଜି କଟକସ୍ଥିତ ମାଧ୍ୟମିକ ଶିକ୍ଷା ପରିଷଦର ମୁଖ୍ୟାଳୟରେ କିଛି ଏଭଳି ପ୍ରସ୍ତୁତି ଚାଲିଥିଲା । ପ୍ରାୟ ୬ ଶହ ପରୀକ୍ଷା କେନ୍ଦ୍ରରୁ ଆଜି ହୋଇଛି ଲାଇଭ ଷ୍ଟ୍ରିମିଙ୍ଗ। ପରୀକ୍ଷାମୂଳକ ଭାବେ ଆଜି ଏହି କେନ୍ଦ୍ର ଗୁଡିକରୁ ସିଧା ସଳଖ ଚିତ୍ର ଦେଖିବା ପରେ ବୋର୍ଡ କର୍ତ୍ତୃପକ୍ଷ କହୁଛନ୍ତି, କି ଏଥର ମାଟ୍ରିକ ପରୀକ୍ଷାବେଳେ ସେଭଳି କିଛି ଅସୁବିଧା ହେବନାହିଁ।
ଚଳିତ ବର୍ଷ ୩ ହଜାର ୧୩୩ ଟି କେନ୍ଦ୍ରରେ ହେବ ମାଟ୍ରିକ ପରୀକ୍ଷା ଏବଂ ପରୀକ୍ଷା ଦେବେ, ରାଜ୍ୟର ୫ ଲକ୍ଷ ୨୨ ହଜାର ୩୩୬ ଜଣ ପରୀକ୍ଷାର୍ଥୀ। ଗତ ୧୨ ତାରିଖରୁ ୩୧୪ ଟି ନୋଡାଲ ସେଣ୍ଟରକୁ ପ୍ରଶ୍ନପତ୍ର ପଠାଇ ସାରିଛି ବୋର୍ଡ। ନୋଡାଲ ସେଣ୍ଟର ଗୁଡିକ ସହିତ ପ୍ରାୟ ୬ ଶହ ପରୀକ୍ଷା କେନ୍ଦ୍ରକୁ ଏଥର ଜଗି ରହିଛି ସିସିଟିଭି କ୍ୟାମେରା। ଏହା ବ୍ୟତିତ, ପ୍ରଶ୍ନପତ୍ର ଭାଇରାଲ ହେବା ଭଳି ଘଟଣା ଗୁଡିକୁ ରୋକିବା ଲାଗି ଏଥର, ଡାଇନାମିକ କ୍ୟୁ ଆର କୋଡ଼ ଏବଂ ୱାଟର ମାର୍କ ବ୍ୟବସ୍ଥା କରାଯାଇଛି, ଏବଂ କପି ରୋକିବା ଲାଗି ୪ ସ୍ତରୀୟ ସ୍କାର୍ଡ ବ୍ୟବସ୍ଥା କରିଛି ବୋର୍ଡ। ପ୍ରତେକ ଜିଲ୍ଲାର ପରୀକ୍ଷା ପରିଚାଳନା ପାଇଁ ଅତିରିକ୍ତ ଜିଲ୍ଲାପାଳ ମାନେ ନୋଡାଲ ଅଫିସର ଭାବେ ଦାୟିତ୍ୱ ତୁଲାଇବେ ଏବଂ ଜଣେ ଜଣେ ଡିଏସପି ପାହ୍ୟାର ପୋଲିସ ଅଧିକାରୀ ସମସ୍ତ ଘଟଣାବଳୀ ଉପରେ ନଜର ରଖିବେ।
ଫାଭିଓ, ମାଟ୍ରିକ ପରୀକ୍ଷାର୍ଥୀ ମାନେ ଗୋଟିଏ ଦିନରେ ଗୋଟିଏ ପେପର ପାଇଁ ପରୀକ୍ଷା ଦେବେ। ଗୋଟିଏ ଗୋଟିଏ ଦିନ ବ୍ୟବଧାନରେ ହେବ ପରୀକ୍ଷା । ତେଣୁ ଛାତ୍ରଛାତ୍ରୀମାନେ ପରୀକ୍ଷା ପ୍ରସ୍ତୁତି ଲାଗି ଅଧିକ ସମୟ ମଧ୍ୟ ପାଇପାରିବେ।
