ହରାରେ,୦୨/୦୭: ଭାରତ ବିପକ୍ଷ ୫ ମ୍ୟାଚ୍ ବିଶିଷ୍ଟ ଘରୋଇ ଟି-ଟ୍ୱେଣ୍ଟି ସିରିଜ ପାଇଁ ଜିମ୍ବାୱେ ଦଳ ଘୋଷଣା ହୋଇଛି । ବେଲଜିୟମରେ ଜନ୍ମିତ ଯୁବ ବ୍ୟାଟର ଆଣ୍ଟମ ନକ୍ଭୀ ପ୍ରଥମ ଥର ସୁଯୋଗ ପାଇଛନ୍ତି । ମାତ୍ର ନାଗରିକତା ସ୍ଥିତି ସ୍ପଷ୍ଟ ହେବା ପରେ ତାଙ୍କ ଖେଳିବା ନେଇ ସ୍ପଷ୍ଟ ଜଣାପଡ଼ିବ ।
ଗତ ଲୋଗନ କପ୍ରେ ସେ ପ୍ରଥମ ଖେଳାଳି (ଜିମ୍ବାୱେର ଯେକୌଣସି ଦଳ ପକ୍ଷରୁ) ଭାବେ ତ୍ରିଶତକ ଅର୍ଜନ କରିଥିଲେ। ଏହି ପ୍ରଦର୍ଶନ ବଳରେ ସେ ଚୟନକର୍ତ୍ତାଙ୍କ ଦୃଷ୍ଟି ଆକର୍ଷଣ କରିଥିଲେ । ଡ୍ରଗ୍ସ ବ୍ୟବହାର କରି ବାସନ୍ଦ ହୋଇଥିବା ଅଭିଜ୍ଞ ଅଲରାଉଣ୍ଡର ୱେସଲି ମଧେବୀର ଓ ବ୍ରାଣ୍ଡନ ମାଭୁତା ଦଳକୁ ଫେରିଥିବାବେଳେ ଭେଟେରାନ କ୍ରେଗ ଏରଭିନ୍, ସିନ ୱିଲିୟମ୍ସ, ରିୟାନ ବୁର୍ଲ ବାଦ୍ ପଡ଼ିଛନ୍ତି । ସିକନ୍ଦର ରାଜା ଅଧିନାୟକ ନିଯୁକ୍ତ ହୋଇଛନ୍ତି । ଆସନ୍ତା ୬ ତାରିଖରେ ଭାରତ ଓ ଜିମ୍ବାୱେ ମଧ୍ୟରେ ପ୍ରଥମ ଟି-ଟ୍ୱେଣ୍ଟି ଖେଳାଯିବ । ଏହାପରେ ୭, ୧୦, ୧୩, ୧୪ ତାରିଖରେ ଶେଷ ୪ଟି ମ୍ୟାଚ୍ ଅନୁଷ୍ଠିତ ହେବ ।
ଜିମ୍ବାୱେ ଦଳ: ସିକନ୍ଦର ରାଜା (ଅଧିନାୟକ), ଫରାଜ ଆକ୍ରମ, ବ୍ରାଏନ ବେନେଟ, ଜୋନାଥନ କ୍ୟାମ୍ପବେଲ, ତେନ୍ଦାଇ ଚତାରା, ଲ୍ୟୁକ ଜଙ୍ଗୱେ, ଇନୋସେଣ୍ଟ କାଇଆ, କ୍ଲାଇଭ୍ ମଡାଣ୍ଡେ, ୱେସଲି ମଧେବୀର, ତଡ଼ିୱାନସେ ମରୁମାନି, ୱେଲିଂଟନ ମାସାକାଜା, ବ୍ରାଣ୍ଡନ ମାଭୁତା, ବ୍ଲେସିଂ ମୁଜାରବାନି, ଡାୟନ ମେୟର୍ସ, ଆଣ୍ଟମ ନକ୍ଭୀ, ରିଚାର୍ଡ଼ ନଗରଭା, ମିଲଟନ ଶୁମ୍ବା