ଲିସବନ୍, ୧୨/୦୯: ସହରରେ ମଦର ବନ୍ୟା । ଚାହୁଁ ଚାହୁଁ ପୂରା ସହରରେ ମଦର ଲହଡ଼ି ଖେଳିଗଲା । ଚାରିଆଡ଼େ ମଦ, ମଦ ଆଉ ମଦ । ଗଳିକନ୍ଦି, ରାସ୍ତାଘାଟରେ ଆଣ୍ଠୁଏ ଉଚ୍ଚର ଲହଡ଼ି ଖେଳିଲା ମଦ । ସହରରେ ମଦର ନଦୀ ପ୍ରବାହିତ ହେଲା ବୋଲି କେହି କେହି କହୁଛନ୍ତି । ପର୍ତ୍ତୁଗାଲର ଏକ ଛୋଟ ସହର ସାଓ ଲରେଙ୍କୋ ଡି ବ୍ୟାରିରେ ରେଡ ଓ୍ବାଇନର ନଦୀ ପ୍ରବାହିତ ହେଉଥିବା ନେଇ ଭିଡିଓ ସାମ୍ନାକୁ ଆସିଛି ।
ନାଲି ରଙ୍ଗର ମଦ ପ୍ରବାହିତ ହେଉଛି ପୂରା ସହରରେ । ମିଳିଥିବା ସୂଚନା ଅନୁସାରେ, ଏକ ମଦ ଡିଷ୍ଟିଲେରିରେ ଦୁର୍ଘଟଣା ଘଟିବା ପରେ ଗ୍ୟାଲନ ଗ୍ୟାଲନ ରେଡ୍ ଓ୍ବାଇନ୍ ସହର ସାରା ପ୍ରବାହିତ ହୋଇଛି । ପ୍ରାୟ ୬ ଲକ୍ଷ ଗ୍ୟାଲନ୍ ରେଡ୍ ଓ୍ବାଇନ୍ ପ୍ଲାଣ୍ଟ ଡେଇଁ ସହରରେ ଖେଳିଯାଇଛି । ଏନେଇ ଏକ ଭିଡିଓ ସାମ୍ନାକୁ ଆସିଛି ।ଏଥିରେ ଦେଖିବାକୁ ମିଳିଛି ଯେ, ଏକ ପାହାଡ଼ିଆ ଅଞ୍ଚଳରୁ ଲାଲ ରଙ୍ଗର ତରଳ ପଦାର୍ଥ ପ୍ରବାହିତ ହେଉଛି । ଏହି ସହରରେ କେବଳ ୨ ହଜାର ଲୋକ ବସବାସ କରନ୍ତି ।
Incident at #Portugal’s #Levira Distillery Turns the Streets Blood Red after Two Tanks of Wine Spill Out pic.twitter.com/VbZpiZEAtP
— Agenda Fri Media (@AgendaFriMedia) September 11, 2023
ଏଭଳି ଘଟଣା ଜଣାପଡ଼ିବା ପରେ ପରିବେଶବିତମାନେ ଚିନ୍ତା ପ୍ରକଟ କରିଛନ୍ତି । ସେପଟେ କମ୍ପାନୀର କାର୍ଯ୍ୟକର୍ତ୍ତା ସହରରୁ ରେଡ୍ ଓ୍ବାଇନ୍ ନିଷ୍କାସିତ କରିବା ଲାଗି ପ୍ରଚେଷ୍ଟା ଆରମ୍ଭ କରିଛନ୍ତି । ନ୍ୟୁୟର୍କ ପୋଷ୍ଟ ଅନୁସାରେ, ମଦର ବନ୍ୟାକୁ ରୋକିବା ଲାଗି ଦମକଳବାହିନୀର ସାହାରା ନିଆଯାଇଛି । ଅନ୍ୟପକ୍ଷରେ, ଡିଷ୍ଟିଲେରି ପକ୍ଷରୁ ଏହି ଘଟଣା ପାଇଁ କ୍ଷମା ପ୍ରାର୍ଥନା କରାଯାଇଛି । ଆମର ଭୁଲ ପାଇଁ ଯେଉଁ କ୍ଷତି ହୋଇଛି ତାହା ଆମେ ଭରଣା କରିବୁ । ଏଭଳି ଏକ ଅଘଟଣ ପାଇଁ ଆମେ ଦାୟୀ ବୋଲି ଡିଷ୍ଟିଲେରି ପକ୍ଷରୁ କୁହାଯାଇଛି ।