ଭୁବନେଶ୍ୱର, ୧୮/୦୪: ୨ ପୃଥକ ସଡ଼କ ଦୁର୍ଘଟଣାରେ ଦୁଇ ଜଣଙ୍କ ମୃତ୍ୟୁ ହୋଇଛି । ଗଜପତି ଜିଲ୍ଲା ଅଡବା ଥାନା କଟାମା ଗାଁ ନିକଟରେ ଟ୍ରାକ୍ଟର ଓଲଟି ଜଣେ ଶ୍ରମିକଙ୍କ ମୃତ୍ୟୁ ଘଟିଛି l ମୃତକ ଦିଗପହଣ୍ଡିର ଟୁନା ନାୟକ । ସେପଟେ ମୋହନା ଥାନା ମେରାପଲି ଗାଁ ନିକଟରେ ବାଇକ୍କୁ ଚାପିଦେଲା ହାଇୱା । ଦୁର୍ଘଟଣାରେ ବାଇକ୍ ଆରୋହୀଙ୍କ ମୃତ୍ୟୁ ହୋଇଛି । ମୃତକଙ୍କ ପରିଚୟ ମିଳିପାରି ନଥିବା ବେଳେ ଉଭୟ ମୃତଦେହ ଜବତ କରି ତଦନ୍ତ କରୁଛି ପୋଲିସ ।
ସୂଚନା ମୁତାବକ, ପ୍ରଥମ ଦୁର୍ଘଟଣାଟି ଗଜପତି ଜିଲ୍ଲା ଅଡବା ଥାନା କଟାମା ଗାଁ ନିକଟରେ ଘଟିଛି । କଟାମା ଗାଁ ନିକଟରେ ରାସ୍ତା କାମ ସାରି ବିଳମ୍ବିତ ରାତିରେ ଘରକୁ ଫେରୁଥିଲେ ଟୁନା ନାୟକ । ଘରକୁ ଫେରିବା ବେଳେ ଭାରସାମ୍ୟ ହରାଇ ରାସ୍ତା କଡ଼କୁ ଟ୍ରାକ୍ଟରଟି ଓଲଟି ପଡ଼ିଥିଲା । ଫଳରେ ଘଟଣାସ୍ଥଳରେ ହିଁ ତାଙ୍କ ମୃତ୍ୟୁ ହୋଇଥିଲା । ଏହି ଘଟଣା ସମ୍ପର୍କରେ ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରିଛି ।
ସେହିପରି ମୋହନା ଥାନା ମେରାପଲି ଗାଁ ନିକଟରେ ଆଉ ଏକ ଦୁର୍ଘଟଣା ଘଟିଛି । ବିଳମ୍ବିତ ରାତିରେ ହାଇୱା ଗାଡି ମଧୁରଆମ୍ବରୁ ମୋହନା ଆସୁଥିଲା । ଏହି ସମୟରେ ଏକ ବାଇକ୍ରେ ଜଣେ ବ୍ୟକ୍ତି ବିପରୀତ ଦିଗରୁ ଯିବାବେଳେ ହାଇୱା ସହ ମୁହାଁମୁହିଁ ଧକ୍କା ହୋଇଛି । ଯାହା ଫଳରେ ବାଇକ୍ ଆରୋହୀଙ୍କ ମୃତ୍ୟୁ ଘଟିଛି । ମୃତକଙ୍କ ପରିଚୟ ବର୍ତ୍ତମାନ ଅସ୍ପଷ୍ଟ ରହିଛି । ଉଭୟ ଘଟଣାରେ ମୃତଦେହ ଜବତ କରି ତଦନ୍ତ କରୁଛି ପୋଲିସ ।
