ନୂଆଦିଲ୍ଲୀ: ମଙ୍ଗଳବାର ଦିନ ମନିଲା ଅନ୍ତର୍ଜାତୀୟ ବିମାନବନ୍ଦରରୁ ପୂର୍ବତନ ଫିଲିପାଇନ୍ସ ରାଷ୍ଟ୍ରପତି ରୋଡ୍ରିଗୋ ଦୁତେର୍ତେଙ୍କୁ ଗିରଫ କରାଯାଇଛି। ଅନ୍ତର୍ଜାତୀୟ ଅପରାଧ ଅଦାଲତର ନିର୍ଦ୍ଦେଶରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି ବୋଲି ଜମାପଡିଛି। ପ୍ରକୃତରେ, ମାନବତା ବିରୋଧୀ ଅପରାଧ ପାଇଁ ଆନ୍ତର୍ଜାତୀୟ ଅପରାଧ ଅଦାଲତ ଦୁତେର୍ତେଙ୍କ ବିରୋଧରେ ଗିରଫ ପରୱାନା ଜାରି କରିଥିଲା। ଦୁତେର୍ତେ ମଙ୍ଗଳବାର ହଂକଂରୁ ଫିଲିପାଇନ୍ସର ରାଜଧାନୀ ମନିଲାରେ ପହଞ୍ଚିଥିଲେ। ଯେଉଁଠାରୁ ପୋଲିସ ତାଙ୍କୁ ବିମାନବନ୍ଦରରୁ ହିଁ ନିଜ ହେପାଜତକୁ ନେଇଥିଲା ବୋଲି ଜଣାପଡିଛି।
ଦୁତେର୍ତେ ମେୟର ଥିବା ସମୟରେ ତାଙ୍କ ବିରୋଧରେ ନିଶା କାରବାରରେ ଜଡିତ ତିବା ନେଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ତେବେ ଏହି ସମୟରେ ସେ ହିଂସାତ୍ମକ ଭାଷଣ ଦେବାରୁ ଲୋକମାନଙ୍କ ମଧ୍ୟରେ ହିଂସା ଦେଖାଦେଇ ଅନେକ ଗଣହତ୍ୟା ସଂଗଟିତ ହୋଇଥିଲା। ଅନ୍ତର୍ଜାତୀୟ ଅପରାଧ ଅଦାଲତ ୨୦୧୧ମସିହା ନଭେମ୍ବର ୧ ତାରିଖରେ ତାଙ୍କ ବିରୋଧରେ ତଦନ୍ତ ଆରମ୍ଭ କରିଥିଲା। ସେହି ସମୟରେ ଦୁତେର୍ତେ ଫିଲିପାଇନ୍ସର ଡାଭାଓ ସହରର ମେୟର ଭାବେ କାର୍ଯ୍ୟରତ ଥିଲେ। ଆଇସିସିର ଏହି ତଦନ୍ତ ୨୦୧୯ମସିହା ମାର୍ଚ୍ଚ ୧୬ ତାରିଖ ପର୍ଯ୍ୟନ୍ତ ଚାଲିଥିଲା। ତେବେ ପରେ ଦୁତେର୍ତେ ରାଷ୍ଟ୍ରପତି ପଦରେ ବସିବା ପରେ ଆଇସିସିର ତଦନ୍ତକୁ ବାତିଲ କରିବାକୁ ଚେଷ୍ଟା କରାଯାଇଥିଲା। ତଥାପି ଆଇସିସି ଦୁତେର୍ତେଙ୍କ ଦାବିକୁ ପ୍ରତ୍ୟାଖ୍ୟାନ କରିଥିଲା। ତେବେ ଦୁତେର୍ତେ ୨୦୨୨ ମସିହାରେ ଫିଲିପାଇନ୍ସରୁ ନିଜ କ୍ଷମତାରୁ ଓହରି ଥିଲେ।
ଦୁତେର୍ତେଙ୍କ ପ୍ରଶାସନ ୨୦୨୧ ମସିହାରେ ବିଶ୍ୱ ଅଦାଲତର ତଦନ୍ତକୁ ସ୍ଥଗିତ ରଖିବାକୁ ପ୍ରସ୍ତାବ ଦେଇଥିଲା। ଏନେଇ ତାଙ୍କ ପ୍ରଶାସନ ଯୁକ୍ତି ଦେଇଥିଲା ଯେ ଫିଲିପାଇନ୍ସ ଦେଶର କର୍ତ୍ତୃପକ୍ଷ ପୂର୍ବରୁ ଏହି ଅଭିଯୋଗ ଗୁଡ଼ିକର ତଦନ୍ତ ଜାରି ରଖିଛନ୍ତି। ଏହାଛଡା ଏହି ମାମଲା ଅନ୍ତର୍ଜାତୀୟ ଅପରାଧ ଅଦାଲତର କ୍ଷେତ୍ରାଧିକାର ଅଧୀନରେ ଆସୁ ନାହିଁ। ତେଣୁ ଆଇସିସି ଏହି ମାମଲାକୁ ବନ୍ଦ କରିଦେବା ଉଚିତ ହେବ ବୋଲି ଦୁତେର୍ତେଙ୍କ ପ୍ରଶାସନ ଯୁକ୍ତି ଦେଇଥିଲେ।ତେବେ ୨୦୨୩ ମସିହା ଜୁଲାଇ ମାସରେ କୋର୍ଟ ଦୁତେର୍ତେଙ୍କ ପ୍ରଶାସନର ଆପତ୍ତିକୁ ପ୍ରତ୍ୟାଖ୍ୟାନ କରିବା ସହ ପୁଣି ତଦନ୍ତ ଆରମ୍ଭ କରିବାକୁ ରାୟ ପ୍ରଦାନ କରିଥିଲେ।
