ମାଲକାନଗିରି - ମାଲକାନଗିରି ଜିଲ୍ଲା ଶାଖା ଡିପ୍ଲୋମା ଇଂଜିନିୟର୍ସ ଆସୋସିଏସନ ପକ୍ଷରୁ ଇଂଜିନିୟର୍ସ ଦିବସ ପାଳିତ। ସ୍ଥାନୀୟ ସଂସ୍କୃତି ଭବନ ସଭା ଗୃହରେ ରବିବାର ରାତିରେ ୫୭ତମ ଇଂଜିନିୟର୍ସ ଦିବସ ପାଳିତ ହୋଇ ଯାଇଛି। ମାଲକାନଗିରି ଜିଲ୍ଲା ଶାଖାର ସଭାପତି ଇଂ ପ୍ରଶାନ୍ତ କୁମାର ବେହେରା ଏଥିରେ ଅଧ୍ୟକ୍ଷତା କରିଥିଲେ। ଉନ୍ନୟନମୂଳକ କାର୍ଯ୍ୟରେ ଯନ୍ତ୍ରୀଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିଥିବା କଥା ଉପସ୍ଥିତ ଅତିଥିମାନେ କହିଥିଲେ। 

ଏହି ଅବସରରେ ମୁଖ୍ୟ ଅତିଥି ଭାବେ ମାଲକ ବିଧାୟକ ନରସିଂହ ମାଡକାମୀ, ସମ୍ମାନୀତ ଅତିଥି ଭାବେ ଜିଲ୍ଲା ପରିଷଦ ଅଧ୍ୟକ୍ଷା ସମାରୀ ଟାଙ୍ଗୁଲ, ଗ୍ରାମ୍ୟଉନ୍ନୟନ ମୁଖ୍ୟ ନିର୍ମାଣ ଯନ୍ତ୍ରୀ ଇଂ ସୁଜିତ କୁମାର ବେହେରା, ପୂର୍ତ୍ତ ଗୃହ ନିର୍ମାଣ ମୁଖ୍ୟ ନିର୍ମାଣ ଯନ୍ତ୍ରୀ ନିହାର ରଞ୍ଜନ ବେହେରା ଓ ବାଲିମେଳା ବୃହତ ଜଳସେଚନ ନିର୍ବାହୀ ଯନ୍ତ୍ରୀ ଇଂ ଅଭିମନ୍ୟୁ ପ୍ରଧାନ ପ୍ରମୁଖ ଯୋଗ ଦେଇ ଇଂ ବିଶ୍ଵଶ୍ୱର ରାୟଙ୍କ ବହୁମୁଖୀ ପ୍ରତିଭା ସମ୍ପର୍କରେ ସୂଚନା ଦେଇଥିଲେ । ଏହା ସହ ତାଙ୍କ ଆଦର୍ଶରେ ଅନୁପ୍ରାଣୀତ ହେବାକୁ ପରାମର୍ଶ ଦେଇଥିଲେ। 

 ଶାଖାର ସମ୍ପାଦକ ଶ୍ରୀମତୀ ଇଂ ସୁଦୀପ୍ତା ସାହୁ, ଇଂ ଦୀପକ ପ୍ରଧାନ, ଇଂ ମଳୟ ମିଶ୍ର ପ୍ରମୁଖ ଯନ୍ତ୍ରୀ କାର୍ଯ୍ୟକ୍ରମ ପରିଚାଳନା କରିଥିଲେ। ଶେଷରେ ଇଂ କାର୍ତ୍ତିକ ନାୟକ ଧନ୍ୟବାଦ ଅର୍ପଣ କରିଥିଲେ।