ନୂଆଦିଲ୍ଲୀ: ସୋସିଆଲ ମିଡିଆ ବ୍ୟବହାର କରିବାକୁ ବୟସ ସୀମା ଧାର୍ଯ୍ୟ ହେବା ଦରକାର କି ? ଏହା ଉପରେ ଏବେ ନୂଆ ନିୟମ ଆସିବାକୁ ଯାଉଛି । ଅଷ୍ଟ୍ରେଲିଆ ସରକାର ସୋସିଆଲ ମିଡିଆ ବ୍ୟବହାର ଲାଗି ନ୍ୟୁନତମ ବୟସ ଉପରେ ବିଚାର କରୁଛନ୍ତି । ପିଲାମାନଙ୍କୁ ଇନଷ୍ଟାଗ୍ରାମ ଏବଂ ଟିକଟକ୍‌ ଭଳି ସୋସିଆଲ ମିଡିଆ ଖରାପ କରୁଛି ବୋଲି ସରକାର ବିଶ୍ବାସ କରୁଛନ୍ତି । ସେମାନଙ୍କୁ ଏଥିରୁ ଦୂରେଇ ରଖିବାକୁ କଡ଼ା ନିୟମ ଆପଣାଇବେ ଅଷ୍ଟ୍ରେଲିଆ ସରକାର । ପିଲାମାନଙ୍କ ଉଭୟ ଶାରିରୀକ ଏବଂ ମାନସିକ ସ୍ବାସ୍ଥ୍ୟ ଉପରେ କୁପ୍ରଭାବ ପକାଉଛି ସୋସିଆଲ ମିଡିଆ । ତେଣୁ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଏନ୍ଥୋନି ଆଲବାନିଜ୍‌ଙ୍କ ସରକାର ମଙ୍ଗଳବାର ସୋସିଆଲ ମିଡିଆ ବ୍ୟବହାର କରିବାର ବୟସସୀମା କେତେ ହେବା ଦରକାର ତାକୁ ନେଇ ଏକ ଟ୍ରାଏଲ ଆରମ୍ଭ କରିଛନ୍ତି । ଏକ ନିର୍ଦ୍ଦିଷ୍ଟ ଆୟୁବର୍ଗ ଉପରେ ସମ୍ପୂର୍ଣ୍ଣ ବ୍ୟାନ୍‌ ଲଗାଇବା ପୂର୍ବରୁ ସରକାର ଏହି ଟ୍ରାଏଲ ଆରମ୍ଭ କରିଥିବା ଜଣାପଡ଼ିଛି ।   

୧୪ରୁ ୧୬ ବର୍ଷ ବୟସର ପିଲାମାନଙ୍କୁ ସୋସିଆଲ ମିଡିଆ ବ୍ୟବହାର କରିବା ଉପରେ ରୋକ ଲଗାଇବା ଉପରେ ବିଚାର କରାଯାଉଛି ବୋଲି ପ୍ରଧାନମନ୍ତ୍ରୀ ଆଲବାନିଜ୍‌ କହିଛନ୍ତି । ଅଭିଭାବକମାନେ ନିଜର ପିଲାମାନଙ୍କ ସୋସିଆଲ ମିଡିଆ ବ୍ୟବହାରକୁ ନେଇ ଖୁବ ଚିନ୍ତିତ ଥିବା ବେଳେ ସେମାନେ କଣ କରିବେ ଜାଣିପାରୁ ନାହାନ୍ତି ବୋଲି ଆଲବାନିଜ କହିଛନ୍ତି । ମାତାପିତା ଚାହୁଁଛନ୍ତି ସେମାନଙ୍କ ପିଲାମାନେ ଫୋନ୍‌ ଛାଡ଼ି ପଡ଼ିଆରେ ଖେଳନ୍ତୁ । ମୁଁ ମଧ୍ୟ ସମାନ କଥା ଚିନ୍ତା କରୁଛି । ବାସ୍‌ ବହୁତ ହେଲା, ଏବେ ସମୟ ଆସିଯାଇଛି ଏହା ଉପରେ କାର୍ଯ୍ୟ କରିବାକୁ ହେବ ବୋଲି କହିଛନ୍ତି ପ୍ରଧାନମନ୍ତ୍ରୀ ଆଲବାନିଜ୍‌  । 

ସରକାରଙ୍କ ଏହି ନିଷ୍ପତ୍ତିକୁ ବିରୋଧୀ ଦଳ ନେତା ପିଟର ଡଟ୍ଟନ ସମର୍ଥନ କରିଛନ୍ତି । ୧୬ ବର୍ଷରୁ କମ୍‌ ବୟସର ପିଲାମାନଙ୍କୁ ସୋସିଆଲ ମିଡିଆରୁ ଦୂରେଇ ରଖିବା ଉପରେ ସେ ଗୁରୁତ୍ବ ଦେଇଛନ୍ତି । ଚୀନ୍‌, ଫ୍ରାନ୍ସ ଏବଂ ଆମେରିକାର କେତେକ ପ୍ରଦେଶ ପିଲାମାନଙ୍କ ସୋସିଆଲ ମିଡିଆ ବ୍ୟବହାର ଉପରେ ବ୍ୟାନ ଲଗାଇବାକୁ ଆଇନ ଆଣିଛନ୍ତି । ପିଲାମନାଙ୍କ ସୋସିଆଲ ମିଡିଆ ବ୍ୟବହାର ଉପରେ ରୋକ ଲଗାଇବା ନିଷ୍ପତ୍ତିକୁ ଅନେକ ବିରୋଧ ମଧ୍ୟ କରିଛନ୍ତି । ଏହା ଦ୍ବାରା ପିଲାମାନଙ୍କ ବାକ୍‌ ସ୍ବାଧୀନତା ବାଧାପ୍ରାପ୍ତ ହେବ ବୋଲି ସମାଲୋଚକ କହିଛନ୍ତି । କ୍ବିନ୍ସଲ୍ୟାଣ୍ଡ ବିଶ୍ବବିଦ୍ୟାଳୟର ପ୍ରଫେସର ଡାନିଏଲ ଆଙ୍ଗୁସ କହିଛନ୍ତି, ଅଷ୍ଟ୍ରେଲିଆ ସରକାରଙ୍କ ଏହି ନିଷ୍ପତ୍ତି ଅତ୍ୟନ୍ତ ଦାୟିତ୍ବହୀନ ଏବଂ ଭ୍ରମିତ କଲା ଭଳି । ଏହା ଯୁବପୀଢ଼ିଙ୍କ ଡିଜିଟାଲ ବିଶ୍ବରେ ଭାଗିଦାରୀ ହ୍ରାସ କରିବ   । 

ସାମାଜିକ ଯୋଗାଯୋଗ କ୍ଷେତ୍ରରେ ସେମାନଙ୍କୁ ପଛୁଆ କରିଦେବ ବୋଲି ସେ ଅଭିଯୋଗ କରିଛନ୍ତି । ତେବେ ଏହା ପୂର୍ବରୁ ଦକ୍ଷିଣ ଅଷ୍ଟ୍ରେଲିଆର ଏକ ରାଜ୍ୟ ସୋସିଆଲ ମିଡିଆ ବ୍ୟବହାରକୁ ନେଇ ନୂଆ ଆଇନ ଲାଗି ପ୍ରସ୍ତାବ ଦେଇଛି । ୧୪ ବର୍ଷରୁ କମ୍‌ ବୟସର ପିଲାଙ୍କୁ ଯେଉଁସବୁ ସୋସିଆଲ ମିଡିଆ ପ୍ଲାଟଫର୍ମ ଆକ୍ସେସ୍‌ ଦେଉଛନ୍ତି ସେଗୁଡ଼ିକ ଉପରେ ଜରିମାନା ଲଗାଇବା ଲାଗି ଆଇନ ଆସିପାରେ ।  କେବଳ ଅଷ୍ଟ୍ରେଲିଆ ନୁହେଁ ଏବେ ସମଗ୍ର ବିଶ୍ବରେ ସୋସିଆଲ ମିଡିଆରେ ପ୍ରସାରିତ ଅଶ୍ଳୀଳ କଣ୍ଟେଣ୍ଟକୁ ନେଇ ଚିନ୍ତା ବୃଦ୍ଧି ପାଇଛି । ଯଦିଓ ବିଶ୍ବ ଡିଜିଟାଲ ଯୁଗକୁ ଆପଣାଇଛି ତଥାପି ପିଲାମାନଙ୍କ ମାନସିକ ଏବଂ ଶାରିରୀକ ସ୍ବାସ୍ଥ୍ୟକୁ ଅଣଦେଖା କରାଯାଇପାରିବ ନାହିଁ ବୋଲି ବିଶେଷଜ୍ଞ ମତ ଦେଇଛନ୍ତି ।