ଭୁବନେଶ୍ୱର,୧୬/୦୯: ରାଜ୍ୟରେ ଆଳୁ ଦର ୧୫ରୁ ୨୦ ଟଙ୍କା । ପିଆଜ ମଧ୍ୟ ୩୫ ଟଙ୍କା । ଆମେ ନାଫେଡ୍ ଜରିଆରେ ପିଆଜ ଯୋଗାଉଛୁ । ଗଣମାଧ୍ୟମକୁ ଏଭଳି କହିଛନ୍ତି ଖୋଦ୍ ଯୋଗାଣମନ୍ତ୍ରୀ କୃଷ୍ଣଚନ୍ଦ୍ର ପାତ୍ର । ହେଲେ ହାଟରେ ବାସ୍ତବ ସ୍ଥିତି କିଛି ଅଲଗା । ପିଆଜ ଦର ୫୦ରୁ ୫୫ । ଆଳୁ କିଲୋ ୩୦ରୁ ୩୫ ଟଙ୍କା । ତେବେ ଏଠି ପ୍ରଶ୍ନ କେଉଁଟା ଠିକ୍ । ମନ୍ତ୍ରୀଙ୍କ କଥା ଶୁଣି ଗ୍ରାହକ ଉତ୍ସାହିତ ହୋଇପଡ଼ୁଥିବା ବେଳେ ହାଟକୁ ଗଲେ ମୁଣ୍ଡ ବାଉଳା ହେଉଛି ।
ଦୁଇମାସ ତଳେ ରାଜ୍ୟରେ ଆଳୁ ଦର ହୁହୁ ହୋଇ ବଢ଼ିଲା । ୧୫ଦିନରେ ଦର ୫୦ ଟପିଗଲା । ବାରମ୍ବାର ଦାବି ଓ ଅଭିଯୋଗ ପରେ ରାଜ୍ୟ ସରକାରଙ୍କ ଚେତା ପଶିଥିଲା । ଯୋଗାଣ ମନ୍ତ୍ରୀ, ସଚିବ ନିଜେ ଗୋଦାମ ଠାରୁ ନେଇ ହାଟ ବୁଲିଲେ । ପଶ୍ଚିମବଙ୍ଗ ସହ ଉତ୍ତରପ୍ରଦେଶରୁ ଅଧିକ ଆଳୁ ଆସିଲା । ଖାଉଟିଙ୍କୁ ଡିଲରଙ୍କ ଜରିଆରେ ଆଳୁ ବିକ୍ରି କରାଗଲା । ହେଲେ ଏବେ ପିଆଜ, ଅଦା ଓ ରସୁଣ ବେଳକୁ ସମସ୍ତେ ଚୁପ୍ । ବେପାରୀଙ୍କୁ ଦରଦାମ କଥା ପଚାରିଲେ ସେମାନେ ସରକାରଙ୍କ ଦୋଷ ଦେଉଛନ୍ତି । ଗ୍ରାହକ ବି ଚିନ୍ତାରେ । ଭୁବନେଶ୍ୱର ହାଟରେ ଆଳୁ କିଲୋ ୩୫, ପିଆଜ ୫୫, ରସୁଣ କିଲୋ ୩୬୦ ଟଙ୍କା ରହିଛି ।
ସେହିଭଳି କଟକ ଛତ୍ର ବଜାରରେ ମଧ୍ୟ ପିଆଜ କିଲୋ ପ୍ରତି ୫୫ଟଙ୍କାରେ ବିକ୍ରି ହେଉଛି । ଆଳୁ କିଲୋ ସେଠାରେ ୩୦ ଟଙ୍କା । ବ୍ରହ୍ମପୁର ଓ ବାଲେଶ୍ୱରରେ ଆଳୁ କିଲୋ ୩୦ ଓ ପିଆଜ ୫୦ରୁ ୫୫ଟଙ୍କାରେ ବିକ୍ରି ହେଉଛି । ଏନେଇ ଛତ୍ରବଜାର ପନିପରିବା ବ୍ୟବସାୟୀ ସଂଘ ସଭାପତି ଦେବେନ୍ଦ୍ର ନାଥ ସାହୁ କହିଛନ୍ତି, ପିଆଜ ଦର ବଢ଼ିଛି । ଆନ୍ଧ୍ର ପିଆଜର ପାଇକାରୀ ଦର ୩୫ରୁ ୪୦ଟଙ୍କାରେ ବିକ୍ରି ହେଉଛି । ଗୁଜରାଟରୁ ରସୁଣ ଆସୁନଥିବାରୁ ତାର ଦର ମଧ୍ୟ ସେହିଭଳି ଅତ୍ୟଧିକ ରହିଛି ।
