ପୁରୀ,୦୭/୦୯: ଶ୍ରୀମନ୍ଦିରରେ ଶ୍ରୀକୃଷ୍ଣ ଲୀଳା ପାଳନ ଅବସରରେ ଶୁକ୍ରବାର ଅନ୍ଧ ମନ୍ଦିର ହାତୀ ଲୀଳା ଅନୁଷ୍ଠିତ ହୋଇଥିଲା । ମହାପ୍ରଭୁଙ୍କ ସନ୍ଧ୍ୟା ଆଳତି ବଢିଲା ପରେ ଏହି ନୀତି ସମ୍ପନ୍ନ ହୋଇଥିଲା । ଶ୍ରୀରାମକୃଷ୍ଣ ଠାକୁରଙ୍କ ଆଜ୍ଞାମାଳ ପାଇ ପାଲିଙ୍କିରେ ବିଜେ ହୋଇ ସିଂହଦ୍ୱାର ନିକଟରେ ପଡ଼ିଥିବା କାଠ ସିଂହାସନରେ ଅଧିଷ୍ଠିତ ହୋଇଥିଲେ । ସେଠାରେ ଅନ୍ଧ ମନ୍ଦିର ହାତୀ ପ୍ରସ୍ତାବ ଅନୁଷ୍ଠିତ ହୋଇଥିଲା । ଠାକୁରଙ୍କୁ ଶୀତଳ ଭୋଗ ଅର୍ପଣ କରାଯାଇ ବନ୍ଦାପନା କରାଯାଇଥିଲା । ଏହାପରେ ଠାକୁରେ ବାହୁଡ଼ା ବିଜେ କରିଥିଲେ ।
ପରମ୍ପରା ଅନୁଯାୟୀ ବାସେଳୀ ସାହିବାସିନ୍ଦାମାନେ ଏହି ନୀତିରେ ସାମିଲ୍ ହୋଇଥିଲେ । ବାସେଳୀ ସାହିର ସାହିନାୟକ ତଥା ଠାକୁରଙ୍କ ଶ୍ରୀଅଙ୍ଗ ଲାଗି ସେବକ ଦତ୍ତମହାପାତ୍ରଙ୍କ ପରିବାର ପକ୍ଷରୁ ଏକ କାଠ ନିର୍ମିତ ହାତୀ ବାହାରି ଶ୍ରୀମନ୍ଦିର ପାଶ୍ୱର୍ରେ ପହଞ୍ଚିଥିଲା । ହାତୀ ଚକ୍ଷୁରେ ନାଲି କପଡ଼ା ବାନ୍ଧି ଅଣାଯାଇଥିଲା । ଠାକୁରଙ୍କ ନୀତି ହୋଇ ଉକ୍ତ ନାଲି କପଡ଼ା ଖୋଲାଯିବାରେ ହାତୀ ମୋକ୍ଷ ପାଇଥିବା କୁହାଯାଏ । ଏନେଇ ଧନେଶ୍ୱର ଦତ୍ତମହାପାତ୍ର କୁହନ୍ତି ଏସବୁ ହେଉଛି ମହାପ୍ରଭୁଙ୍କ ଶ୍ରୀକୃଷ୍ଣ ଲୀଳା ଅନ୍ତର୍ଗତ । କଂସ ମଥୁରାକୁ ଡ଼କାଇ କୃଷ୍ଣ ବଳରାମଙ୍କୁ ହତ୍ୟା କରିବାକୁ ବିଭିନ୍ନ ଉପାୟ ଅବଲମ୍ବନ କରିଥିଲା । ଏକ ହାତୀକୁ ପ୍ରଚୁର ମଦ ପିଆଇ ରାମକୃଷ୍ଣଙ୍କୁ ମାରିଦେବାକୁ କଂସ ଷଡ଼ଯନ୍ତ୍ର କରିଥିଲା । ହାତୀକୁ ମଦ ପିଆଯାଇଥିବାରେ ମଦମତ୍ତ କିମ୍ବା ଅନ୍ଧ ହାତୀର ଆଖ୍ୟା ଦିଆଯାଏ । ରାମକୃଷ୍ଣ ଉକ୍ତ ହାତୀକୁ ମାରିଥିଲେ । ଅସଲରେ ସେହି ହାତୀ ହେଉଛନ୍ତି ଜଣେ ଦେବତା । ଠାକୁରଙ୍କ ହାତରେ ଜୀବନ ଯିବାରେ ସେ ମୁକ୍ତି ପାଇ ଯାଇଥିଲେ । ଏସବୁ ଭାଗବତରେ ବର୍ଣ୍ଣନା ରହିଥିବା ଶ୍ରୀ ଦତ୍ତମହାପାତ୍ର କୁହନ୍ତି।