ନୂଆଦିଲ୍ଲୀ: ଲୋକପ୍ରିୟ ସୋସିଆଲ ମିଡିଆ ପ୍ଲାଟଫର୍ମ ଏକ୍ସ (ପୂର୍ବରୁ ଟ୍ବିଟର)ରେ ଖୁବଶୀଘ୍ର ଲାଇଭଷ୍ଟ୍ରିମିଂ ଫିଚର ଲଞ୍ଚ ହେବାକୁ ଯାଉଛି । ଏହି ସୁବିଧା କେବଳ ପ୍ରିମିୟମ୍ ସବସ୍କ୍ରାଇବରଙ୍କୁ ମିଳିବ । କିନ୍ତୁ ଏହି ସୁବିଧା କେବେଠୁ ମିଳିବ ସେନେଇ ଏକ୍ସ ପକ୍ଷରୁ ସ୍ପଷ୍ଟ ସୂଚନା ଦିଆଯାଇ ନାହିଁ । ସେପଟେ ଇନଷ୍ଟାଗ୍ରାମ, ଫେସବୁକ୍, ୟୁଟ୍ୟୁବ ଏବଂ ଟିକଟକ୍ ଭଳି ଅନ୍ୟ ସୋସିଆଲ ମିଡିଆ ପ୍ଲାଟଫର୍ମରେ ଲାଇଭଷ୍ଟ୍ରିମିଂ ପାଇଁ କୌଣସି ପ୍ରିମିୟନ ସବସ୍କ୍ରିପ୍ସନର ଆବଶ୍ୟକତା ପଡ଼ୁନାହିଁ । କିନ୍ତୁ ଏକ୍ସ ଲାଇଭଷ୍ଟ୍ରିମିଂ ପାଇଁ ପ୍ରମିୟମ୍ ସବସ୍କ୍ରିପ୍ସନ ଦାବି କରୁଛି । ଟଙ୍କା ଦେଲେ ହିଁ ୟୁଜର ଲାଇଭଷ୍ଟ୍ରିମିଂ ଫିଚର ବ୍ୟବହାର କରିପାରିବେ ।
ଏଲନ ମସ୍କ ୨୦୨୨ରେ ଏକ୍ସକୁ ଅଧିଗ୍ରହଣ କରିବା ସହ ବହୁ ବଡ଼ ବଡ଼ ପରିବର୍ତ୍ତନ କରିଛନ୍ତି । ପୁରୁଣା ଭେରିଫାଏଡ୍ ନିୟମକୁ ପରିବର୍ତ୍ତନ କରାଯାଇଛି । ଏପରିକି ସେ କମ୍ପାନିର ନାଁ ଟ୍ବିଟରରୁ ଏକ୍ସ କରିଛନ୍ତି । ଏବେ ଲାଇଭଷ୍ଟ୍ରିମିଂ ପାଇଁ ପ୍ରିମିୟମ୍ ସବସ୍କ୍ରିପ୍ସନ ଦାବି କରି କମ୍ପାନି ଏକ୍ସ ୟୁଜର୍ସଙ୍କୁ ସବସ୍କ୍ରାଇବ କରିବାକୁ ବାଧ୍ୟ କରିପାରେ । ଏକ୍ସରେ ସବସ୍କ୍ରିପ୍ସନ ଲାଗି ୨୧୫ ଟଙ୍କାରୁ ୧୧୩୩ ଟଙ୍କା ପର୍ଯ୍ୟନ୍ତ ଦେବାକୁ ପଡ଼େ ।
ଏକ୍ସର ଏହି ନିଷ୍ପତ୍ତି ଲାଇଭଷ୍ଟ୍ରିମିଂର ବ୍ୟବହାର କରି ଯେଉଁ ୟୁଜର ନିଜର ଫଲୋୟର୍ସଙ୍କୁ ମେସେଜ ଦେବାକୁ ଇଚ୍ଛୁକ ସେମାନଙ୍କୁ ପ୍ରଭାବିତ କରିବ । କେହି କେହି ଅନ୍ୟ ସୋସିଆଲ ପ୍ଲାଟଫର୍ମକୁ ଯିବାକୁ ବାଧ୍ୟ ହୋଇପାରନ୍ତି । ତେବେ ଏକ୍ସ ଲାଇଭଷ୍ଟ୍ରିମିଂ ପାଇଁ ଚାର୍ଜ କରିବା ପରେ ଅନ୍ୟ ସୋସିଆଲ ମିଡିଆ ପ୍ଲାଟଫର୍ମ ମଧ୍ୟ ଏଭଳି କିଛି ନିଷ୍ପତ୍ତି ନେଇପାରନ୍ତି ବୋଲି ଚର୍ଚ୍ଚା ହେଉଛି ।