କଟକ, ୨୫/୧୧: ଡିଜିଟାଲ୍ କାନ୍ଭାସ୍ରେ ମ୍ୟାଜିକ୍ ମିରର୍ର ଭ୍ରମ । ତାହା ସହିତ ହୋଲୋଗ୍ରାଫିକ୍ ଓ ଆନାମରଫିକ୍ ସୋ । ଏସବୁ ମଧ୍ୟରେ ଏଲ୍ଇଡି ଡିସ୍ପ୍ଲେ । ତାହାବାଦ୍ ଚକିତ କଲା ଭଳି ଏଲ୍ଇଡି ସେଲ୍ଫି ପଏଣ୍ଟ୍ ପାଇଁ ରହିଛି ଆକର୍ଷଣୀୟ ରଙ୍ଗୀନ ହରିଣ ଓ ଗଛ । ଏହିଭଳି ଅନେକ ଡିଜିଟାଲ୍ କାର୍ଯ୍ୟ ମଧ୍ୟରେ ବାଲିଯାତ୍ରାରେ ବୁଲିବା ପାଇଁ ଆସୁଥିବା ଲୋକଙ୍କୁ ନିଆରା ଅନୁଭବ ଦେବ ଡିଜିଟାଲ୍ ଏସି ହ୍ୟାଙ୍ଗର୍ ତଥା କଟକ ବାଲିଯାତ୍ରାର ଡିଜିଟାଲ୍ ପ୍ରଦର୍ଶନୀ ।
ସିଏମ୍ସି ଦ୍ୱାରା ଚଳିତ ବର୍ଷ ବାଲିଯାତ୍ରା ତଳ ପଡିଆ ସ୍ଥିତ ‘କଟକ ଇନ୍ କଟକ’ ପାଶ୍ୱର୍ରେ ୧୨ ହଜାର ବର୍ଗଫୁଟରେ ତିଆରି ଚାଲିଥିବା ଏହି ଡିଜିଟାଲ୍ ଏସି ହ୍ୟାଙ୍ଗର୍ ହେବ ମୁଖ୍ୟ ଆକର୍ଷଣ । ଏଥିପାଇଁ ପଡିଆରେ ଠିକା ସଂସ୍ଥା ଦ୍ୱାରା ଜୋର୍ଦାର ନିର୍ମାଣ କାର୍ଯ୍ୟ ଚଳାଇଛି । ରାଜ୍ୟ ମାନ୍ୟତା ପାଇବା ପରେ ପ୍ରଶାସନ ପକ୍ଷରୁ ବାଲିଯାତ୍ରାରେ ନୂଆ ନୂଆ କାର୍ଯ୍ୟକ୍ରମ ଆୟୋଜନ ହେଉଛି । ଗତ ବର୍ଷ ସିଏମ୍ସି ପକ୍ଷରୁ କାଗଜ ଡଙ୍ଗା ତିଆରି ହେବା ସହ ମହାନଦୀର ଜଳରାଶିରେ ଲେଜର୍ ଲାଇଟ୍ ସୋ ପ୍ରଦର୍ଶିତ ହୋଇଥିଲା । ସେହି ଅନୁସାରେ ଚଳିତ ବର୍ଷ ମଧ୍ୟ ସିଏମ୍ସି ପକ୍ଷରୁ ଡିଜିଟାଲ୍ ବ୍ୟବସ୍ଥାକୁ ଗୁରୁତ୍ୱ ଦିଆଯାଇ ସ୍ୱତନ୍ତ୍ର ଡିଜିଟାଲ୍ ପ୍ରଦର୍ଶନୀ ଜୋନ୍ ତିଆରି ଚାଲିଛି ।
ଠିକା ସଂସ୍ଥା ଦ୍ୱାରା ପାଖାପାଖି ୩ କୋଟି ଟଙ୍କା ଖର୍ଚ୍ଚ କରାଯାଇ ଏସି ହ୍ୟାଙ୍ଗର୍ ତଥା ଶୀତତାପ ନିୟନ୍ତ୍ରିତ ବନ୍ଦ କୋଠରୀ ତିଆରି ଚାଲିଛି । ଏଥିରେ ଡିଜିଟାଲ୍ର ନିଆରା ଅନୁଭବ ପାଇବେ ଲୋକେ । ଏଥିପାଇଁ ଦୁଇଟି ଆମ୍ୟୁଜମେଣ୍ଟ୍ ରହିଛି । ଗୋଟିଏରେ ୩ଡି ସଦୃଶ ରଙ୍ଗୀନ ଗଛ, ହରିଣ ଓ ଚଢେଇର ସେଲ୍ଫି ପଏଣ୍ଟ୍ ରହିବ । ତାହାସହିତ ଡିଜିଟାଲ୍ ଡିସ୍ ପ୍ଲେରେ ବାଲିଯାତ୍ରାର ଐତିହ୍ୟ ପ୍ରଦର୍ଶିତ କରାଯିବ । ଅନ୍ୟପକ୍ଷରେ ଚକିତ କରିବା ଭଳି ଅତ୍ୟାଧୁନିକ ଆନାମରଫିକ୍ ଓ ହୋଲୋଗ୍ରାଫିକ୍ ଟେକ୍ନୋଲୋଜିରେ ଅନେକ ସୋ’ ପ୍ରଦର୍ଶିତ ହେବ । ତାହାବାଦ୍ ଭର୍ଚୁଆଲ୍ ଜୋନ୍ରେ ୨୭୦ ଡିଗ୍ରୀ ପାନାରୋମିକ ସୋ’ର ମଜା ନେବେ ଲୋକେ । ଗୋଟିଏ ଜୋନ୍ରୁ ଅନ୍ୟ ଜୋନ୍କୁ ଯିବା ବାଟରେ ଏଲ୍ଇଡି କାନ୍ଭାସ୍ରେ ମ୍ୟାଜିକ୍ ମିରର ଅନୁଭବ ପାଇବେ ।
ଏସବୁ ପରେ କ୍ରିଏଟିଭ୍ ଆର୍ଟ ୱାଲ୍ ସାଙ୍ଗକୁ ପ୍ରବେଶ ଦ୍ୱାରା ହେବ ବେଶ୍ ଆକର୍ଷଣୀୟ । ଗୋଟିଏ ଛାତ ତଳେ ଏଭଳି ଅନେକ କିଛି ଅନୁଭବ ମିଳିବ । ଅନ୍ୟପକ୍ଷରେ ବାଲିଯାତ୍ରାରେ ଏକକାଳୀନ ଲକ୍ଷାଧିକ ଲୋକଙ୍କ ସମାଗମ ହେବାକୁ ଥିବାରୁ ଏହି ଜୋନ୍ରେ କିଭଳି ଭିଡ ନିୟନ୍ତ୍ରଣ କରାଯିବ ତାକୁ ନେଇ ମଧ୍ୟ ଚିନ୍ତା ବଢିଛି । କାରଣ ‘କଟକ ଇନ୍ କଟକ’ ପାଖରେ ଟନେଲ୍ ଆକ୍ୱାରିୟମ, ଅକ୍ଷୟ ମହାନ୍ତି ମଞ୍ଚ ରହିଥିବାରୁ ବେଶ ଭିଡ ଜମିବ ।