ନୂଆଦିଲ୍ଲୀ: ହରିୟାଣା ଏବଂ ଜାମ୍ମୁ କାଶ୍ମୀରରେ ଅନୁଷ୍ଠିତ ବିଧାନସଭା ନିର୍ବାଚନର ଫଳାଫଳ ଆସି ସାରିଛି । ହରିୟାଣାରେ ବିଜେପି ତୃତୀୟ ଥର ପାଇଁ ସରକାର ଗଠନ କରିବାକୁ ଯାଉଥିବାବେଳେ ଜାମ୍ମୁ କାଶ୍ମୀରରେ କଂଗ୍ରେସ-ନ୍ୟାସନାଲ କନଫରେନ୍ସ ମିଳିତ ମଞ୍ଚକୁ ସଂଖ୍ୟାଗରିଷ୍ଠତା ମିଳିଛି । ତେବେ ଜାମ୍ମୁ କାଶ୍ମୀର ନିର୍ବାଚନରେ ସମାଜବାଦି ପାର୍ଟିକୁ ସବୁଠାରୁ ବଡ ଝଟକା ଲାଗିଛି । ଉତ୍ତରପ୍ରଦେଶ ବାହାରେ ନିଜ ଦଳକୁ ବିସ୍ତାର କରିବାକୁ ଚେଷ୍ଟା କରୁଥିବା ଅଖିଳେଶ ଯାଦବ ଜାମ୍ମୁ କାଶ୍ମୀରର ୨୦ ଟି ଆସନରେ ପ୍ରାର୍ଥୀ ଦେଇଥିଲେ । ସେଥିମଧ୍ୟରୁ ୫ ଟି ଆସନ ଜାମ୍ମୁରେ ଏବଂ ୧୫ ଟି ଆସନ କାଶ୍ମୀରରେ ଥିଲା। ତେବେ ସମାଜବାଦୀ ପାର୍ଟି ଗୋଟିଏ ଆସନରେ ମଧ୍ୟ ନିର୍ବାଚନରେ ଜିତିବାରେ ସଫଳ ହୋଇନାହିଁ ।
ଟ୍ରେଣ୍ଡ ଅନୁଯାୟୀ ସମାଜବାଦୀ ପାର୍ଟି ୦.୧୪ ପ୍ରତିଶତ ଭୋଟ୍ ପାଇଛି, ଯାହା NOTA ଠାରୁ କମ୍ ଅଟେ । ଜାମ୍ମୁ କାଶ୍ମୀରରେ NOTA ୧.୪୮ ପ୍ରତିଶତ ଭୋଟ୍ ପାଇଥିବା ଜଣାପଡିଛି । ଏଭଳି ପରିସ୍ଥିତିରେ ଲୋକସଭା ନିର୍ବାଚନରେ ଉତ୍ତରପ୍ରଦେଶରେ ଚମତ୍କାର ପ୍ରଦର୍ଶନ କରିଥିବା ସମାଜବାଦୀ ପାର୍ଟି ପାଇଁ ଏହା ଏକ ବଡ ଝଟକା ବୋଲି ବିବେଚନା କରାଯାଉଛି ।
ଜାମ୍ମୁ କାଶ୍ମୀରରେ ଏପର୍ଯ୍ୟନ୍ତ ଚାଲିଥିବା ଟ୍ରେଣ୍ଡରେ କଂଗ୍ରେସ-ଏନସି ମିଳିତ ମଞ୍ଚ ୪୮ଟି ଏବଂ ବିଜେପି ୨୯ ଟି ଆସନ ପାଇଥିବା ଜଣାପଡିଛି । ଅନ୍ୟମାନେ ୧୩ ଟି ଆସନ ପାଇବେ ବୋଲି ଆଶା କରାଯାଉଛି ଜାମ୍ମୁ କାଶ୍ମୀରରେ ଏପର୍ଯ୍ୟନ୍ତ ବିଜେପିର ସର୍ବୋତ୍ତମ ପ୍ରଦର୍ଶନ ରହିଛି । ଏହାପୂର୍ବରୁ ୨୦୧୪ ନିର୍ବାଚନରେ ବିଜେପି ୨୪ ଟି ଆସନ ଜିତିଥିଲା।