ବାଙ୍ଗିରିପୋଷି,୧୬/୯: ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ବ୍ଲକ ଅନ୍ତର୍ଗତ ଚାକିଡି ଗ୍ରାମ ପଞ୍ଚାୟତର ବହୁ ଗାଁ ଏବେ ଜଳବନ୍ଦୀ। ଗତ ତିନି ଦିନ ଧରି ଲଗାଣ ବର୍ଷା ଫଳରେ ଫୁଲଝରା ଓ ବାସିଲକଚା ନିକଟରେ ଥିବା ଛୋଟ ପୋଲ ଗୁଡିକ ବନ୍ୟା ପାଣିରେ ବୁଡିଯାଇଛି। ଫଳରେ ଯାତାୟାତ ବିଚ୍ଛିନ୍ନ ହୋଇ ଯାଇଛି। ସେଠାକାର ସ୍ଥାନୀୟ ଲୋକେ ନାହିଁ ନଥିବା ଅସୁବିଧା ଭୋଗ କରୁଥିବାରୁ ପ୍ରଶାସନ ଦୃଷ୍ଟି ଦେବାକୁ ସ୍ଥାନୀୟ ବାସିନ୍ଦା ଲକ୍ଷ୍ମଣ ମୁର୍ମୁ କହିଛନ୍ତି। 

ସେହିପରି ବୁଢାବଳଙ୍ଗ ନଦୀରେ ବନ୍ୟା ସୃଷ୍ଟି ହେବାରୁ କୁସୁମତୋଟା, ଜାମତଳିଆ ଓ ଖଡିଘାଟି ଗ୍ରାମର ଲୋକମାନେ ସମ୍ପୂର୍ଣ୍ଣ ଭାବେ ବାହ୍ୟ ଜଗତରୁ ବିଚ୍ଛିନ୍ନ  ହୋଇ ଯାଇଛନ୍ତି । ଉକ୍ତ ଗ୍ରାମ ଗୁଡିକୁ ପହଞ୍ଚିବା ପାଇଁ ବୁଢାବଳଙ୍ଗ ନଦୀ ପାର ହେବା ହିଁ ଏକମାତ୍ର ରାସ୍ତା। ବନ୍ୟାଜଳ ନ କମିବା ପର୍ଯ୍ୟନ୍ତ ଗ୍ରାମବାସୀଙ୍କ ସହ ଯୋଗାଯୋଗ ସମ୍ଭବ ହେବନାହିଁ ବୋଲି ସ୍ଥାନୀୟ ସରପଞ୍ଚ ବିକ୍ରମ ମୁର୍ମୁ କହିଛନ୍ତି। ଗ୍ରାମବାସୀଙ୍କ ସୁରକ୍ଷା ଦୃଷ୍ଟିରୁ ନିକଟସ୍ଥ ସ୍କୁଲ କିମ୍ବା ଅନ୍ୟ ସୁରକ୍ଷିତ ସ୍ଥାନରେ ଆଶ୍ରୟ ନେବାକୁ ଅପିଲ କରିଛନ୍ତି।