ମୁମ୍ବାଇ, ୪/୭: ଭାରତୀୟ ଟିମ୍ର ପୂର୍ବତନ କ୍ରିକେଟର ମହେନ୍ଦ୍ର ସିଂ ଧୋନି ଓ ପତ୍ନୀ ସାକ୍ଷୀ ଆଜି ସେମାନଙ୍କର ୧୫ତମ ବିବାହ ବାର୍ଷିକ ମନାଉଛନ୍ତି। ଏନେଇ ସାକ୍ଷୀ ଇନଷ୍ଟାଗ୍ରାମରେ ଉଭୟଙ୍କ ପୁରୁଣା ଫଟୋ ସୋସିଆଲ ମିଡିଆରେ ସେୟାର କରି ଧୋନିଙ୍କୁ ବିବାହ ବାର୍ଷିକର ଶୁଭେଚ୍ଛା ଜଣାଇଛନ୍ତି । ଏହି ଅବସରରେର ଏହି ଦମ୍ପତ୍ତିଙ୍କୁ ବଲିଉଡ ବହୁ କଳାକାର ଶୁଭେଚ୍ଛା ଓ ଶୁଭକାମନା ଜଣାଇଛନ୍ତି । ବୁଧବାର ରାତିରେ ସାକ୍ଷୀ ଏକ କୋଲାଜ ଫଟୋ ସୋସିଆଲ ମିଡିଆରେ ସେୟାର କରିଛନ୍ତି । ବିବାହର ୧୪ ବର୍ଷ ପୂରଣ ହୋଇ ୧୫ ତମ ବର୍ଷ ଆରମ୍ଭ ହୋଇଥିବା ସେ କ୍ୟାପସନରେ ଲେଖି ଏକ ହାର୍ଟ ଇମୋଜି ମଧ୍ୟ ଦେଇଛନ୍ତି । ଇନଷ୍ଟାଗ୍ରାମରେ ସେୟାର ହୋଇଥିବା ଫଟୋରେ ୪ଟି ଫଟୋ ରହିଛି । ଯେଉଁଥିରେ ଧୋନି ଓ ସାକ୍ଷୀଙ୍କ ଖୁସି ସମୟରେ ଫଟୋ ରହିଛି ।
ସେପଟେ ବଲିଉଡର ବହୁ ତାରକା ଧୋନି ଓ ସାକ୍ଷୀଙ୍କୁ ବିବାହ ବାର୍ଷିକର ଶୁଭେଚ୍ଛା ଜଣାଇଛନ୍ତି । ଅନୁଷ୍କା ଶର୍ମା, ଆଥିଆ ଶେଟ୍ଟୀ, ଅନନ୍ୟା ପାଣ୍ଡେ, ରାମ ଚରଣଙ୍କ ପତ୍ନୀ ଉପସାନା କାମେନି, ସାଉଥ ନିର୍ଦ୍ଦେଶକ ବିଗ୍ନେଶ ଶିବନ, ଶାହାରୁଖଙ୍କ ମ୍ୟାନେଜର ପୂଜା ଦାଦଲାନି, ଅଭିନେତ୍ରୀ ପ୍ରୀତି ଜିଣ୍ଟା ଓ ଚହଲଙ୍କ ପତ୍ନୀ ଧନଶ୍ରୀ ଦମ୍ପତିଙ୍କୁ ଶୁଭେଚ୍ଛା ବାର୍ତ୍ତା ଦେଇଛନ୍ତି । ତେବେ ୨୦୧୦ରେ ସାକ୍ଷୀଙ୍କୁ ବିବାହ କରିଥିଲେ ମହେନ୍ଦ୍ର ସିଂ ଧୋନି । ଏହି ଖବର କ୍ରୀଡାପ୍ରେମୀଙ୍କୁ ଚକିତ କରିଥିଲା । ଉଭୟ କାହାକୁ ନଜଣାଇ ବିବାହ କରିଥିଲେ । କ୍ରିକେଟରେ ବଳିଷ୍ଠ ଅବଦାନ ପାଇଁ ମାହିଙ୍କୁ ୨୦୧୮ରେ ପଦ୍ମଭୂଷଣ,୨୦୦୯ରେ ପଦ୍ମଶ୍ରୀ, ୨୦୦୮ରେ ଖେଳରତ୍ନ ସମ୍ମାନରେ ସମ୍ମାନିତ କରାଯାଇଥିଲା ।