ବାରିପଦା, ୨୫/୦୨ : ଆଦିବାସୀ ବିଦ୍ୟାଳୟ ଗୁଡ଼ିକରେ ହରିଲୁଟ୍। ଛାତ୍ରାବାସରେ ମେନ୍ୟୁ ହିସାବରେ ଦିଆଯାଉନି ଖାଦ୍ୟ। ଅବ୍ୟବସ୍ଥା ନେଇ ଅଭିଯୋଗ କଲେ ଓଲଟା ଦିଆଯାଉଛି ମାଡ଼। ଶେଷରେ ନ୍ୟାୟ ପାଇଁ ୨୨ କିମି ଚାଲିଚାଲି ବାରିପଦାରେ ପହଞ୍ଚିଲେ ବାସିପିଠା ସରକାରୀ ଉଚ୍ଚ ବିଦ୍ୟାଳୟର ୧୧୬ ଜଣ ଛାତ୍ର। ସୋମବାର ରାତିରେ ପିଲାମାନେ ସ୍କୁଲରୁ ବାହାରି ଚାଲିଚାଲି ମଙ୍ଗଳବାର ସକାଳେ ବାରିପଦାରେ ପହଞ୍ଚିଛନ୍ତି। ଜିଲ୍ଲାପାଳଙ୍କୁ ଭେଟି ଗୁହାରୀ କରିଛନ୍ତି।
ସୂଚନାନୁଯାୟୀ, ମଙ୍ଗଳବାର ସକାଳେ ବାସିପିଠା ହାଇସ୍କୁଲର ୧୧୬ ଜଣ ଛାତ୍ର ଦୀର୍ଘ ୨୨କିମି ଚାଲିଚାଲି ବାରିପଦାରେ ପହଞ୍ଚିଥିଲେ। ସକାଳ ୭ଟା ବେଳେ ସଂସ୍କୃତି ଭବନ ସମ୍ମୁଖ ଛଉପଡ଼ିଆ ନିକଟରେ ଏକାଠି ହୋଇଥିଲେ। ଏକା ସାଙ୍ଗରେ ଏତେ ସଂଖ୍ୟାରେ ପିଲାଙ୍କୁ ଦେଖି କେହି କିଛି ବୁଝି ପାରିନଥିଲେ। ପଚାରିବା ପରେ ଘଟଣା ସମ୍ପର୍କରେ ସବିଶେଷ ତଥ୍ୟ ସାମ୍ନାକୁ ଆସିଥିଲା। ଛାତ୍ରମାନଙ୍କ ଅଭିଯୋଗ ଅନୁଯାୟୀ, ସେମାନେ ବାସିପିଠା ସ୍କୁଲ ପରିସରରେ ଥିବା ହଷ୍ଟେଲରେ ରହୁଛନ୍ତି। ସେମାନଙ୍କୁ ଠିକ୍ ଭାବରେ ଖାଦ୍ୟ ଦିଆଯାଉ ନାହିଁ। ନିମ୍ନ ମାନର ଖାଦ୍ୟ ଦିଆଯାଉଛି। ଏନେଇ ଅଭିଯୋଗ କଲେ ବି କିଛି ସଫଳ ମିଳୁନି। ଓଲଟା ଆକ୍ରୋଶର ଶିକାର ହେଉଛନ୍ତି। ଦଣ୍ଡମୁକ୍ତ ଅଞ୍ଚଳରେ ସେମାନଙ୍କୁ ଗାଳିଗୁଲଜ କରାଯାଉଛି। ପିଟାମରା କରୁଛନ୍ତି। ଛାତ୍ରମାନେ ଏଥିପାଇଁ ପ୍ରଧାନ ଶିକ୍ଷକ ଦୀପ୍ତିକାନ୍ତି ଜେନାଙ୍କୁ ଦାୟୀ କରିଛନ୍ତି।
ବାରିପଦା ଉପଜିଲ୍ଲାପାଳ ଦୟାସିନ୍ଧୁ ପରିଡା ଓ ଜିଲ୍ଲା ମଙ୍ଗଳ ଅଧିକାରୀ ଗୁରୁଚରଣ ମଲ୍ଲିକ ଛଉପଡିଆରେ ପହଞ୍ଚି ପିଲାଙ୍କ ଠାରୁ ସମସ୍ୟା ସମ୍ପର୍କରେ ଶୁଣିବା ସହିତ ବୁଝାସୁଝା କରିଥିଲେ। ସମ୍ପୃକ୍ତ ଶିକ୍ଷକମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ। ସେନଙ୍କୁ ବୁଝାସୁଝା କରି ହଷ୍ଟେଲ ପଠାଇବା ନେଇ ଜିଲ୍ଲା ପ୍ରଶାସନ ପକ୍ଷରୁ ବ୍ୟବସ୍ଥା କରାଯାଉଥିବା ବେଳେ ଛାତ୍ରମାନେ ଏହାର ସମାଧାନ ନହେବା ପର୍ଯ୍ୟନ୍ତ ହଷ୍ଟେଲ ଯିବେ ନାହିଁ ବୋଲି ଜିଦରେ ଅଟଳ ରହିଥିଲେ। ଶେଷରେ ଜିଲ୍ଲାପାଳ ହେମକାନ୍ତ ସାୟ ପହଞ୍ଚି ପିଲାମାନଙ୍କ ସହ କଥାବାର୍ତ୍ତା କରି ବୁଝାଇ ଶୁଝାଇ ପୁଣି ହଷ୍ଟେଲ ପଠାଇବାର ବ୍ୟବସ୍ଥା କରିଛନ୍ତି। ଖୁବଶୀଘ୍ର ଏ ସମ୍ପର୍କରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
ଏ ସମ୍ପର୍କରେ ପୂର୍ବରୁ ଲିଖିତ ଅଭିଯୋଗ କରିଥିବା ମାସା ଆର୍ମିର ରାଜ୍ୟ ସଭାପତି ସୁକୁଲାଲ ମାରାଣ୍ଡି କହିଛନ୍ତି ଯେ, ଆଦିବାସୀ ଛାତ୍ରାବାସରେ ଛାତ୍ରଛାତ୍ରୀମାନଙ୍କୁ ସରକାରଙ୍କ ଦ୍ବାରା ପ୍ରସ୍ତୁତ ଖାଦ୍ୟ ବିବରଣୀ ତଥା ମେନୁ ଚାର୍ଟ ଅନୁସାରେ ଖାଦ୍ଯ ଦିଆଯାଉ ନାହିଁ। ଅତି ନିମ୍ନ ମାନର ଖାଦ୍ୟ ଦିଆଯାଉଛି। ଯାହା ଫଳରେ ତାଙ୍କର ଦେହ ଖୋରାପ ହେଉଛି। ମୟୂରଭଞ୍ଜର ପ୍ରାୟ ପ୍ରତେକ ଆଦିବାସୀ ହୋଷ୍ଟେଲରେ ଏମିତି ହିଁ ବାଟ ମାରଣା କରାଯାଉଛି। ଅଧିକାଂଶ ହୋଷ୍ଟେଲ ଦାୟିତ୍ବରେ ଥିବା ଶିକ୍ଷକମାନେ ହିଁ କିଛି ଉପରିସ୍ତ ଅଧିକାରୀଙ୍କ ସହିତ ମିଶି ଖାଦ୍ଯ ହରିଲୁଟ କରୁଛନ୍ତି। ତେଣୁ ଏହି ଦୁର୍ନୀତିକୁ ବନ୍ଦ କରିବା ପାଇଁ ସେ ଦୃଢ଼ ଦାବି କରିଛନ୍ତି।
