ରାୟଗଡ଼(ଗଜପତି), ୩୦/୩ : ଗଜପତି ଜିଲ୍ଲା ରାୟଗଡ଼ ବ୍ଲକ୍ରେ ଉତ୍ପାଦିତ କଞ୍ଚା ପଣସ ପଶ୍ଚିମବଙ୍ଗରେ ଚାହିଦା ରହିଛି । ପ୍ରାୟ ଦିନ ଏଠାରୁ ଟନ୍ ଟନ୍ ପଣସ ବୋଝେଇ ହୋଇ ଯାଉଛି । ପାହାଡ଼, ଜଙ୍ଗଲରେ ଶହ ଶହ ସଂଖ୍ୟାରେ ପଣସ ଗଛ ରହିଛି । ବିଶେଷ କରି ଡମ୍ବାଳ, ପାତ୍ତାର, ଲାବା, ଅମେଡା, କଇଁପୁର, ଲକ୍ଷ୍ମୀପୁର, ଜଲାଙ୍ଗ, କେରାଣ୍ଡି, ଏଙ୍ଗାରସିଂ, ଜିରାଙ୍ଗ, ଗଙ୍ଗାବାଡ଼, ତାଳମୁଣ୍ଡ, ଲାଇଲାଇ, ଏସ୍. କରଡ଼ାସିଂ ଆଦି ପଞ୍ଚାୟତରେ ପ୍ରଚୁର ପରିମାଣରେ ପଣସ ଉତ୍ପାଦନ ହେଉଛି । ପାଚିଲା ଅପେକ୍ଷା କଷି ପଣସର ଚାହିଦା ଅଧିକ ରହିଛି । ଆଦିବାସୀମାନେ ଛୋଟ ଛୋଟ ପଣସକୁ ସଂଗ୍ରହ କରି ହୋଲ୍ସେଲ୍ରେ ବ୍ୟବସାୟୀଙ୍କୁ ଦେଉଛନ୍ତି । ଚାଷୀଙ୍କ ଠାରୁ ପଣସ ପିଛା ୧୦ରୁ ୧୨ ଟଙ୍କାରେ କିଣି ବ୍ୟବସାୟୀ ମାନେ ରାଜ୍ୟ ତଥା ରାଜ୍ୟ ବାହାରକୁ ପଠାଉଛନ୍ତି । ଅନେକ ସମୟରେ ଦର ଅଲଗା ରହିଥାଏ । ଗୋଟିଏ ପଣସ ଓଜନ ୨ ରୁ ୩ କିଲୋ ରହୁଛି । ଗୋଟା ହିସାବରେ ନେଇ ରାଜ୍ୟ ବାହାରେ କିଲୋ ହିସାବରେ ବିକ୍ରି କରିଥାନ୍ତି ।
ଅନେକ ସମୟରେ ଗ୍ରାମାଞ୍ଚଳର ଚାଷୀମାନେ ଅଭାବୀ ବିକ୍ରିର ଶିକାର ହୋଇଥାନ୍ତି । ଜଙ୍ଗଲ ଓ ପାହାଡ଼ରୁ ସଂଗ୍ରହ ହେଉଥିବା ସାମଗ୍ରୀକୁ ଉଚିତ୍ ଦରରେ ବିକ୍ରି ଲାଗି ଜିଲ୍ଲାରେ ଓରମାସ ରହିଛି । ତଥାପି ଉଚିତ ମୂଲ୍ୟ ମିଳୁନଥିବା ଚାଷୀ ଅଭିଯୋଗ କରୁଛନ୍ତି । ପଣସ ଚାଷୀ ଓ ସଂଗ୍ରହକାରୀ କିଭଲି ଉଚିତ ଦର ପାଇବେ ସେ ଦିଗରେ ବିଭାଗ ଧ୍ୟାନ ଦେଉନି । ବାର୍ଷିକ କ୍ବିଣ୍ଟାଲ କ୍ବିଣ୍ଟାଲ ପଣସ ଉତ୍ପାଦନ ହେଉଛି । ଉଚିତ ମୂଲ୍ୟ ମିଳୁନଥିବାରୁ ଚାଷୀମାନେ କଷି ପଣସ ଅମଳ କରିବାକୁ ଆଗ୍ରହ ପ୍ରକାଶ ମଧ୍ୟ କରୁନଥିବା ଜଣାପଡ଼ିଛି । ସରକାର ଏଥିପ୍ରତି ଦୃଷ୍ଟି ଦେଇ ଶୀତଳ ଭଣ୍ଡାର କରି ଉତ୍ପାଦିତ ସାମଗ୍ରୀକୁ ବଜାରୀକରଣ କରିବାକୁ ଡମ୍ବାଳ ସରପଞ୍ଚ ବିଶ୍ୱନାଥ ଶବରଙ୍କ ସମେତ ବିଦ୍ୟାଧର ଭୂୟାଁ, ସଞ୍ଜୟ ଗମାଙ୍ଗ, ପୁଷ୍ପାଞ୍ଜଳି ଗମାଙ୍ଗ, ସାମସନ ଭୂୟାଁ ପ୍ରମୁଖ ଦାବି କରିଛନ୍ତି ।
