ଝରିଗାଁ, ୨୫/୦୮ : ସାପ୍ତାହିକ ବଜାରକୁ ଯିବା ବାଟରେ ଦୁର୍ଘଟଣା। ଚାଲିଗଲା ନାବାଳକଙ୍କ ଜୀବନ, ୨ ଆହତ। ନବରଙ୍ଗପୁର ଜିଲ୍ଲା ଝରିଗାଁ ଥାନା କନ୍ଧଗୁଡ଼ା ଗାଁ ନିକଟରେ ରବିବାର ଅପରାହ୍ନ ୩ଟାରେ ଏହି ଦୁର୍ଘଟଣା ଘଟିଛି । ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସୂଚନାନୁଯାୟୀ, ଚଚା ପଞ୍ଚାୟତ ଅନ୍ତର୍ଗତ ଥାଟବେଡା ଗ୍ରାମର ଦୁର୍ଯ୍ୟଧନ ଭତ୍ରା (୨୫ ବର୍ଷ), ଯଜମନ ଭତ୍ରା(୧୭ ବର୍ଷ) ଏବଂ ମଙ୍ଗରୁ ଭତ୍ରା(୨୬ ବର୍ଷ) ରବିବାର ଅପରାହ୍ନ ୩ଟାରେ ଏକ ବାଇକ୍ ଯୋଗେ ଦେଉଳକୋଣା ସ୍ଥିତ ସାପ୍ତାହିକ ବଜାରକୁ ଯାଉଥିଲେ। ବାଟରେ କନ୍ଧଗୁଡା ଗାଁ ନିକଟରେ ଦୁର୍ଘଟଣା ଘଟିଥିଲା। ଭାରସାମ୍ୟ ହରାଇ ମୋଟର ସାଇକେଲରୁ ତିନି ଆରୋହୀ ତଳେ ପଡ଼ି ଯାଇଥିଲେ। ଯଜମନ ଭତ୍ରାଙ୍କ ମୁଣ୍ଡରେ ଆଘାତ ଲାଗିଥିବାରୁ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ଆଉ ଦୁଇଜଣ ଆହତ ହୋଇଥିଲେ। ତିନି ଜଣଙ୍କୁ ଝରିଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଅଣାଯାଇଥିଲା । ଘଟଣାସ୍ଥଳରେ ଥାନା ଅଧିକାରୀ ପ୍ରଦୀପ କୁମାର ଶବର, ହାବିଲଦାର ମୁରଲୀ ବିଶୋଇ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଦୁର୍ଯ୍ୟୋଧନଙ୍କ ଗୋଡ ଭାଙ୍ଗିଥିବା ଯୋଗୁଁ ତାଙ୍କୁ ଉମରକୋଟ ମେଡ଼ିକାଲକୁ ସ୍ଥାନାନ୍ତରିତ କରାଯାଇଛି।
