ମୁମ୍ବାଇ ୦୭/୫୧: ଅନନ୍ତ ଅମ୍ବାନି-ରାଧିକା ମର୍ଚାଣ୍ଟଙ୍କ ସଙ୍ଗୀତ ଉତ୍ସବ ବେଶ ଧୂମ୍ଧାମ୍ରେ ଅନୁଷ୍ଠିତ ହୋଇଛି । ଗତ ଶୁକ୍ରବାର ଆୟୋଜିତ ଏହି ଭବ୍ୟ ଉତ୍ସବରେ ଅନ୍ତର୍ଜାତୀୟ ପପ୍ ସିଙ୍ଗର ଜଷ୍ଟିନ୍ ବିବର ସମସ୍ତଙ୍କୁ ମତୁଆଲା କରିଥିଲେ । ଏଥିଲାଗି ସେ ବିଳମ୍ବିତ ରାତିରେ ମୁମ୍ବାଇରେ ପହଞ୍ଚିଥିଲେ ଏବଂ ପ୍ରଦର୍ଶନ ଶେଷ କରି ଫେରିଗଲେ । ଏକ ଗଣମାଧ୍ୟମର ରିପୋର୍ଟ ଅନୁସାରେ, ଏହି ଉତ୍ସବରେ ପ୍ରଦର୍ଶନ ଲାଗି ବିବର ୮୩ କୋଟି ଟଙ୍କା ପାରିଶ୍ରମିକ ନେଇଛନ୍ତି । ଟି-ଟ୍ୱେଣ୍ଟି ବିଶ୍ୱକପ୍ ଜିତି ଭାରତକୁ ଫେରିଥିବା କ୍ରିକେଟ୍ ତାରକା ମଧ୍ୟ ଏହି ଉତ୍ସବରେ ପହଞ୍ଚିଥିଲେ । କ୍ୟାପ୍ଟେନ୍ ରୋହିତ ଶର୍ମା, ସୂର୍ଯ୍ୟକୁମାର ଯାଦବ ଓ ହାର୍ଦିକ ପାଣ୍ଡ୍ୟାଙ୍କୁ ଏ ଅବସରରେ ସମ୍ମାନିତ କରାଯାଇଥିଲା । ନୀତା ଓ ମୁକେଶ ଅମ୍ବାନି ୩ ଜଣଙ୍କୁ ମଞ୍ଚକୁ ଡାକି ଆଲିଙ୍ଗନ କରିଥିଲେ ।
ଅନନ୍ତ-ରାଧିକାଙ୍କ ସଙ୍ଗୀତ ଉତ୍ସବରେ ସଲମାନ ଖାନ୍, ଅର୍ଜୁନ କପୁରଙ୍କ ସମେତ ଅନେକ ବଲିଉଡ୍ ସେଲିବ୍ରିଟି ମଞ୍ଚରେ ନୃତ୍ୟ ପରିବେଷଣ କରିଥିଲେ । ଶାହିଦ କପୁର, ବରୁଣ ଧୱନ, ରଣବୀର କପୁର, ଆଲିୟା ଭଟ୍ଟ, ସାରା ଅଲି ଖାନ୍, ଅନନ୍ୟା ପାଣ୍ଡେ, ଜାହ୍ନବୀ କପୁର ବି ନୃତ୍ୟ ପ୍ରଦର୍ଶନ କରିଥିଲେ । ଏ ଅବସରରେ ପୂରା ଅମ୍ବାନି ପରିବାର ମଞ୍ଚରେ ନଜର ଆସିଥିଲା । ଫିଲ୍ମ ‘ଓମ୍ ଶାନ୍ତି ଓମ୍’ର ଗୀତ ‘ଦିୱାନଗୀ-ଦିୱାନଗୀ’ରେ ସମସ୍ତେ ନୃତ୍ୟ ପ୍ରଦର୍ଶନ କରିଥିଲେ । ସଙ୍ଗୀତରେ ଅନନ୍ତ-ରାଧିକାଙ୍କ ଲଭ୍ଷ୍ଟୋରୀ ପ୍ରଦର୍ଶିତ ହୋଇଥିଲା । ଦୁହେଁ କେବେ, କେଉଁଠି ଓ କେମିତି ପରସ୍ପରକୁ ଭେଟିଲେ ଏବଂ ଉଭୟଙ୍କ ମଧ୍ୟରେ ପ୍ରେମ କେମିତି ହେଲା, ଗୀତ-ନୃତ୍ୟ ଜରିଆରେ ବର୍ଣ୍ଣନା କରାଯାଇଥିଲା ।