ଓ୍ବାଇନାଡ,୩।୮: କେରଳର ଓ୍ବାଇନାଡରେ ଭୂସ୍ଖଳନର ୫ ଦିନ ପରେ ସର୍ଚ୍ଚ ଅପରେସନ୍ ଜାରି ରହିଛି। ଏପର୍ଯ୍ୟନ୍ତ ୩୫୦ରୁ ଅଧିକ ଲୋକଙ୍କର ମୃତ୍ୟୁ ହୋଇସାରିଛି। ସେଭଳି ୨୦୦ରୁ ଅଧିକ ଲୋକ ଏବେ ବି ନିଖୋଜ ଅଛନ୍ତି। ତେବେ ଉଦ୍ଧାର ଅଭିଯାନରେ ଲାଗିଥିବା ଏଜେନ୍ସିମାନେ ନିଜର ସାହାସ ହାରି ନାହାନ୍ତି। ଶୁକ୍ରବାର ମାଟି ତଳୁ ଜୀଅନ୍ତା ଅବସ୍ଥାରେ ବହୁ ଲୋକଙ୍କୁ ବାହାର କରାଯାଇଛି। ଏଭଳି ସ୍ଥିତିରେ ଏବେ ଟେକ୍ନୋଲୋଜିର ସାହାଯ୍ୟ ନିଆଯାଇଛି। ଫଳରେ ତଲାସୀ ଅଭିଯାନକୁ ଆହୁରି ଦ୍ରୁତ କରିହେବ।
ଏବେ ଓ୍ବାଇନାଡରେ ଉଦ୍ଧାର କାର୍ଯ୍ୟରେ ରାଡାର ଡ୍ରୋନ୍ର ବ୍ୟବହାର କରାଯାଇଛି। ଏହି ଡ୍ରୋନ୍ ମାଟିଠାରୁ ୧୨୦ ମିଟର ଉଚ୍ଚତାରେ ଉଡିଥାଏ ଓ ଗୋଟିଏ ଥରରେ ୪୦ ହେକ୍ଟରରେ ସର୍ଚ୍ଚ କରିଥାଏ। ଏହା ଚାରିଆଡେ ତରଙ୍ଗ ବା ସିଗ୍ନାଲ ପଠାଏ ଯାହା ସାହାଯ୍ୟରେ ମାଟି ତଳେ ପୋତି ହୋଇଥିବା ଲୋକ ଚିହ୍ନଟ କରାଯାଏ।ଏଥିରେ ରାଡାର ସିଷ୍ଟମର ବ୍ୟବହାର କରାଯାଇଛି। ଏହାଦ୍ବାରା ମାଟି ତଳେ ଥିବା ଲୋକଙ୍କ ବିଷୟରେ ସୂଚନା ମିଳିପାରିବ।
ସେନା ୧୯୦ ଫୁଟ ଲମ୍ବର 'ବେଲି ବ୍ରିଜ୍' ନିର୍ମାଣ କାର୍ଯ୍ୟ ଶେଷ କରିବା ପରେ ସର୍ଚ୍ଚ ଅପରେସନ୍ ତୀବ୍ର ହୋଇଛି। ଉଦ୍ଧାରକାରୀ ଦଳ ଶୁକ୍ରବାର ଦିନ ଜିପିଏସ୍ କୋର୍ଡିନେଟ୍ ଏବଂ ଡ୍ରୋନ୍ ଚିତ୍ର ବ୍ୟବହାର କରି, ଭୂସ୍ଖଳନ ଘଟିଥିବା ଅଞ୍ଚଳରେ ରହୁଥିବା ଲୋକଙ୍କ ମୋବାଇଲ୍ ଫୋନରୁ ଶେଷ ଲୋକେସନ୍କୁ ସର୍ଚ୍ଚ କରି ମାଟି ତଳେ ଫସି ରହିଥିବା ଲୋକଙ୍କୁ ଖୋଜାଖୋଜି ଚଳାଇଛି। ଭୂସ୍ଖଳନ ଦୁର୍ଘଟଣା ପରେ ବ୍ୟବସାୟୀ ବିଶିଷ୍ଟ ବ୍ୟକ୍ତି ବିଶେଷ ଏବଂ ବିଭିନ୍ନ ସଂସ୍ଥା ମୁଖ୍ୟମନ୍ତ୍ରୀ ରିଲିଫ୍ ପାଣ୍ଠିକୁ କୋଟି କୋଟି ଟଙ୍କା ଦାନ ଦେବାରେ ଲାଗିଛନ୍ତି।
