ଭୁବନେଶ୍ୱର,୦୭/୦୯: ସହରାଞ୍ଚଳ ବାସିନ୍ଦାଙ୍କୁ ରାଜ୍ୟରେ ପ୍ରଧାନମନ୍ତ୍ରୀ ଆବାସ ଯୋଜନାରେ ମିଳିବ ୫ ଲକ୍ଷ ଘର । ଏ ନେଇ କେନ୍ଦ୍ରକୁ ଚିଠି ଲେଖିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ମୋର ବିଶ୍ୱାସ ଅଛି, କେନ୍ଦ୍ର ଏହି ଘର ନିହାତି ମଞ୍ଜୁର କରିବ ବୋଲି ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଡାକ୍ତର କୃଷ୍ଣଚନ୍ଦ୍ର ମହାପାତ୍ର କହିଛନ୍ତି ।
ଶୁକ୍ରବାର ଗୃହରେ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ଖର୍ଚ୍ଚ ଦାବି ଉପସ୍ଥାପନ କରି ମନ୍ତ୍ରୀ ଡାକ୍ତର ମହାପାତ୍ର କହିଛନ୍ତି ଯେ, ପୂର୍ବ ସରକାର ସମୟରେ କୋଠାଘର ଥିବା ଲୋକଙ୍କୁ ବି ଆବାସ ଦିଆଯାଇଥିଲା । ସେମାନେ ଗୁହାଳ ଘର ଦେଖାଇ ଆବାସ ଯୋଜନାରେ ଘର ନେଇଥିଲେ । ମାତ୍ର ଯେଉଁମାନେ ଦିନରେ ସୂର୍ଯ୍ୟ ଓ ରାତିରେ ତାରା ଦେଖା ଯାଉଥିବା ଘରେ ରହୁଛନ୍ତି, ସେମାନଙ୍କୁ ଆବାସରେ ଘର ମିଳିନଥିଲା । ଏପରିକି ମୋ ଅଞ୍ଚଳରେ ଜଣେ ମହିଳାଙ୍କ ନାମ ଆବାସ ତାଲିକାରେ ଥିଲା । ହେଲେ ସେ ୨୦ ହଜାର ଟଙ୍କା ନ ଦେଇପାରିବାରୁ ତାଲିକାରୁ ତାଙ୍କ ନାମ କାଟି ଦିଆଯାଇଥିଲା ବୋଲି ମନ୍ତ୍ରୀ କହିଥିଲେ ।
ସେହିପରି ଗତ ସରକାର ବେଳେ ରାଜ୍ୟରେ ମୁକ୍ତା ଯୋଜନାରେ କୋଟି କୋଟି ଟଙ୍କା ବାଟମାରଣା ହୋଇଛି ବୋଲି ମନ୍ତ୍ରୀ କହିଥିଲେ । ଏହି ଯୋଜନାରେ ବିନା ଟେଣ୍ଡର୍ରେ ଠିକାଦାରୀ ଦିଆଯାଇଥିଲା । ହେଲେ କାର୍ଯ୍ୟାଦେଶ ବିଭିନ୍ନ ସ୍ୱୟଂ ସହାୟକ ଗୋଷ୍ଠୀର ମହିଳାମାନଙ୍କ ନାମରେ ରହିଥିଲା । ବିନା ଟେଣ୍ଡରରେ ୧୦ ଲକ୍ଷ ଓ ୧୫ ଲକ୍ଷର କାମ ବାଣ୍ଟି ଦିଆଯାଇଥିଲା । ହେଲେ ସେହି ଏସ୍ଏଚ୍ଜି ସଦସ୍ୟାମାନଙ୍କୁ ମାତ୍ର ୭.୫ ପ୍ରତିଶତ କାମ ତଦାରଖ ପାଇଁ ଦିଆଯାଇଛି । ନା ପୋଖରୀ ଶୁଖାଯାଇଛି, ନା ହୋଇଛି ପଙ୍କୋଦ୍ଧାର । ସବୁ ଠିକାଦାର ଖାଇ ଯାଇଛନ୍ତି । ହେଲେ ତଦନ୍ତ ହେଲେ ମା’ମାନେ ଫସିବେ । ଚିନ୍ତାମଣିଶ୍ୱରରେ ଥିବା ପୋଖରୀ କାମ ଚାଲୁଛି ଯେ ସରିବାର ନାମ ନେଉନି । ସ୍ଥାନୀୟ ରାସ୍ତା ଅବସ୍ଥା ବି ବହୁତ ଖରାପ ଯାହା ବିଧାୟକଙ୍କ ଅନୁରୋଧ ପରେ ସେଠାକୁ ଯିବାରୁ ଜାଣିପାରିଲି । ସେହିଦିନ ସନ୍ଧ୍ୟା ସୁଦ୍ଧା ରାସ୍ତା ଅବସ୍ଥା ସୁଧୁରିଲା । ଏହା ସହିତ ବିଜେପି ଭୋଟର ରହୁଥିବା ଅଞ୍ଚଳକୁ ଲାଇଟ୍ ଦିଆଯାଉନଥିବାରୁ ତୁରନ୍ତ ଲାଇଟ୍ ବି ଦିଆଯାଇଛି ବୋଲି ମନ୍ତ୍ରୀ କହିଛନ୍ତି ।
ଆଗାମୀ ଦିନରେ ରାଜ୍ୟକୁ ମିଳିବ ୪ ଶହ ପିଏମ୍ ଇ-ବସ୍ । ଏହା ବ୍ୟତୀତ ଅମୃତ ୨.୦ରେ ୩୫୧ ପ୍ରକଳ୍ପ ପାଇଁ ୧୩୭୩ କୋଟି ରହିଛି । ଏହା ଦ୍ୱାରା ଜଳାଶୟଗୁଡିକର ପୁନରୁଦ୍ଧାର କରାଯିବ । ସ୍ୱଚ୍ଛ ଭାରତ ମିଶନରେ ୫୩୩.୬୬ କୋଟି ବ୍ୟୟବରାଦ ରହିଛି । ୨୦୨୩ରେ ସ୍ୱଚ୍ଛ ସର୍ବେକ୍ଷଣ ପ୍ରତିଯୋଗିତାରେ ଚତୁର୍ଥ ସ୍ଥାନରେ ଥିବା ଓଡ଼ିଶା ଆଗାମୀ ଦିନରେ ପ୍ରଥମ ସ୍ଥାନ ହାସଲ କରିବା ପାଇଁ ପ୍ରୟାସ ଜାରି ରହିବ । ତେବେ ଚଳିତ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ବଜେଟ୍ରେ ୯୬୧୨ କୋଟି ୯ ଲକ୍ଷ ୫ହଜାର ଟଙ୍କା ରହିଛି ଯାହା ୨୦୨୩-୨୦୨୪ ବଜେଟଠୁ ପ୍ରାୟ ୨୨% ଅଧିକ ବୋଲି ମନ୍ତ୍ରୀ ଡାକ୍ତର ମହାପାତ୍ର କହିଛନ୍ତି ।