ପୁରୀ, ୨୭/୦୭ : ଚଳନ୍ତା ଟ୍ରେନ୍‌ରେ ଲାଗିଲା ନିଆଁ। ପୁରୀ ହୁଳହୁଳିଆ ପୋଲ ମଝିରେ ଅନୁଗୋଳ-ପୁରୀ ପାସେଞ୍ଜର ଟ୍ରେନ୍‌ରେ ନିଆଁ‌ ଲାଗିଯାଇଥିଲା। ରେଳ କର୍ମଚାରୀ ନିଆଁକୁ ଆୟତ୍ତ କରିଛନ୍ତି। ଏଥିରେ କାହାର କୌଣସି କ୍ଷୟକ୍ଷତି ହୋଇନଥିବା ସୂଚନା ମିଳିଛି।

ସୂଚନାନୁଯାୟୀ, ଶନିବାର ୧୧ଟା ୫୫ରେ ଅନୁଗୋଳ-ପୁରୀ ପାସେଞ୍ଜର ଟ୍ରେନ୍‌ ମାଳତୀପାଟପୁର ଷ୍ଟେସନରେ ପହଞ୍ଚିଥିଲା। ସେଠାରୁ ଟ୍ରେନ୍ ଛାଡିବା ପରେ ହୁଳହୁଳିଆ ପୋଲ ମଝିରେ ଟ୍ରେନ୍‌ରେ ନିଆଁ ଲାଗିଥିବା ଜଣାପଡିଥିଲା। ଟାକ୍ସନ ମୋଟରରେ କିଛି ଅସୁବିଧା ହେବାରୁ ଏହି ନିଆଁ ଲାଗିଥିଲା। ତେବେ ରେଳ କର୍ମଚାରୀ ତୁରନ୍ତ ନିଆଁକୁ ଆୟତ୍ତ କରିବା ସହ ଯାତ୍ରୀମାନଙ୍କୁ ଭୟଭୀତ ନହେବା ପାଇଁ ସୂଚନା ଦେଇଥିଲେ। କେଉଁ ସ୍ଥିତିରେ ଏହି ଅଘଟଣ ଘଟିଥିଲା ସେନେଇ ରେଳ ବିଭାଗ ପକ୍ଷରୁ ତଦନ୍ତ କରାଯିବ ବୋଲି କହିଛନ୍ତି ଜିଆରପି ଅଧିକାରୀ ସନ୍ତୋଷ କୁମାର ବାହିନୀପତି।