ବେଜିଂ,୧୬।୯: ଚୀନ୍ରେ ୭୫ ବର୍ଷ ପରେ ଆସୁଛି ବଡ଼ ଧରଣର ବାତ୍ୟା। ଏପର୍ଯ୍ୟନ୍ତର ସବୁଠାରୁ ଶକ୍ତିଶାଳୀ ବାତ୍ୟା ‘ବେବିନକା’ ସୋମବାର ସଙ୍ଘାଇରେ ପାଦ ଦେଇଛି। ସକାଳୁ ସକାଳୁ ଉପକୂଳବର୍ତ୍ତୀ ଅଞ୍ଚଳରେ ଜୋରଦାର ବର୍ଷା ଓ ପବନ ଆରମ୍ଭ ହୋଇଯାଇଛି। ବର୍ଷା ଭିତରେ ଜିନପିଙ୍ଗ ସରକାର ସୁରକ୍ଷା ଦୃଷଟିରେ ବିମାନ ଚଳାଚଳା, ରାସ୍ତାରେ ବାହାନ ଯିବା ଆସିବା ଓ ରେଳ ସେବାକୁ ବନ୍ଦ କରିଦେଇଛନ୍ତି।
ଏହା ପୂର୍ବରୁ ୧୯୪୯ ରେ ବାତ୍ୟା କାରଣରୁ ବଡ଼ ଧରଣର କ୍ଷୟକ୍ଷତି ହୋଇଥିଲା। ଚୀନ୍ ପାଣିପାଗ ବିଭାଗର ସୂଚନା ଅନୁସାରେ, ’ବେବିନକା’ ର କ୍ଷୟକ୍ଷତି ପୂର୍ବ ତୁଳନାରେ ଅଧିକ ହୋଇପାରେ। ଆଜି ସହରର ବହୁ ଭାଗରେ ପ୍ରବଳ ଝଡ-ବର୍ଷା ହେବାର ସତର୍କ ସୂଚନା ଜାରି କରାଯାଇଛି। ସରକାରଙ୍କ ନିର୍ଦେଶ ପରେ ଜରୁରୀକାଳୀ ଟିମ୍କୁ ସତର୍କ ରଖାଯାଇଛି।
ଚୀନ୍ ସରକାରୀ ମିଡିଆର ସୂଚନା ଅନୁସାରେ, ସଙ୍ଘାଇରେ ୭୫ ବର୍ଷ ପରେ ସବୁଠାରୁ ଶକ୍ତିଶାଳୀ ବାତ୍ୟା ‘ବେବିନକା’ ସୋମବାର ପାଦ ଦେଇଛି। ସହରରେ ରେଡ୍ ଆର୍ଲଟ ଜାରି କରି ଦିଆଯାଇଛି। ଉପକୂଳବର୍ତ୍ତୀ ଅଞ୍ଚଳରେ ଥିବା ଲୋକଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ନିଆଯାଇଛି। ଚୀନ୍ ପାଣିପାଗ ବିଭାଗ ପ୍ରଶାସନକୁ କହିଛି ଯେ, ବାତ୍ୟା ସୋମବାର ସକାଳେ ସହରର ପୂର୍ବରେ ପୁଡୋଙ୍ଗର ଲିଙ୍ଗାଙ୍ଗ ନ୍ୟୁ ସିଟିର ଉପକୂଳବର୍ତ୍ତୀ ଅଞ୍ଚଳରେ ପହଁଞ୍ଚିଛି। ଉପକୂଳବର୍ତ୍ତୀ ଅଞ୍ଚଳରେ ବାତ୍ୟାର କରାଳ ରୂପ ଦେଖିବାକୁ ମିଳିଛି। ସହରରେ ଥିବା ଗଛ ଏବଂ ବିଲ୍ ବୋର୍ଡ ସବୁ ଭାଙ୍ଗିଯାଛି। ସମୁଦ୍ରରେ ବଡ ବଡ ଜୁଆର ଆସୁଥିବାର ସୂଚନା ମଧ୍ୟ ମିଳିଛି।
