ଭୁବନେଶ୍ୱର, ୩।୭: ଏବେ ମୋ ବସ୍ ହେବ ଇ ବସ୍ । ମୋ ବସ୍‌କୁ ଇଲେକ୍ଟ୍ରିକ୍ ବସ୍‌ରେ ପରିଣତ କରିବାକୁ ନିଷ୍ପତ୍ତି ନେଇଛନ୍ତି ଓଡ଼ିଶା ସରକାର । ଏଥିସହ ‘ମୋ ବସ୍‌’ର ନାମ ପରିବର୍ତ୍ତନ କରାଯାଇ ‘ଆମ ବସ୍’ ବୋଲି ରଖାଯିବ । ଏନେଇ ସିଆର୍‌ୟୁଟି ପରିଚାଳନା ନିର୍ଦ୍ଦେଶକ ଅରୁଣ ବୋଥ୍ରା କହିଛନ୍ତି ଯେ, ଏବେ ୪୦୦ରୁ ଅଧିକ ଡିଜେଲ ବସ୍ ଚାଲୁଛି । ମୋ ବସ୍ ଯାତ୍ରୀଙ୍କ ପାଇଁ ଉନ୍ନତମାନର ଅନ୍‌ଲାଇନ୍ ପେମେଣ୍ଟ ସିଷ୍ଟମ୍ ଉପରେ ଧ୍ୟାନ ଦିଆଯିବ । ୫ ବର୍ଷ ହେଲା ଆମେ ଭଲ ପ୍ରଦର୍ଶନ କରୁଛୁ । ୪୬୩ଟି ବସ୍ ଚାଲୁଛି । ତା’ ମଧ୍ୟରୁ ୬୩ଟି ଇ-ବସ୍ ରହିଛି । ଆଗକୁ ସବୁ ଇ-ବସ୍  ହେବାକୁ ଯୋଜନା ହୋଇଛି । ଭୁବନେଶ୍ୱରରେ ୧୦୦, କଟକ ୧୦୦, ସମ୍ବଲପୁର ୫୦  ଓ ରାଉରକେଲାରେ ୧୦୦  ଇ-ବସ୍ ଚାଲିବା ନେଇ ଯୋଜନା ହୋଇଛି । ଇ-ବସ୍ ଡିପୋକୁ ଅଧିକ ଉନ୍ନତ କରାଯିବ I ଉନ୍ନତ ଜ୍ଞାନକୌଶଳ ବ୍ୟବହାର ହେବ । ଏଥିସହ ସ୍ଵରକ୍ଷା ଉପରେ ଧ୍ୟାନ ଦିଆଯିବ ।