ଭୁବନେଶ୍ୱର,୧୬/୦୯: ଆସନ୍ତା ୧୭ ତାରିଖ (ମଙ୍ଗଳବାର)ରେ ଭୁବନେଶ୍ୱରରେ  ‘ସୁଭଦ୍ରା’ ଯୋଜନାର ଶୁଭାରମ୍ଭ ହେବ । ଏହି ଅବସରରେ ଭୁବନେଶ୍ୱର ମହାନଗର ନିଗମ  (ବିଏମ୍‌ସି) ଅନ୍ତର୍ଗତ ସମସ୍ତ ସ୍କୁଲ୍‌,କଲେଜ ଓ ବିଶ୍ୱବିଦ୍ୟାଳୟକୁ ସଂପୂର୍ଣ୍ଣ ଛୁଟି ଘୋଷଣା କରାଯାଇଛି । ହେଲେ ଏହାକୁ ନେଇ ଏବେ ଘରୋଇ ସ୍କୁଲ କର୍ତ୍ତୃପକ୍ଷଙ୍କ ଚିନ୍ତା । ରାଜଧାନୀରେ  ଅଧିକାଂଶ ଘରୋଇ ସ୍କୁଲର ମଙ୍ଗଳବାରଠାରୁ ଅର୍ଦ୍ଧବାର୍ଷିକ ପରୀକ୍ଷା ଆରମ୍ଭ ନେଇ ଅଗ୍ରୀମ୍‌ କାର୍ଯ୍ୟସୂଚୀ ଜାରି ହୋଇଥିଲା । ହେଲେ ରାଜ୍ୟ ସରକାରଙ୍କ ଛୁଟି ଘୋଷଣା ଏବେ କର୍ତ୍ତୃପକ୍ଷଙ୍କୁ  ଚିନ୍ତାରେ ପକାଇଛି । ଅନେକ ସ୍କୁଲ ପରୀକ୍ଷା ଘୁଞ୍ଚାଇ ଥିବା ବେଳେ ଆଉ କିଛି ସ୍କୁଲ ଅନ୍‌ଲାଇନ୍‌ରେ ପରୀକ୍ଷା କରିବାକୁ ନିଷ୍ପତ୍ତି ନେଇଛନ୍ତି । ଏନେଇ ମଧ୍ୟ ବିଜ୍ଞପ୍ତି ଜାରି କରିଛନ୍ତି । 

ଗୋଟିଏ ଘରୋଇ ସ୍କୁଲ ସଂଗଠନର ସାରା ରାଜ୍ୟରେ ତାର ସ୍କୁଲ ରହିଛି । ଏହି ସ୍କୁଲର ସମସ୍ତ ପରୀକ୍ଷା ସାରା ରାଜ୍ୟରେ ଏକା ସମୟରେ ଅନୁଷ୍ଠିତ ହୁଏ । ସେହି  ଆଧାରରେ ମଙ୍ଗଳବାରଠୁ ଏହି ସ୍କୁଲର ଅର୍ଦ୍ଧବାର୍ଷିକ ପରୀକ୍ଷା ଅନୁଷ୍ଠିତ ହେବାକୁ ଥିଲା ।  ତେବେ ସାରା ରାଜ୍ୟରେ ଏକକାଳୀନ ପରୀକ୍ଷା ଗୋଟିଏ ପ୍ରଶ୍ନପତ୍ର ପ୍ରସ୍ତୁତ ହେଉଛି ।  ଏପଟେ ସରକାରଙ୍କ ନିର୍ଦ୍ଦେଶ ସ୍କୁଲ ଖୋଲାଯିବ ନାହିଁ। ଅନ୍ୟପଟେ ପରୀକ୍ଷା । ଏହାକୁ  କର୍ତ୍ତୃପକ୍ଷ ଅକଳରେ ପଡ଼ିଥିଲେ । ବାଧ୍ୟ ହୋଇ ସଂସ୍ଥାର ମୁଖ୍ୟ ସହ ଆଲୋଚନା  କରିଥିଲେ । ରାଜଧାନୀରେ ଥିବା ତାଙ୍କର ସମସ୍ତ ସ୍କୁଲର ନର୍ସରୀରୁ ଷ୍ଟାଣ୍ଡାର୍ଡ-୨ ପର୍ଯ୍ୟନ୍ତ  ଛୁଟି ଘୋଷଣା କରାଯାଇଛି । ଅନ୍ୟପଟେ ତୃତୀୟରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପିଲାଙ୍କର  ଅର୍ଦ୍ଧବାର୍ଷିକ ପରୀକ୍ଷା ଅନ୍‌ଲାଇନ୍‌ ମାଧ୍ୟମରେ କରିବାକୁ ନିଷ୍ପତ୍ତି ନିଆଯାଇଛି।