ନୂଆଦିଲ୍ଲୀ,୧୬/୦୯: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପରେ ପୁଣି ଥରେ ହତ୍ୟା ଉଦ୍ୟମ ଘଟଣାର ପ୍ରତିକ୍ରିୟାରେ ବିଲିୟନେୟର ତଥା ଟେସଲା ମାଲିକ ଏଲନ୍ ମସ୍କ ଏକ ବିବାଦୀୟ ବୟାନ ଦେଇଛନ୍ତି। ମସ୍କ କହିଥିଲେ ଯେ, 'ଆମେରିକାର ରାଷ୍ଟ୍ରପତି ଜୋ ବାଇଡେନ ଏବଂ ଉପରାଷ୍ଟ୍ରପତି କମଳା ହାରିସଙ୍କ ଉପରେ କାହିଁକି ହତ୍ୟା ଉଦ୍ୟମ କରାଯାଉ ନାହିଁ? ରବିବାର ଦିନ ଯେତେବେଳେ ଫ୍ଲୋରିଡାର ଏକ ଗଲ୍ଫ କୋର୍ସ ବାହାରେ ଟ୍ରମ୍ପ ଗଲ୍ଫ ଖେଳୁଥିଲେ ସେତେବେଳେ ତାଙ୍କ ଉପରକୁ ଦ୍ୱିତୀୟଥର ପାଇଁ ହତ୍ୟା ଉଦ୍ୟମ କରାଯାଇଥିଲା। ତେବେ ତମାମ ମାମଲାକୁ ନେଇ ଏଫବିଆଇ ତଦନ୍ତ ଆରମ୍ଭ କରିଛି। ରିପବ୍ଲିକାନ୍ ରାଷ୍ଟ୍ରପତି ପ୍ରାର୍ଥୀଙ୍କ ଅଭିଯାନ ଏବଂ ଆଇନ ପ୍ରଣୟନକାରୀ ସଂସ୍ଥା କହିଛନ୍ତି ଯେ ସେ ନିରାପଦରେ ଅଛନ୍ତି।
ତାମାମ ମାମଲାକୁ ନେଇ ସୋସିଆଲ ମିଡିଆରେ ଅନେକ ପ୍ରଶ୍ନ ମଧ୍ୟ ସାମ୍ନାକୁ ଆସିଛି। ଜଣେ ଏକ୍ସ ବ୍ୟବହାରକାରୀ ପ୍ରଶ୍ନ କରିଛନ୍ତି ଯେ, 'ଡୋନାଲ୍ଡ ଟ୍ରମ୍ପଙ୍କୁ କାହିଁକି ହତ୍ୟା କରିବାକୁ ଜଣେ ଚାହୁଁଛି?' ଏହାର ଉତ୍ତରରେ ଟେସଲା ସିଇଓ ଲେଖିଛନ୍ତି, କେହି ବି ବାଇଡେନ ଓ କମଳା ହାରିସଙ୍କୁ ହତ୍ୟା କରିବାକୁ ଚେଷ୍ଟା କରୁନାହାଁନ୍ତି।' ଟେସଲା ଏବଂ ସ୍ପେସ୍ ଏକ୍ସର ମୁଖ୍ୟ ଟ୍ରମ୍ପଙ୍କ ଦୃଢ଼ ସମର୍ଥକ ଏବଂ ତାଙ୍କ ସପକ୍ଷରେ ଅନେକ ସମୟରେ ସେ ଅନେକ ପୋଷ୍ଟ ଲେଖିଛନ୍ତି। ସେପଟେ ଆମେରିକାର ସିକ୍ରେଟ୍ ସର୍ଭିସ ସ୍ପଷ୍ଟ କରିଛି ଯେ ଏହାର ଏଜେଣ୍ଟ ଟ୍ରମ୍ପଙ୍କ ଗଲ୍ଫ କୋର୍ସ ସୀମା ନିକଟରେ ବନ୍ଧୁକଧାରୀଙ୍କ ଉପରକୁ ଗୁଳି ଚଳାଇଥିଲେ ଏବଂ ଅଭିଯୁକ୍ତଠାରୁ ଏକ ଭିଡିଓ କ୍ୟାମେରା ସହିତ ଏକ 'AK-47 ରାଇଫଲ' ଜବତ କରାଯାଇଥିଲା।
ସ୍ଥାନୀୟ ସୁରକ୍ଷାକର୍ମୀଙ୍କ ସୂଚନା ମୁତାବକ ଯେଉଁଠାରୁ ଟ୍ରମ୍ପଙ୍କ ଉପରକୁ ଗୁଳିମାଡ଼ କରାଯାଇଥିଲା, ସେଠାରୁ ଏକ AK-47 ରାଇଫଲ ମିଳିଥିଲା। ' ପେନସିଲଭାନିଆରେ ଏକ ନିର୍ବାଚନ ରାଲିରେ ଟ୍ରମ୍ପଙ୍କ ଉପରକୁ ଗୁଳି ମାଡ଼ର ଘଟଣାର ଦୁଇ ମାସ ପରେ ଟ୍ରମ୍ପଙ୍କ ଉପରକୁ ଏହା ହେଉଛି ଦ୍ବିତୀୟ ହତ୍ୟା ଉଦ୍ୟମ। ପୂର୍ବ ଘଟଣାକୁ ନେଇ ହ୍ବାଇଟ ହାଉସ ଏକ ବିବୃତ୍ତି ଜାରି କରି କହିଛି ଯେ, ନଭେମ୍ବର ନିର୍ବାଚନରେ ଟ୍ରମ୍ପଙ୍କ ଡେମୋକ୍ରାଟିକ୍ ପ୍ରତିଦ୍ୱନ୍ଦ୍ୱୀ ଉଭୟ ରାଷ୍ଟ୍ରପତି ଜୋ ବାଇଡେନ ଏବଂ ଉପରାଷ୍ଟ୍ରପତି କମଲା ହାରିସଙ୍କୁ ଏହି ଘଟଣା ସମ୍ପର୍କରେ ସୂଚନା ଦିଆଯାଇଛି। ରାଷ୍ଟ୍ରପତି ଜୋ ବାଇଡେନ ଏକ ବିବୃତ୍ତିରେ କହିଛନ୍ତି ଯେ ଆମ ଦେଶରେ ରାଜନୈତିକ ହିଂସା କିମ୍ବା କୌଣସି ପ୍ରକାରର ହିଂସା ପାଇଁ ସ୍ଥାନ ନାହିଁ।'