ଭୁବନେଶ୍ବର, ୧୮।୯ : ଆକାଉଣ୍ଟରୁ ଟଙ୍କା ହଡପ କରିବା ଅଭିଯୋଗରେ ପୋଷ୍ଟ ମାଷ୍ଟରଙ୍କୁ ୪ବର୍ଷ ଜେଲଦଣ୍ଡ ଶୁଣାଇଛନ୍ତି ସ୍ବତନ୍ତ୍ର ସିବିଆଇ କୋର୍ଟ। ଏଥିସହ ୫୫ ହଜାର ଟଙ୍କା ଜରିମାନା ଦେବାକୁ ରାୟରେ ଦର୍ଶାଇଛନ୍ତି। ଅଭିଯୁକ୍ତ ଜଣକ ହେଉଛନ୍ତି ଜଗତସିଂହପୁର ଜିଲ୍ଲା କୁଜଙ୍ଗ ଉପଡାକଘରର ପୂର୍ବତନ ପୋଷ୍ଟ ମାଷ୍ଟର ସଂଗ୍ରାମ କେଶରୀ ବେହେରା।
କୁଜଙ୍ଗ ଉପ ଡାକଘରର ପୂର୍ବତନ ପୋଷ୍ଟ ମାଷ୍ଟର ସଂଗ୍ରାମ ନିଜ ପଦର ଅପବ୍ୟବହାର କରି ୪ଜଣ ବରିଷ୍ଠ ନାଗରିକଙ୍କ ସିନିୟର ସିଟିଜେନ୍ସ ସେଭିଙ୍ଗ ସ୍କିମ ଆକାଉଣ୍ଟରୁ ଟଙ୍କା ହଡପ କରିଥିଲେ। ଜମା ଖାତାଧାରୀଙ୍କ ଅଜାଣତରେ ନକଲି ଦସ୍ତଖତ କରି ୧୯,୮୧, ୩୩୪ ଲକ୍ଷ ଟଙ୍କା ଉଠାଇ ନେଇଥିଲେ । ଏପରକି ଉକ୍ତ ଆକାଉଣ୍ଟକୁ ବନ୍ଦ ମଧ୍ୟ କରି ଦେଇଥିଲେ। ଏ ନେଇ ସିବିଆଇରେ ୧୭.୦୯.୨୦୧୩ରେ ମାମଲା ରୁଜୁ ହୋଇଥିଲା। ସିବିଆଇ ଏହାର ତଦନ୍ତ କରି ୨୮.୩.୨୦୧୪ରେ କୋର୍ଟରେ ଚାର୍ଜସିଟ୍ ଦାଖଲ କରିଥିଲା।