ଖନ୍ତାପଡ଼ା, ୨୫/୦୮ : ବାଲେଶ୍ଵର ଜିଲ୍ଲା ବାହାନଗା ବ୍ଲକ ପଥରପେଣ୍ଟ ପଞ୍ଚାୟତ ବଗଲପୁର ସରକାରୀ ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବ। ୫ଟି ଶ୍ରେଣୀକୁ ଜଣେ ଶିକ୍ଷୟିତ୍ରୀରେ ଚାଲିଛି ପାଠପଢା। ଛାତ୍ରଛାତ୍ରୀଙ୍କ ପାଠପଢାରେ ବ୍ୟାଘାତ। ସ୍କୁଲ୍ ଗେଟ୍ରେ ତାଲା ପକାଇଲେ ଅଭିଭାବକ। ରାସ୍ତାରେ ବସିଲେ ଛାତ୍ରଛାତ୍ରୀ।
ସୂଚନା ମୁତାବକ, ବଗଲପୁର ସରକାରୀ ପ୍ରାଥମିକ ବିଦ୍ୟାଳୟରେ ଶିଶୁ ବାଟିକାରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ନାମ ଲେଖା ଯାଇଥିଲା। ଏହି ବିଦ୍ୟାଳୟରେ ମୋଟ ୪୫ ଜଣ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି। ପାଞ୍ଚଟି ଶ୍ରେଣୀରେ ଜଣେ ଶିକ୍ଷୟିତ୍ରୀ ପାଠ ପଢାଉଛନ୍ତି। ଯାହାଫଳରେ ଛାତ୍ରଛାତ୍ରୀଙ୍କ ପାଠପଢାରେ ବ୍ୟାଘାତ ସୃଷ୍ଟି ହେଉଛି। ଏପରିକି ବିଦ୍ୟାଳୟରେ ଯଦି କୌଣସି ସରକାରୀ କାର୍ଯ୍ୟରେ ଦିଦି ବ୍ୟସ୍ତ ରହିଲେ ଶ୍ରେଣୀ ଗୃହ ଫାଙ୍କା ପଡୁଛି। ଗତ ଏପ୍ରିଲରେ ଜଣେ ଶିକ୍ଷୟିତ୍ରୀ ଅବସର ନେଇ ସାରିଥିବା ବେଳେ ୪ ମାସ ହେଲା ଜଣେ ଶିକ୍ଷୟିତ୍ରୀରେ ପାଠପଢା ଚାଲିଛି। ଉଚ୍ଚ କର୍ତ୍ତୃପକ୍ଷ ଓ ବିଭାଗୀୟ ଅଧିକାରୀଙ୍କୁ ବାରମ୍ଵାର ଅବଗତ କରିଥିଲେ ସୁଦ୍ଧା କୌଣସି ସୁଫଳ ମିଳୁନି। ଯାହାଦ୍ଵାରା ଅଭିଭାବକମାନେ ଆଜି ସ୍କୁଲ ଗେଟ୍ରେ ତାଲା ପକାଇ ଧାରଣା ଦେଇଛନ୍ତି। ଆଗାମୀ ଦିନରେ ଏହି ସ୍କୁଲରେ ଶିକ୍ଷକ ଶିକ୍ଷୟିତ୍ରୀଙ୍କୁ ନିଯୁକ୍ତି ଦିଆନଗଲେ ଆନ୍ଦୋଳନ ଜୋର୍ ଧରିବ ବୋଲି ଚେତାବନୀ ଦେଇଛନ୍ତି। ଘଟଣା ବିଷୟରେ ବାଲେଶ୍ୱର ଜିଲ୍ଲା ଶିକ୍ଷା ଅଧିକାରୀଙ୍କ ମତାମତ ନେବାରୁ ସେ ଜିଲ୍ଲାପାଳଙ୍କ ସହିତ ଘଟଣା ବାବଦରେ କଥା ହେଉଛନ୍ତି ବୋଲି ମତ ଦେଇଛନ୍ତି।
