ପୁରୀ, ୨୫/୦୨ : ପୁରୀ ଜିଲ୍ଲା ନିମାପଡ଼ାରୁ ନକଲି ପରୀକ୍ଷାର୍ଥୀ ଗିରଫ। ନହନ୍ତରା ହାଇସ୍କୁଲରେ ପରୀକ୍ଷା ଦେବା ବେଳେ ଧରାପଡ଼ିଲେ ନକଲି ଛାତ୍ର। ଆଡମିଟ୍ କାର୍ଡରେ ଫଟୋ ମ୍ୟାଚ୍ ନହେବାରୁ ଧରାପଡ଼ିଛନ୍ତି। ପରୀକ୍ଷାର୍ଥୀ ଜଣଙ୍କ ସାକ୍ଷୀଗୋପାଳ ଡାଙ୍ଗୁରାର ରାଜା ଭୋଇ ବୋଲି ଜଣାପଡ଼ିଛି।
ସୂଚନା ଅନୁଯାୟୀ, ନିମାପଡ଼ା ବ୍ଲକ ସଲଙ୍ଗ ପଞ୍ଚାୟତ ମଧୁବନ ଶିକ୍ଷାଶ୍ରମରେ ଅଧ୍ୟୟନରତ ଜଣେ ସଂଖ୍ୟାଲଘୁ ଶ୍ରେଣୀର ଛାତ୍ର ଶେଖ୍ ମୁସଲଉଦିନଙ୍କ ସ୍ଥାନରେ ରାଜା ଭୋଇ ପରୀକ୍ଷା ଦେଉଥିଲେ। ନହନ୍ତରା ହାଇସ୍କୁଲରୁ ପରୀକ୍ଷା ଦେଉଥିବା ସମୟରେ ତାଙ୍କୁ ନେଇ ପରୀକ୍ଷା କେନ୍ଦ୍ରର ଅଧିକ୍ଷକ ପୁଷ୍ପାଞ୍ଜଳି ସେଠୀଙ୍କ ସନ୍ଦେହ ହୋଇଥିଲା। ଏହାପରେ ସେ ରାଜା ଭୋଇଙ୍କୁ ଆଡମିଟ୍ କାର୍ଡ ମାଗି ଦେଖିଥିଲେ। ଦୀର୍ଘ ସମୟ ଧରି ପଚରାଉଚରା କରିବା ପରେ ସେ ନକଲି ପରୀକ୍ଷାର୍ଥୀ ବୋଲି ଜାଣି ପାରିଥିଲେ। ଶେଷରେ ଗତକାଲି ରାତିରେ ଛାତ୍ର ଜଣଙ୍କୁ ପୋଲିସ ଜିମା ଦେବା ସହ ଥାନାରେ ଲିଖିତ ଅଭିଯୋଗ କରିଥିଲେ।
ଏବେ ରାଜ୍ୟରେ ମାଟ୍ରିକ ପରୀକ୍ଷା ଚାଲିଥିବା ବେଳେ ନିମାପଡ଼ା ଅଞ୍ଚଳର ଏହି ଘଟଣା ଚାଞ୍ଚଲ୍ୟ ସୃଷ୍ଟି କରିଛି। ତେବେ ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଏଭଳି ଆହୁରି ନକଲି ପରୀକ୍ଷାର୍ଥୀ ପରୀକ୍ଷା ଦେଉଥାଇ ପାରନ୍ତି ବୋଲି ସନ୍ଦେହ ବଢିଛି। ଏପଟେ ମଧୁବନ ଶିକ୍ଷାଶ୍ରମର ପ୍ରଧାନ ଶିକ୍ଷକ ଏବାବଦରେ କିଛି ଜାଣିନାହାନ୍ତି ବୋଲି କହିଛନ୍ତି।
